JABURU 129 - KITABI HABARI MOPIOHE

Mei̒ polomalasi mai duo̒lo laawani

¹ Lahu jiara. Isirai̒lu, poleleaalo mai woloolo mola yio̒ ilalinaaya lomusu tumulalo mai yio̒ donggo humula.

² “Watia ilalinaaya lomusu tumulalo mai watia donggo humula, bo timongolio diila lowali lopoo̒laahe olaatia;

³ timongolio helohutu papaa-liyaalo todelomo wimbihu wulea lowatia, debo odelo tamoo madeo̒owa hemohutu huhuu-wangowalo hayahayao̒ to halabolu.

⁴ Bo Eeya taa̒adili malo lopato olaatia lonto polowato.”

⁵ Poluliaalo mao̒ taa u molonuo̒ Sion olaahe wau tiluhu tilumouli.

⁶ Poluliaalo mao̒ timongolio debo odelo huo̒yoto toitaato watopo u mowali mohengu tou̒ diipo mohutu mai;

⁷ diaaluo tamo mongotalao̒ olio meaabo mongawadeo̒ todelo buuhua.

⁸ Tau-tauwalo tahilao̒de diila tamoloi̒ya, “Pohileaalo dua̒ yio̒ balakatia mai lo Eeya, ami mobalakati mai olemu todelomo tanggulo Eeya.”