JABURU 12 - KITABI HABARI MOPIOHE

Dua̒ Mei̒ tulungi

¹ Duo̒lo diriheni lopolemboa̒ tamoolahua. Lodudua̒a lahu u owalulio. Jaburu lei Dauda.

² Tulungialo mai mongowatotia, yaa Eeya, sababu diduu̒ taa u mopiohu, taa u tatapu wau molotolo hilao to Eeya malo pulito.

³ Timongolio ngoa̒amila tinggai hemo hihiimbuloa, tinggai hemo aa̒akalia wolo loloo-iyaalo u moo̒hilao.

⁴ Pohuheliyalo mao̒ loloo-iyaalo umomiyo boito, yaa Eeya, pohou̒maalo tau-tauwalo bo motohilaa motabibo,

⁵ tahemo loi̒ya, “Ami okawasa wolo dila lami! Penu boli wolo wambai̒o mowali loi̒ya lami, wau diaaluo tamowali molanggu olami!”

⁶ Tahuda lo Eeya, “Taa mosikini dileehe wau taa modutolo mopoilaalo suusa. Yi botiaalo olo Wau̒ monao̒ mai mongohi otantaramu u hewooloolo limongolio.”

⁷ Danti lo Eeya motoheto wau mowali pongkuwalo, debo odelo talaa̒ tutu u tilesi todelomo tulu.

^8-9 Taa moleeto hi ntale-ntalenga ode utoonulaalo mao̒, ololeeto hepuji-pujio lo timii̒du tau. Bo Eeya hemoduolai to mongowatotia, yaa Eeya, ambunguolo dahailo mai mongowatotia monto tau-tauwalo hileeta boito.