JABURU 118 - KITABI HABARI MOPIOHE

Dua̒ sukuru tou̒ loo̒haama

¹ Posukurulo mola to Eeya sababu Eeya mopiohu, ponu lo Eeya ohiheo-hiheolo mao̒ diila opulitio.

² Mamusi taulo Isirai̒lu moloi̒ya, “Ponu lo Eeya ohiheo-hiheolo mao̒ diila o pulitio.”

³ Mamusi mongo iimamu moloi̒ya, “Ponu lo Eeya ohiheo-hiheolo mao̒ diila opulitio.”

⁴ Mamuji ngoa̒amila taa saale moloi̒ya, “Ponu lo Eeya ohiheo-hiheolo mao̒ diila opulitio.”

⁵ To delomo watia ileepita watia longiibode mola to Eeya; lapatao̒ Eeya lopo lopatai olaatia.

⁶ Watia diila hilumuhela sababu Eeya pee̒-pee̒enta wolaatia, manusia diila o lootolo to olaatia.

⁷ Eeya pee̒-pee̒enta wolaatia u motulungi olaatia, watia mamoo̒onto musu lowatia olaahelio.

⁸ Lebe mopiohe motiduo̒la to Eeya, lou̒ mopongaku to manusia.

⁹ Lebe mopiohe motiduo̒la to Eeya, lou̒ mohaalapu mowali bangusa.

¹⁰ Dadaata musu lomalita olaatia; wolo kawasa lo Eeya, timongolio ilolaahe lowatia.

¹¹ Timongolio lomala olaatia lonto totoonulalo mantahu; wolo kawasa lo Eeya, timongolio ilolaahe lowatia.

¹² Debo odelo tiia̒ timongolio longuu̒pa olaatia; wolo kawasa lo Eeya, timongolio ilolaahe lowatia. To delomo ngoi̒nta lomato timongolio yilate debo odelo tulu u lomobu pilomulo ulebe kikiio̒ wau moopa oduhi.

¹³ Watia tiluhulio wolo laba-labaalo wau ngopee̒ lodehu, bo Eeya lotulungi mai olaatia.

¹⁴ Eeya yito olootolo laatia wau tahepuja lowatia, Eeya malo poa̒ahu olaatia.

¹⁵ Dungohilo tingalaa̒ u loo̒haama to kekee-mawaalo umati lo Eeya, “Eeya lohutu mai huhutu u molotolo boli buheli daa̒!

¹⁶ Kawasa lo Eeya longohi mai olanto u loo̒haama! Eeya lohutu mai huhutu u molotolo boli buheli daa̒.”

¹⁷ Watia diila tamaate, bo debo tumutumulo u mopololadu huhutu lo Eeya.

¹⁸ Eeya malo posikisa daa̒ olaatia, bo Eeya diila lohudu olaatia ode mautu.

¹⁹ Huo̒ilo mai olaatia huhebu hulubangi Bele lo Eeya, alihu watia tumuwoto wau mosukuru mola to Eeya.

²⁰ Uti-utieelo huhebu hulubangi lo Eeya, bo taa juujulu mowali molibaya mao̒.

²¹ Watia momuji mola to Eeya, sababu Eeya lodungohei dua̒ lowatia; Eeya malongohi olaatia u loo̒haama.

²² Botu u tilapi lomongo pani lou̒ hitua-tuawua u bilongu, malowali botu podulungo.

²³ Uitolo huhutu mai lo Eeya, otutu moo̒linggolabe ode olanto.

²⁴ Uti-utieelo dulahu u tilantu mai lo Eeya; dulo polameento wolo wengahu.

²⁵ Mongowatotia momolohone, yaa Eeya, wohiyalo mai mongowatotia u moo̒haama, yaa Eeya, poo̒hamaalo mai mongowaatotia!

²⁶ Mabara-balakatilo tio tadungga-dungga mai to tanggulo Eeya, amiaatia mobalakati olimongoli monto Bele lo Eeya.

²⁷ Eeya yito Allahu Taa̒ala, Eeya omura lohilao to olanto. Pomajulo monao̒ pee̒-pee̒enta wolo walao̒ tango to uluu̒, wau helilia mao̒ mesba lo Eeya.

²⁸ Eeya Allahu Taa̒ala lowatia, watia mosukuru mola to Eeya, Allahu Taa̒ala lowatia, watia mopou̒daa̒ mola to Eeya.

²⁹ Posukurulo mola to Eeya sababu Eeya mopiohu, ponu lo Eeya ohiheo-hiheolo mao̒ diila opulitio.