JABURU 116 - KITABI HABARI MOPIOHE

Lolopato lonto baala lomautu

¹ Watia ilohilao to Eeya, sababu Eeya lodungohe olaatia wau hemo poo̒tuotai polohone lowatia.

² Eeya lodungohe olaatia, timii̒du watia mongiibode mola to Eeya.

³ Watia ilaanjamu baala lomautu; otihela hapato lomautu loluhu olaatia, helohutu olaatia balisa wau yiloohe.

⁴ Yi watia longiibode mola to Eeya, “yaa Eeya, watotia momolohone, poa̒ahuwalo mai watotia!”

⁵ Eeya yito tamoomonua wau aadili; Allahu Taa̒alanto lealeaatu odehu hilao.

⁶ Eeya molaalai tau-tauwalo tahitumula diila lebe-lebe wau diila olo ii̒ilangi; tou̒ watia diila olootolo piloa̒ahu mai lo Eeya watia.

⁷ Pilopo duo̒otuu̒ mola hilaau̒, sababu Eeya mopiohu to olaatia.

⁸ Eeya malo lopata olaatia lonto mautu; pilalongo Eeya watia wau diila piloluli lo Eeya lodehu.

⁹ Yi watia loo̒laasa tutumulo todunia botie, todelomo duo̒lo Eeya.

¹⁰ Watia debo yakini, eleponu watia moloi̒ya, “Watia ilodeehe daa̒.”

¹¹ To delomo olilinguu̒ lowatia, “Diaaluo penu boli ngotaa mao̒ tamowali yakiniyalo.”

¹² Wolo u mawohi lowatia ode Eeya u momaalasi opopiohu Eeya olaatia?

¹³ Watia mamodelo dewo lo angguru ode Eeya u mosukuru mola topolo tulungi mai lo Eeya.

¹⁴ Watia mamopoo̒polu danti lowatia to Eeya totalu lo ngoilanggubu umati lo Eeya.

¹⁵ Eeya lolee̒e daa̒ to opopate lo ngotaalio tapilonu lo Eeya.

¹⁶ Watotia botie wato lo Eeya, yaa Eeya, debo odelo tiilo lowatia, watia olo taa̒aluku wau hurumati to Eeya Eeya malo lopata olaatia lonto tutupa.

¹⁷ Watia mamodelo bake sukuru ode Eeya, sambela mopoi̒laalo mola dua̒ ode Eeya.

¹⁸ Watia mamo poo̒polu danti lowatia ode Eeya, totalu lo ngoilanggubu umati lo Eeya

¹⁹ tahia̒mbua to palepelo Bele lo Eeya, tohuungo kota lo Yerusalemu. Pujiaalo mola Eeya!