JABURU 115 - KITABI HABARI MOPIOHE

Poloi̒laalo momuji ode Allahu Taa̒ala Taa Laba-labaalo kawasa

¹ Diila amiaatia, yaa Eeya, diila amiaatia, bo Eeya wambao̒ tamusi pujiolo, sababu Eeya tatapu wau molotolo hilao wau debo momonu.

² Yilongola babaa-ngusawalo musi moloi̒ya, “Tou̒toonu Allahu Taa̒ala limongolio?”

³ Allahu Taa̒alanto woluo tosologa, Eeya hemohutu mai wolo kahandakia lo Eeya.

⁴ Balaahala limongolio monto hulawa wau talaa̒, huhutu uluu̒ lomanusia.

⁵ Timongolio otunggilo, bo diila moo̒ bisala, omato, bo diila moo̒onto.

⁶ Timongolio obulonga, bo diila moo̒ dungohu, owulingo, bo diila moo̒obo.

⁷ Timongolio o uluu̒, bo diila moo̒ tontaalo, o oa̒ato, bo diila moo̒ nao̒, wau diaaluo suala u yilumualo monto bunggohulio.

⁸ Pohileaala dua̒ odi-odieelo mola paladu lotau-tauwalo mopohutu mao̒, wau ngoa̒amila taa u yakini olio.

⁹ Wuu Isirai̒lu, potiharapulo mola to Eeya, Eeyaalo tamo tulungi wau moduo̒lai olimongoli.

¹⁰ Wuu mongo iimamu, poharapulo mola to Eeya, Eeyaalo tamo tulungi wau moduo̒lai olimongoli.

¹¹ Wuu ngoa̒amila taa saale, poharapulo mola to Eeya, Eeyaalo tamo tulungi wau moduo̒lai olimongoli.

¹² Eeya moe̒elai to olanto wau mamo balakati olanto, Eeya mamo balakati mai umati lo Isirai̒lu wau ngoa̒amila iimamu wali mai lei Haruna.

¹³ Eeya mamo balakati mai tau-tauwalo tahisaalea, mopio kikiio̒ meaambo leidaa̒.

¹⁴ Pohileaala dua̒ Eeya mongohi mai dadaata walao̒, toli mongoli wau wali mai limongoli.

¹⁵ Pohileaala dua̒ timongoli balakatia mai lo Eeya, talopowali hulungo wau dunia!

¹⁶ Hulungo yito miliki lo Eeya wambao̒, bo dunia yilohi mai lo Eeya ode manusia.

¹⁷ Eeya diila pujio lotaa yilate, lotaa u malo tuhuta mola ode tambati umoliilo.

¹⁸ Bo ito taa u tumutumulo mosukuru mola to Eeya, botia wau tunggula ohiheo-hiheolo mao̒. Pujiaalo mola Eeya!