JABURU 109 - KITABI HABARI MOPIOHE

Dua̒ todelomo usuusa

¹ Duo̒lo diriheni lopolemboa̒ tamoolahua. Jaburu lei Dauda. Yaa Allahu Taa̒ala talaito hepujio lowatia, ambunguolo diila mao̒ potipoo̒oyo.

² Sababu watia tiluhu lo tamooleeto wau tamoo-himbuloa tahemo pololadu sisii-litaalo wimbulo pasali lowatia.

³ Timongolio loluhu olaatia wolo tataa-heyaalo u polupolu lo lonuo̒, wau helopaatea wolaatia lou̒ diila o alaasani.

⁴ Timongolio helo potuludu olaatia, eleponu watia motolia̒ngo toli mongolio, wau malodua̒ mola toli mongolio.

⁵ Timongolio lomaalasi opopiohu lowatia wolo u moleeto, wau tolia̒ngo laatia wolo olonuo̒.

⁶ Pudua̒alo ngotaalio tamoleeto u momutoa̒ olio, huliaalo mao̒ tio dau̒wa lo laawanilio.

⁷ Huliaalo mao̒ tio butuo̒lio wau poi̒laalolo ototala, wau huliaalo mao̒ dua̒lio ilaanggapu dusa.

⁸ Huliaalo mao̒ tutumulio hua̒a mopulito, wau huhuloa̒alio hamaa lotaa wewo.

⁹ Huliaalo mao̒ mongo walai̒o mowali didu otiyamo, wau dilelio mowali janda.

¹⁰ Huliaalo mao̒ mongo walai̒o mowali tamoohilea umonao̒ ode utoonulalo mao̒, wau polontulolo monto ilowale lobelelio.

¹¹ Huliaalo mao̒ totoonulalo milikiilio hamaa lo tamootagia biloli, wau tilapulo tolopanilio u pilohutu wolo tioo̒opatea lambato lotau.

¹² Diila mao̒ woluo tamopiohu lohilao to olio, meaambo motolia̒nga tau̒kekeei̒ tatilolaalio mao̒.

¹³ Huliaalo mao̒ ngoilanggubu waliilio mai pobinasaalio, wau tanggulio olipata lo hilaide tamoo-mooliilio mola.

¹⁴ Huliaalo mao̒ ololeeto loluuhurulio debo ileela lo Eeya, wau dusa liilolio diila yiluluto.

¹⁵ Huliaalo mao̒ dusa limongolio laito ileela lo Eeya, wau diaaluo tamo toloeela olimongolio to dunia.

¹⁶ Sababu tau boito diila pee̒enta moe̒ela u mopo biloheo̒ laasa tolia̒ango. Tio helo ngalinaya taa mosikini wau modutolo, wau lomate yila-yilateelo mao̒ taa udiila olotolo.

¹⁷ Tio motohilaa molaa̒anati; huliaalo mao̒ tio lohihilao otuhata lo laa̒anati! Tio diila motohilaa mongohi balakati, huliaalo mao̒ diaaluo balakati to olio!

¹⁸ To olio molaa̒anati boito huhutu u lajimu, tutuuwauwa debo odelo momake pakeyangilio. Huliaalo mao̒ laa̒anati boito tumolohe debo odelo taluhu ode wawaai̒o, wau debo odelo winulo ode delomo tutuu-laalio.

¹⁹ Huliaalo mao̒ laa̒anati boito molau̒be olio debo odelo pakeyangi, wau laito molibude olio debo odelo bintolo wohuta.

²⁰ Yaa Eeya, podehuwalo mai hukuumani boito to tamoo-potuludua olo watotia, totaa u hemobisala moleeto pasali lowatotia.

²¹ Bo tulungialo mai watotia motuuu̒de wolo danti lo Eeya, yaa Eeya Allahu Taa̒ala lowatotia, poa̒ahuwalo mai watotia sababu opopiohu wau ponu lo Eeya.

²² Sababu watotia mosikini wau modutolo, wau hilaa lo watotia pilalia demola delomio.

²³ Watotia ngopee̒ yilooli debo odelo wolilu tou̒ lolaango, watotia pilongee̒lio debo odelo bulita.

²⁴ Huu̒ lowatotia hulu-huluhelio sababu lopuasa, wawaao̒ lowatotia lowali loa̒muto daa̒.

²⁵ Tau-tauwala tahe loo̒onto hemohina olo watotia sambela hitahalilia lo lunggongo.

²⁶ Tulungia mai watotia, yaa Eeya Allahu Taa̒ala lowatotia, poa̒ahuwalo mai watotia motuuu̒de wolo ponu lo Eeya.

²⁷ Yi musu lo watotia mamotota mao̒ deu̒ uito huhutu lo Eeya, deu̒ Eeya, yaa Eeya, talohutu mai uito.

²⁸ Eleponu timongolio molaa̒anati olo watotia, pohileaala dua̒ Eeya mobalakati mai olo watotia. Eleponu timongolio mobongu mai, timongolio mapoo̒o-litolio; bo pohileaala dua̒ watotia, wato lo Eeya, poe̒engahulo.

²⁹ Huliaalo mao̒ tau-tauwalo tahe mopotuludu olo watotia wanggube lo ohihina, wau raasa moolito momeleu̒to olimongolio debo odelo jumba.

³⁰ Watotia ohilaa momuji mola to Eeya wolo suala moo̒ohuu̒, mopo masaahuru Eeya to huungo aambua lo umati.

³¹ Sababu Eeya mopoduulua wau mopoa̒ahu taa mosikini monto olimongolio tamopodehu hukuumani mate ode yitaatio.