JABURU 107 - KITABI HABARI MOPIOHE

BUKU OLIMOLIO: JABURU 107–150 Pujiaalo mola to opopiohu lo Eeya

¹ “Posukurulo mola to Eeya sababu Eeya mopiohu, ponu lo Eeya ohiheo-hiheolo mao̒ diila opulitio.”

² Poleleaalo uito pipiiu̒wa, wuu timongoli tamaa piloa̒ahu lonto usuusa.

³ Timongoli mai̒lambu lo Eeya lonto lilii-puwaalo deli, lonto tiimuru wau otolopa, lonto tilayo wau huliaalio.

⁴ Woluo talonao̒ ode utoonulalo mao̒ tohuta datahu wau luasi udelita, wau diila motota lo dalalo ode tambati biluloa̒alo tokota.

⁵ Timongolio pilolaango wau helo totoa̒ngo wau iloolia lo totoonulalo halaapani.

⁶ To delomo usuusa timongolio longiibode to Eeya, wau Eeya helo lopatai olimongolio lonto ileepita.

⁷ Eeya lodelo olimongolio lolibaya dalalo u motulidu ode tambati biluloa̒alo tokota.

⁸ Paatutilo timongolio mosukuru mola to Eeya sababu ponu lo Eeya, sababu totoonulalo huhutu lo Eeya u moo̒linggolabu ode manusia.

⁹ Sababu Eeya mopoo̒luli hilaa lotaa u mototoa̒ngo, wau mopoo̒daata daa̒ wolo totoonulalo u mopiohu totaa polaangolo.

¹⁰ Woluo tahi huloa̒a lotuluhu hinggouwa todelomo u modio̒lomo, taulo tutupa tahi dutolaa todelomo hipungua lorante wate,

¹¹ sababu timongolio malo malakala to Allahu Taa̒ala wau diila lomandungi palenta lo Taa Laba-labaalo molanggato.

¹² Eeya helo ngaantulu hilaa limongolio wolo kalaja mobuheeto; timongolio lodehu wau diaaluo talo tuulungi.

¹³ To delomo usuusa timongolio helo ngiibode to Eeya, wau Eeya lolopatai olimongolio lonto ileepita.

¹⁴ Eeya lodelo olimongolio yilumualo lonto u modio̒lomo, wau lomunto̒ u pilomungu olimongolio.

¹⁵ Paatutilo timongolio mosukuru mola to Eeya sababu ponu lo Eeya, sababu totoonulalo huhutu lo Eeya u moo̒linggolabu ode manusia.

¹⁶ Sababu Eeya helo poloohubu huhuu-hebuwaalo tombaha, wau longantulu papaa-langiyalo wate.

¹⁷ Woluo taa abaloolo wau hidutolaa sababu duduu-sawaalo limongolio, boli silikisaa sababu totala limongolio.

¹⁸ Timongolio molonuo̒ tou̒ totoonulalo ua̒alo, mautu limongolio malembidei.

¹⁹ To delomo usuusa timongolio longiibode to Eeya, wau Eeya lolopato olimongolio lonto ileepita.

²⁰ Eeya lopoo̒luli hilaa limongolio wolo palenta lo Eeya, wau helo lopata olimongolio lonto wangopa lo kuubulu.

²¹ Paatutilo timongolio mosukuru mola to Eeya sababu ponu lo Eeya, sababu totoonulalo huhutu lo Eeya u moo̒linggolabu ode manusia.

²² Huliaalo mao̒ timongolio mosukuru mola lou̒ modelo dewo, wau mopo loladu huhutu lo Eeya wolo lalaa-huwaalo meengahu.

²³ Woluo poli talonao̒ lobalango deheto wolo kaapali, u mopeehu ua̒alo to deheto u luasi.

²⁴ Timongolio heloo̒onto totoonulalo huhutu lo Eeya, huhutu lo Eeya u moo̒linggolabe to deheto uluasi daa̒.

²⁵ To palenta lo Eeya lohiipolo mola dupoto huloyongo wau lopo oliyoo buo̒lo laba-labaalo.

²⁶ Kakaa-paliyaalo leibintaa̒a molanggato ode dulente, lapatao̒ pilomahulo ode wamoo̒ lo auhe daa̒. Tau-tauwala iloolia lo obuheli helotaalua wolo musiba debo odelo udaa̒ leeto.

²⁷ Timongolio hilumayango wau lohuhuu-yungaalo mao̒ debo odelo taa hiluwoa̒ wau iloolia lo aakali.

²⁸ To delomo usuusa timongolio longiibode to Eeya, wau Eeya helo lopatai olimongolio lonto ileepita.

²⁹ Dutalo u lilalilau ilahula lo Eeya lotipoo̒yo, bubuu-olowaalo olo lowali lodoo̒oto.

³⁰ Timongolio sanangi sababu dupoto huloyongo malo paluto; dilelo lo Eeya timongolio ode rabua u pilatuju.

³¹ Paatutilo timongolio mosukuru mola to Eeya sababu ponu lo Eeya, sababu totoonulalo huhutu lo Eeya u moo̒linggolabu ode manusia.

³² Timongolio mopo masaahuru mola odudaa̒ lo Eeya to huungo umati lo Eeya, wau momuji mola to Eeya todelomo majalisi lokaumu mongo panggola.

³³ Duduu-tulaalo bilolio̒ Eeya lowali huta datahu wau luasi udelita butu lo taluhu lowali huta mohengu wau diila molomiodu.

³⁴ Huta molomiodu pilopowali lo Eeya huta datahu wau luasi u mopanggelo, sababu ololeeto lotau-tauwalo tahi biluloa̒wa teto.

³⁵ Huta datahu wau luasi udelita bilolio̒ Eeya lowali kulamu lotaluhu, huta mohengu lowali butu lotaluhu.

³⁶ Tau-tauwalo tahi polaango pilopo tambati lo Eeya mola teto; timongolio lopotihula kota u piloti biluloa̒ limongolio.

³⁷ Timongolio helo mua̒yadeo̒ hahaa-laboluwalo wau lopomulo bungo lo angguru, lapatao̒ lohimoa̒ tilapulio u dadaata daa̒.

³⁸ Eeya longohi olimongolio walao̒ dadaata, wau binatangi limongolio hitumula iloduhenga mola dadaata.

³⁹ Bo timongolio ilolaahelio wau bolo ngoi̒di sababu polodutolo wau polodeehe udiila o manusia.

⁴⁰ Eeya lopodupapa tahi kawaasawa limongolio, wau lopoa̒hu olimongolio helonao̒ ode utoonulalo mao̒ tohuta datahu wau diu̒to luasi udelita udiila odalaalio.

⁴¹ Bo taa mosikini yilopato Eeya lonto osuusa limongolio, ngaalaa̒ limongolio iloduhenga mola debo odelo himbala lohimba.

⁴² Taa juujulu loo̒onto olio wau lotiwengahu, bo taa moleeto loheu̒ta tunggilo alihu motipoo̒yo.

⁴³ Pohileaala dua̒ taa molinepo momikiilangi mola ngoa̒amila sua̒li boito wau momasisi deu̒ Eeya debo momonu.