IMAAMATI 7 - KITABI HABARI MOPIOHE

Bake poluloo̒ uiluhi

¹ Uti-utieelo wuwuu-uduwaalo pasali poluloo̒ uiluhi. Bake boito mantali daa̒.

² Binatangi duo̒lo bake musi olotolo to tambati pongongolotalo binatangi duo̒lo bake yilalango, lapatao̒ duhulio pomuhutao̒ to opato biihu mesba.

^3-4 Ti iimamu musi mopodewo mao̒ toitaato mesba ngoa̒amila tabo lobinatangi boito, deu̒yito-yito: Patahio u otabo, tabo ulomolu tuango ombongio, oile wolo tabolio, wau wimbihu umopiohe daa̒ monto wantohio.

⁵ Ngoa̒amila boito musi lalangolo toitaato mesba odelo bake lou̒ aalo ode Eeya. Bake boito yito duo̒lo bake poluloo̒ uiluhi.

⁶ Timii̒du mongo lolai̒ todelomo ngaalaa̒ lomongo iimamu mowali molamela tapu lobake boito, bo musi tamelo mao̒ limongolio totambati utolo-tolomodu, sababu bake boito mantali daa̒.

⁷ Duo̒lo bake pongambungualo dusa wau bake poluloo̒ uiluhi pohu-pohutu wuu̒du u tutuuwauwa, deu̒yito-yito: tapu lobibiahe u pobakeelo yito tayadu li iimamu tamo podewo mao̒.

⁸ Walito lobibiahe boito olo duo̒lo li iimamu.

⁹ Timii̒du bake pohinta u yilalango todelomo polalangalo meaalo tubuwolo todelomo ulongo meaalo u pilanggangi, mowali tayadu li iimamu tamo podewo mao̒.

¹⁰ Bo bake pohinta udiila tilubu, mopio u ilulau wolo winulo meaalo u mohengu, ngoa̒amilalo duo̒lo mongo iimamu wali lei Haruna, wau musi tayadulo tutuuwauwa towolota limongolio.

Bake lo polodame

¹¹ Uti-utieelo wuwuu-uduwaalo pasali bake lo polodame u podewolo ode Eeya.

¹² Wonu bake boito podewolo ode oduo̒lo, yi wolo binatangi boito musi podewolo olo roti udiila momake ragi. Roti boito mowali u mohulodu monto ulau lolabu wolo winulo jaitun, mowali olo roti mohengu wau molipa u piladeta wolo winulo, meambo kuukisi labu u pilohutu wolo winulo jaitun.

¹³ Ngopohia mao̒ leeto musi podewolo olo roti u pohutuwola momake ragi.

¹⁴ Monto timii̒du roti ngodalaala ngotayadio musi podewolo ode Eeya, wau uito tayadu li iimamu tamohama duhu lo binatangi boito wau mopo muhutao̒ tomesba duo̒lo bake lo polodame.

¹⁵ Tapulio musi tamelolo tou̒ binatangi boito podewolo, penu boli ngoi̒di mao̒ diila mowali polabitolo tunggula loombulio mola dumodupo.

¹⁶ Wonu tahingota-ngotaawa modelo bake lo polodame duo̒lo mopoo̒polu mao̒ niyatilio, meaalo duo̒lo bake iloheela lohilao, yi diila palalu ngoa̒amilalo tamelolo todulahee boito olo. To wimbihu lebelio mowali tamelolo loombulio mola.

¹⁷ Wonu todulahee u otolulio donggo woluo labitio, tapu boito musi pobuwolo tunggula maahu.

¹⁸ Bo wonu todulahee u otolulio tapu boito debo tamelolo, yi bake boito diila tatolimoolo wau diila modelo balakati ode tau boito, tumbao̒ mowali haramu. Taa u molamelao̒ ototala wau musi momanta akiibatilo.

¹⁹ Tapu u ilotuhata lou̒ hitua-tuawua u najisi musi pobuwolo tunggula maahu wau diila mowali tamelolo. Tapu lobake polodame bo mowali tamelo lotaa udiila najisi.

²⁰ Wonu taa molamela tapu boito tou̒ tio donggo najisi, yi tio diilalo anggapuolo pongawaa̒ umati lo Allahu Taa̒ala.

²¹ Wonu bolo tahingota-ngotaawa molamela tapu lobake boito lapatao̒ moo̒dedeta u hitua-tuawua unajisi, mopio u asaliilio monto manusia meaalo monto binatangi, yi tio olo diilalo anggapuolo pongawaa̒ umati lo Allahu Taa̒ala.

²² Eeya longohi olei Musa wuwuu-uduwaalo botie,

²³ ode bangusa lo Isirai̒lu. Tabo losapi, himba meaalo batade diila mowali tamelolo.

²⁴ Tabo lo binatangi uilate lohilaalio meaalo sababu dilangapo binatangi mongantau, diila mowali tamelolo bo mowali pomake to kaparluani wewo.

²⁵ Taa u molamela tabo lo binatangi u mowali podewolo duo̒lo bake lou̒ aalo duo̒lo Allahu Taa̒ala, diilalo anggapuolo pongawaa̒ umati lo Allahu Taa̒ala.

²⁶ Taulo Isirai̒lu, penu boli tou̒toonu poti biluloa̒alio, diila mowali molamela duhu lobulungi meaalo duhu lo binatangi uwewolio.

²⁷ Tatoonu tamo lambanga wuu̒du boito diilalo anggapuolo pongawaa̒ umati lo Allahu Taa̒ala.

²⁸ Eeya longohi olei Musa wuwuu-uduwaalo botie,

²⁹ ode bangusa lo Isirai̒lu. Titaalo tita tamodelo bake lo polodame, musi mopowiwi mao̒ ngotayadu duo̒lo dewo poheetu ode Eeya.

³⁰ Tio lohihilao musi modelo mao̒ bake lou̒ aalo boito. Tabo wau duhelo binatangi boito musi podewolo odelo dewo poo̒taa ode Eeya.

³¹ Ti iimamu musi molalangao̒ tabo boito toitaato mesba, bo duhelio yito tayadu lomongo iimamu.

³² Bungolopalio olowala musi wohiyalo odelo tolomodu dembulo

³³ odeli iimamu tamo podewo duhu wau tabo lobake polodame boito.

³⁴ Duhelo wau bungolopa olowala yito tolomodu wowohi u hilama lo Eeya lonto dewo poo̒taa bangusa lo Isirai̒lu wau yilohi ode mongo iimamu. Ui-uitolo dembulo bangusa lo Isirai̒lu ode mongo iimamu u ohiheo-hiheolo mao̒.

³⁵ Monto ua̒alo u podewolo ode Eeya, tayade ui-uitolo u yilohilio odelei Haruna wau mongo walai̒o todulahee timongolio pilopo mantaliilio lowali iimamu.

³⁶ Todulahee boito Eeya lomalentao̒ bangusa lo Isirai̒lu alihu monto dewo limongolio, tayade boito duo̒lo mongo iimamu. Wuu̒du botie musi dungohe mao̒ lo bangusa Isirai̒lu u ohiheo-hiheolo mao̒.

³⁷ Odi-odieelo mola wuwuu-uduwaalo pasali lobake yilalango, bake pohinta, bake pongambunguala dusa, bake poluloo̒ uiluhi, bake mopo mantali wau bake lo polodame.

³⁸ Eeya longohi mao̒ papaa-lentaalo boito odelei Musa to Hui̒dee Sinai tou̒ Tio lopoa̒hu bangusa lo Isirai̒lu helo podewo bake tohuta datahu wau luasi udelita lo Sinai.