IMAAMATI 23 - KITABI HABARI MOPIOHE

Duduu-laheyaalo buka

¹ Eeya longohi mao̒ odelei Musa

² wuwuu-uduwaalo pasali lameyangi lo agama, umusi pomalamuolo odelo dulahu buka u poi̒baadatiyalo.

³ Woluo wolomohui mola u mokalaja, bo todulahee u opitulio, dulahu Saabati, deu̒yito-yito dulahu pohuheliyalo u poheetuwolo ode Eeya. Todulahee boito timongoli musi mohutu mao̒ dudunggaya u poi̒baadatiyalo wau diila mowali mokalaja.

⁴ Uti-utieelo duduu-laheyaalo buka utilantu mai lo Eeya wau umusi pomalalumuolo tou̒ wakutu utilantu mao̒.

Dulahu Buka Paska wau Roti udiila Oragi

⁵ Dulahu Buka Paska upolameelo u mohulumati to Eeya, tumulalo tosaaa̒ti mato lodulahu tumolopaa mota todulahu opulaa pato hulalo bohulio.

⁶ Loombulio mola, dulahu opulaa limo tumulaalo Lameyangi Roti diila Oragi, wau ngotilonggadu pitu hui mola timongoli diila mowali molamela roti upilohutu lomake ragi.

^7-8 Ngotilonggadu pitu hui mola boito timongoli musi mopodewo bake lou̒ aalo ode Eeya. Todulahee ubohulio wau opitulio boito timongoli musi mohutu mao̒ dudunggaya u poi̒baadatiyalo wau diila mowali mokalaja u mobuheeto.

^9-10 Wonu timongoli malei dungga mola tolipu uwohi mai lo Eeya ode limongoli, wau mohimoa̒ao̒ tilapulo huta, buhua lopale ubohulo ilotolao̒ limongoli musi deloolo odeli iimamu.

¹¹ Todulahee lapatio mao̒ dulahu Saabati, ti iimamu musi mopodewo pale boito odelo dewo poo̒taa ode Eeya, alihu Eeya sanangi to olemu.

¹² Todulahee timongoli mopodewo pale boito, timongoli musi mopodewo olo ode bake yilalango tuwau walao̒ himba ulai̒ u ou̒umulu ngotaunu wau diila otailio.

¹³ Duo̒lo bake lou̒ aalo podewowa mao̒ dulokilo labu u ilulau wolo winulo jaitun. Boolo bake boito moo̒sanangi hilaa lo Eeya. Pee̒-pee̒enta woleeto podewowa mao̒ olo ngoliiteri taluhu lo angguru.

¹⁴ Tou̒ diipo modelo mao̒ dewo boito ode Eeya, timongoli diila mowali molamela penu boli bo nogi̒di pale bohu boito, mopio menggo, pilanggangi meaalo yilalango lowali roti. Wuu̒du boito musi dunggohe mao̒ lo walimu mai ngoa̒amila ohiheo-hiheolo mao̒.

Potihunggu pongotolalo

¹⁵ Tumulalo mai monto dulahu lapatao̒ Saabati, tou̒ timongoli mopodewo mao̒ ode Eeya buhua lopale ubohulio, timongoli musi moyia̒apao̒ ahadi poo̒opitu mola polupolu.

¹⁶ Todulahee u olimo lopulu, deu̒yito-yito dulahu lapatao̒ dulahu Saabati u opitulio timongoli musi modelo bake pohinta ode Eeya.

¹⁷ Timii̒du ngaalaa̒ musi mopodewo roti dulo botu duo̒lo dewo poo̒taa ode Eeya. Timii̒du roti musi pohutuwola monto dulokilo labu moa̒aluti momake ragi wau musi wuduwola ode Eeya odelo dewo tilapulo huta ubohulio.

¹⁸ Wolo roti boito bangusa lo Isirai̒lu musi mopodewo mao̒ pitu walao̒ himba ulai̒ u ou̒umulu ngotaunu, tuwau sapi ulai̒ buboto wau duluo batade. Tinggai diila mowali otailio wau musi podewolo duo̒lo bake yilalango ode Eeya, wolo bake pohinta wau bake taluhu lo angguru. Boolo bake boito moo̒sanangi hilaa lo Eeya.

¹⁹ Podewowa mao̒ olo batade ulai̒ tuwau ode bake pongambungualo dusa wau duluo himba ulai̒ u ou̒umulu ngotaunu ode bake lo polodame.

²⁰ Roti wau duluo himba ulai̒ boito musi podewolo odeli iimamu odelo dewo poo̒taa ode Eeya, wau uito duo̒lo tayadu li iimamu. Dedee-wowaalo boito yito mantali.

²¹ Todulahee boito timongoli musi mohutu mao̒ dudunggaya u poi̒baadatiyalo wau diila mowali moponao̒ kalaja u mobuheeto. Wuu̒du boito musi dungohe mao̒ lo walimu mola u ohiheo-hiheolo mao̒, penu boli tou̒toonu timongoli bilu-biluloa̒.

²² Wonu timongoli mongotolo, diila mao̒ pongotolo pale ulobutu tobiihu halabolumu wau diila pohualinga u mohimoa̒a pale u ilolabita lapatao̒ ilotolo. Polulia mao̒ uito ode taa mosikini wau taa deli. Eeya yito Allahu Taa̒ala limongoli.

Potihunggu lo Taunu Bohu

^23-24 Bohulo dulahu hulalo opitulio musi polameelo odelo dulahu u pohetuwolo pohuheliyalo. Todulahee boito tuotaala wolo tingohu torompeti, wau timongoli mohutu mao̒ dudunggaya u poi̒baadatiyalo.

²⁵ Podewowa mao̒ bake lou̒ aalo ode Eeya wau diila mao̒ pohutua kalaja u mobuheeto todulahee boito.

Dulahee pongambungualo dusa

^26-27 Dulahu opolulio hulalo opitulio yito dulahu upacala timii̒du taunu duo̒lo pongambungualo dusa ode bangusa lo Isirai̒lu. Todulahee boito timongoli musi mopuasa wau mohutu mao̒ dudunggaya u poi̒baadatiyalo wau mopodewo bake lou̒ aalo ode Eeya.

²⁸ Diila mao̒ pokalaja, sababu todulahee boito yito dulahu pongambungualo dusa, alihu timongoli moo̒tapu ambungu totalu lo Eeya Allahu Taa̒ala limongoli.

²⁹ Titaalo tita tamo lamela hitua-tuawua todulahee boito, diilalo anggapuwola pongawaa̒ umati lo Allahu Taa̒ala.

³⁰ Wau titaalo tita tamoponao̒ lokalaja todulahee boito, hukuumanio lo Eeya lohihilao wolo hukuumani mate.

³¹ Wuu̒du boito pohu-pohutu ode ngoa̒amila walimu mola penu boli tou̒toonu timongolio bilu-biluloa̒.

³² Tumulalo mai tou̒ mato lodulahu tumolopaa mota todulahu otiolio hulala boito dilumutu tou̒ mato lodulahu tumolopaa mota todulahu opululio, musi polamea mao̒ limongoli debo odelo dulahu Saabati, dulahu u tolomodu pohuheliyalo. Ngohilayaa̒ lodulahee boito timongoli musi mopuasa.

Potihunggu lo Wombohe Duungo

^33-34 Potihunggu lo Wombohe Duungo tumulalo todulahee opulaa limo hulalo opitulio wau hiheolio pituhui mola.

^35-36 Ngotilonggadu pituhui mola boito, timii̒du dulahu timongoli musi mopodewo bake lou̒ aalo. Todulahee ubohulio wau owalulio timongoli musi mohutu mao̒ dudunggaya u poi̒baadatiyalo wau mopodewo bake lou̒ aalo ode Eeya. Diila mao̒ pokalaja u mobuheeto todulahee boito.

³⁷ Ui-uitolo dulahu buka lo agama utilantu mai lo Eeya wau u musi pomalalumua mao̒ limongoli. To lalaa-mengiyalo boito timongoli musi mohulumati to Eeya lou̒ mohutu mao̒ dudunggaya u poi̒baadatiyalo wau mopodewo bake lou̒ aalo, bake yilalango, bake pohinta, bake lobinatangi wau bake taluhu lo angguru, ngodaata u palaluolo timii̒du dulahu.

³⁸ Lalaa-mengiyalo boito debo odelo poduhenga to duduu-laheyaalo Saabati biasa, oditolio dedee-wowaalo boito yito olo poduhengo to wowohimu ubiasa, tobakemu u potoloto loi̒ya, meaalo bake iloheela lohilao uwohi limongoli ode Eeya.

³⁹ Lapatao̒ mongotolo, tumulalo mao̒ dulahu opulaa limo hulalo opitulio, timongoli musi mohutu mao̒ lameyangi ngotilonggadu pituhui mola. Todulahee ubohulio wau u owalulio yi todulahee utolomodu pohuheliyalo.

⁴⁰ Todulahee ubohulio timongoli musi molipu mao̒ huhuu-ngowaalo ulaba-labaalo mopiohu monto ilengimu, wau olo duduu-ngowaalo palma wau tataa-ngowaalo kekeei̒ monto bubuu-ngowaalo ayu u mohimbungo, lapatao̒ tumula lomola lameyangi wengahu u mohulumati Eeya Allahu Taa̒ala limongoli.

⁴¹ Lameyangi boito musi pohutuo limongoli ngotilonggadu pituhui mola. Wuu̒du boito musi pohutuo mao̒ lo waliimu mola u ohiheo-hiheolo mao̒.

⁴² Pituhui mola hiheolio ngoa̒amila bangusa lo Isirai̒lu musi motibiluloa̒ to wowoo-mboheyalo duungo,

⁴³ alihu otaawa lo waliimu mola deu̒ Eeya mopoa̒hu mao̒ bangusa lo Isirai̒lu motibiluloa̒ todelomo wowoo-mboheyalo ubiasa, tou̒ Tio lodelo olimongolio yilumualao̒ lonto Masiri. Tio-tiolo Eeya Allahu Taa̒ala limongoli.

⁴⁴ Odi-odieelo mola tei Musa helopo tunggulao̒ ode bangusa lo Isirai̒lu wuwuu-uduwaalo pasali lodudelo mohutu mao̒ lalaa-meyangiyalo u mohulumati to Eeya.