IMAAMATI 14 - KITABI HABARI MOPIOHE

Upacala pobelesiyalo lapatio mao̒ loluli mai lonto ngongoto lo alipo umoo̒ topotala

¹ Eeya longohi mao̒ odelei Musa

² wuwuu-uduwaalo botie pasali lo upacala pobelesiyalo lapatio mao̒ loluli mai lonto ngongoto lo alipo umoo̒ topotala. Todulahee tau boito tiluletelio mao̒ belesi, tio musi deloolo odeli iimamu,

³ wau ti iimamu modelo mao̒ tau boito ode bulemengo kema. Wonu moduduo̒ u tiluletelio tau boito maloluli,

⁴ ti iimamu mopoa̒hu mao̒ olio modelo bulungi duluo hitumula udiila haramu, wolo ayu woohu ngoputu, tali meela ngopata wau hisop ngopangge.

⁵ Bulungi u tuwau musi olotolo toitaato ulongo huta utua-tuanga taluhu belesi monto butu lotaluhu.

⁶ Bulungi u tuwau poli wolo ayu woohu, tali meela wau hisop ngopangge musi polomoolo ode delomo duhu lobulungi umaa iloloto.

⁷ Ti iimamu mopo molotia̒ao̒ duhu lobulungi boito poo̒opitu totaa maloluli boito, wau mopoi̒laalo mao̒ olio belesi. Lapatao̒ bulungi udonggo tumu-tumulo musi huliaalo ode huta datahu u luasi.

⁸ Lapatao̒ tau boito musi mongulo mao̒ pakeyangilio, monguluhu ngoa̒amila huwoi̒o, wau molihu. Yi lobelesi lomola tio, wau mowali tumuwotao̒ ode kema, bo ngotilonggadu donggo pitu hui mola poli tio diipo mowali tumuwotao̒ ode delomo kemalio lohihilao.

⁹ Todulahee u opitulio tio musi monguluheo̒ ngoa̒amila huwoi̒o, wau olo danggulio, buntungo matolio wau ngoa̒amila hapato uwoluo towawaai̒o. Lapatao̒ tio musi mongulo mao̒ pakeyangilio wau molihu. Bolo lapatio mao̒ tio belesi.

¹⁰ Todulahee u owalulio tau boito musi modelo mao̒ walao̒ himba ulai̒ duluo, wau walao̒ himba bilango tuwau u ou̒umulu ngotaunu u tinggai diila otailolio. Ngopohia leeto olo labu tolokilo labu umaa ilulau wolo winulo jaitun wau ngotayade totolu loliiteri winulo jaitun.

¹¹ Lapatao̒ ti iimamu musi modelo olio wolo dewolio boito ode talu lohuhebu Kema lo Eeya.

¹² Ti iimamu musi mohama mao̒ walao̒ himba ulai̒ tuwau wau ngotayade totolu loliiteri winulo jaitun duo̒lo bake poluloo̒ uiluhi, wau mopodewo mao̒ odelo dewo poo̒taa ode Eeya.

¹³ Walao̒ himba boito musi olotolio totambati u tolomodu hepo ngongolotalo binatangi duo̒lo pongambungualo dusa wau bake yilalango. Himba boito musi olotolo teto kalana bake poluloo̒ uiluhi wau bake pongongambungualo dusa yito mantali daa̒ wau mowali tayadu li iimamu.

¹⁴ Ti iimamu musi mohama mao̒ ngoi̒di duhu lowalao̒ himba tulusi mopo maideo̒ to pambilinga olowala, to tiyombu lo uluu̒ olowala, to tiyombu lo oa̒ato olowala lotaa umaa poilaalolo belesi.

¹⁵ Lapatao̒ ti iimamu mohama mao̒ ngoi̒di winulo jaitun wau moluatao̒ topaladu lo uluu̒lio oloihi lohihilao.

¹⁶ Lapatao̒ tio mopolomo mao̒ tingongoa lo uluu̒lio olowala ode delomo winulo, wau mopo molotio̒ poo̒opitu ode delomo Kema lo Eeya.

¹⁷ Lapatao̒ ngoi̒di winulo uwoluo to uluu̒lio musi pomaideo̒ to tataa-mbatiyalo u mapilaide wolo duhu, deu̒yito-yito to pambilinga olowala, totiyombu lo uluu̒ olowala, wau totiyombu lo oa̒ato olowala lotaa umaa poilaalolo belesi.

¹⁸ Lebelio lowinulo musi tuatolo ode yitaato lunggongo lotau boito. Lou̒ odito ti iimamu mopowoluo mao̒ upacala pomantiyalo duo̒lo tau boito totalu lo Eeya.

¹⁹ Lapatao̒ ti iimamu musi mopodewo mao̒ bake pongambungualo dusa alihu taa unajisi boito mowali belesi. Lapatio mao̒ tio musi mongolotao̒ binatangi duo̒lo bake yilalango

²⁰ wau mopodewo pee̒-pee̒nta wolo bake pohinta toitaato mesba. Lou̒ odito ti iimamu mopowoluo mao̒ upacala pomantaliyalo duo̒lo tau boito, wau tio mowali belesi.

²¹ Wonu tau boito mosikini wau diila mambo, yi duo̒lo bake poluloo̒ uiluhi tio mowali modelo walao̒ himba ulai̒ tuwau wambao̒ duo̒lo dewo poo̒taa ode Eeya. Wewolio leeto ngokilo labu ulauwoola wolo winulo jaitun duo̒lo bake pohinta, wau ngotayade totolu loliiteri winulo jaitun.

²² Tio olo musi modelo bulungi poombo muda duluo meaalo tarakuku muda: tuwau duo̒lo bake pongambungualo dusa wau tuwau poli duo̒lo bake yilalango.

²³ Ngoa̒amila dewo boito musi deloolo odeli iimamu totalu lohuhebu Kema lo Eeya todulahee owalulio lo upacala pomantaliyalo batangalio lohihilao.

²⁴ Ti iimamu mohama mao̒ walao̒ himba wau winulo jaitun boito wau mopodewo odelo dewo poo̒taa ode Eeya, wau uito duo̒lo tayadio li iimamu.

²⁵ Lapatao̒ ti iimamu musi mongolotao̒ walao̒ himba boito wau mopo mapideo̒ ngoi̒di duhulio to pambilinga olowala, tiyombu lo uluu̒ olowala wau tiyombu lo oa̒ato olowala lotaa umaa poilaalolo belesi.

²⁶ Ti iimamu musi moluatao̒ ngoi̒di winulo topaladu lo uluu̒lio oloihi

²⁷ wau wolo tingongoa lo oluu̒lio olowala mopo molotio̒ winulo boito poo̒opitu todelomo Kema lo Eeya.

²⁸ Lapatao̒ ngoi̒di winulo uwoluo to uluu̒lio musi pomaideo̒ to tataa-mbatiyaalo u mapilaide loduhu, deu̒yito-yito to pambilinga olowala, totiyombu lo uluu̒ olowala wau tiyombu lo oa̒ato olowala lotaa umaa poilaalolo belesi.

²⁹ Lebelio lowinulo boito musi tuatolo toitaato lunggongo lotau boito duo̒lo upacala pomantaliyalo batanggalio totalu lo Eeya.

³⁰ Lapatao̒ ti iimamu musi mopodewo mao̒ bulungi poombo muda tuwau meaalo tarakuku muda

³¹ duo̒lo bake pongambungualo dusa, wau tuwau uwewolio duo̒lo bake yilalango pee̒-pee̒enta wolo bake pohintalio. Lou̒ odito ti iimamu mopowoluo mao̒ upacala pomantaliyalo tau boito to talu lo Eeya.

³² Ui-uitolo wuu̒du pasali lo upacala pomantaliyalo lapatio mao̒ modutolo ngongoto lo alipo umoo̒ topotala duo̒lo taa udiila mambo.

Omotupo tobele

³³ Eeya longohi mao̒ odelei Musa wolei Haruna

³⁴ wuwuu-uduwaalo pasali lobele u iloo̒ombita lou̒ motupo u moloo̒po. Wuwuu-uduwaalo botie pohu-pohutu lapatio mao̒ bangusa lo Isirai̒lu tilumuwuoto ode Kanaa̒n, lipu uilohi lo Eeya ode limongolio.

³⁵ Titaalo tita tamoo̒ dungga omotupo todelomo belelio, musi mopodulohu mao̒ sua̒li boito odeli iimamu.

³⁶ Tou̒ diipo ti iimamu monao̒ mai momalakisao̒ umotupo boito, tio musi momalentao̒ alihu totoonulalo u hitua-tuawua yinggilolo monto bele boito. Wonu diila, boli wolo uwoluo todelomo bele boito mowali najisi. Lapatao̒ ti iimamu musi monao̒ mai

³⁷ u momalakisao̒ umotupo boito. Wonu woluo hibonto-bontoa̒ monto yiduma meaalo monto welama u oontonga mao̒ debo odelo ilintopa mola lomeeseli,

³⁸ ti iimamu musi mololaa mao̒ bele boito wau mopoluli mao̒ unti-unti ngotilonggadu pitu hui mola.

³⁹ Todulahee u opitulio tio musi monao̒ mai wau muli momalakisao̒. Wonu umotupo boito moloo̒po,

^40-41 tio musi momalentao̒ alihu boboo-tuwaalo meeseli u ilotuhata lou̒ motupo boito bonggaliyolo wau ngoa̒amila meeseli towimbihu delomio hihiitalo. Hihiito taa̒apo lohihiito wau boboo-tuwaalo boito musi tapiloolo totambati tuwau unajisi to bulemengo kota.

⁴² Lapatao̒ boboo-tuwaalo u yilualao̒ boito musi tuloa̒alo wolo boboo-tuwaalo ubohu. Ngoilanggubu meeseli lobele boito musi woludelo wolo taa̒apo bohu.

⁴³ Wonu umotupo boito muli lumunetai, lebe-lebe pomao̒ boboo-tuwaalo lobele boito matiluloo̒ wau memee-seliilio mahilii̒ita wau luli tilaa̒apo,

⁴⁴ yi ti iimamu musi monao̒ mai wau muli momalakisao̒ bele boito. Wonu umotupo boito memangi moloo̒po yi bele boito najisi

⁴⁵ wau musi bonggaliyolo. Boboo-tuwaalo, aa̒a-yuwaalo wau ngoa̒amilalo taa̒apio musi deloolo ode tambati unajisi to bulemengo kota.

⁴⁶ Tou̒ dipo-dipoolu mai boli tatoonu tatumuwotao̒ ode delomo bele boito mowali najisi dilumutu dulahee tumolopaa mota.

⁴⁷ Titaalo tita tamo tuluhu meaalo molamela tobele boito musi mongulo pakeyangilio.

⁴⁸ Bo wonu ti iimamu monao̒ mai wau moduduo̒ u tiluletelio diilalo yilumenetai umotupo lapatao̒ bele boito luli tilaa̒apo, yi tio musi mopoi̒laalo mao̒ deu̒ bele boito belesi, sababu umotupo boito mailooli ngoa̒amilalo.

⁴⁹ Duo̒lo pomantaliyalo bele boito, ti iimamu musi mohama mao̒ bulungi duluo, ayu woohu, tali meela wau hisop ngopangge.

⁵⁰ Bulungi u tuwau musi olotolo toitaato ulongo utua-tuanga taluhu moolango monto butu lotaluhu.

⁵¹ Lapatao̒ ayu woohu, tali meela, hisop wau bulungi udonggo tumu-tumulo musi polomoolo todelomo duhu lobulungi umaa iloloto wau ode delomo taluhu u moolango. Lapatao̒ bele boito musi putatalio poo̒opitu.

^52-53 Bulungi udonggo tumu-tumulo musi huliaalio mota tohuta datahu wau luasi to bulemengo kota. Lou̒ odito ti iimamu mohutu mao̒ upacala pomantaliyalo lobele, wau bele boito mowali belesi.

⁵⁴ Ui-uitolo wuduu-uduwaalo pasali ngongoto lo alipo umoo̒ topotala,

^55-56 pasali lou̒ himunggu-munggula kekeei̒, ambalowuta meaalo hibonto-bontoa̒ lanta meaalo matango towawaao̒, wau pasali lo umotupo to pakeyangi meaalo bele.

⁵⁷ Wuwuu-uduwaalo boito hunalio u molantu mao̒ wolo u hitua-tuawua boito belesi meaalo najisi.