IMAAMATI 12 - KITABI HABARI MOPIOHE

Upacala pomantaliyalo taabua lapatao̒ lopotutu mai

¹ Eeya longohi odelei Musa wuwuu-uduwaalo botie

² ode bangusa lo Isirai̒lu. Wonu bolo taabua ngota mopotutu mai lowalao̒ talolai̒, yi ngotilonggadu pituhui mola taabua boito najisi, tutuuwauwa debo odelo tou̒ tio donggo duladulahu.

³ Todulahee u owalulio walai̒o musi tunaalo.

⁴ Lapatio mao̒ tolo pulaa tolo hui mola poli taabua boito donggo najisi sababu donggo hepobaa̒ta loduhu. Tio diila mowali modedeta babaa-langiyalo u pomake duo̒lo ibaadati wau diila mowali tumuwotao̒ ode Kema lo Eeya dilumutu wakutu pomantaliyalo olio yilapato.

⁵ Wonu bolo taabua ngota mopotutu mai lowalao̒ taabua, yi ngotilonggadu mopulaa wopahui mola taabua boito najisi, tutuuwauwa debo odelo tou̒ tio donggo duladulahu. Lapatio mao̒ wolomo pulaa wolonggui mola poli taabua boito donggo najisi sababu hepobaa̒ta loduhu.

⁶ Tou̒ yilapato wakutu pomantaliyalo olio, mopio kalana malo potutu mai lowalao̒ talolai̒ meaalo walao̒ taabua, yi taabua boito musi modelo mota dewo odeli iimamu totalu lohuhebu Kema lo Eeya. Dewo boito debo odelo walao̒ himba u ou̒umulu ngotaunu duo̒lo bake yilalango, wau bulungi poombo muda tuwau meaalo tarakuku muda duo̒lo pongambungualo dusa.

⁷ Ti iimamu musi mohudu mao̒ dewolio ode Eeya wau mohutu upacala u molulutao̒ unajisi lotaabua boito, tilinggula tio mowali belesi. Oditolio ui-uitolo u musi pohutuo mao̒ lotaabua ngota lapatao̒ tio mopotutu mai.

⁸ Wonu bolo taabua boito diila mambo mopo dapato walao̒ himba tuwau, tio musi modelo mota bulungi poombo muda duluo meaalo tarakuku muda: tuwau duo̒lo bake yilalango wau tuwau poli duo̒lo bake pongaambungualo dusa. Ti iimamu musi mohutu mao̒ upacala polulutalo onajisi lotaabua boito, yi tio mowali belesi.