HOSEA 7 - KITABI HABARI MOPIOHE

¹ Eeya lotahuda mai, “Timii̒du Wau̒ ohilaa mopoo̒luli mai umati-U̒ Isirai̒lu wau moponguli mao̒ owowoluwoa limongolio, yi u iloontonga-U̒ bo ololeeto wambai̒o wau dusa limongolio. Timongolio tinggai hemo hihiimbuloa, timongolio tumuwotao̒ ode bele lotau u motao̒, wau timongolio hemo lambata to dadaa-lalaala.

² Diila pee̒enta mao̒ leibayaheo̒ todelomo pikiilangi limongolio deu̒ Wau̒ mamoe̒ela mai totoonulalo ololeeto boito. Bo duduu-sawaalo limongolio lohenggube olimongolio tilinggula wolo lopatato iloontonga-U̒.”

Woomboa tobele biluloa̒ saaha li olongia

³ Eeya lotahuda mai, “Wolo hidala-dalaala yimbulo wau huhuu-hutuwaalo u moleeto ulipu hemo tolopani moposanangi hilaa li olongia wau tahidihima pantungo lo pamalenta.

⁴ Timongolio ngoa̒amila tamoo-hiyanatia wau taa udiila tatapu wau molotolo hilao. Olonui̒ mongolio debo odelo tulu todelomo tihengo udiila pilo hintalabu lo tamoohutua roti tou̒ diipo ulambohio watuwatu u lalangolo.

⁵ To dulahu potihunggu li olongia, timongolio helohutu li olongia wau tahidihima pantungo lo yilaidiaalio sanangi longilu angguru tunggula hiluwoa̒ wau lohutu susuu-aliyaalo u mohulodu. Pulitio mao̒ ti olongia helo tisana-sanangi wolo tahi pohiyanatia boito.

⁶ Debo odelo tulu todelomo tihengo odi-odieelo mola niyati moleeto wau oyiyingo limongolio hinta-hintalabu todelomo hilao ilo-iloonua, wau tou̒ dumodupo wali-walihuhu lowali lei̒ito tulu upolu-polutuo̒.

⁷ To delomo napusu lo oyiyingolio, timongolio helomate yila-yilateelo mao̒ mongo tau̒wa limongolio. Ngoa̒amila olongia limongolio mailopatea yila-yilateelo mao̒ tutuu-ntunga mola. Bo eleponu owowoluwoa malowali odito lobulilo, diaaluo penu boli ngotaa mao̒ tahe lodua̒ ode Olau̒ u lei̒tuulungi.”

Isirai̒lu wau babaa-ngusawalo

⁸ Eeya lotahuda mai, “Bangusa lo Isirai̒lu helo panggala wolo babaa-ngusawalo topalito limongolio, tilinggula timongolio lowali debo odelo roti u loontapo ngotuali.

⁹ Timongolio diila mongalati deu̒ tumbao̒ kalana helo panggala wolo babaa-ngusawalo boitolo, yilooli lomola olootoli mongolio. Pulito lo wungguli limongolio malembidei, bo diila otaawa limongolio.

¹⁰ Osombongi taulo Isirai̒lu oontonga wolo lopatato wau lowali bukuti totala limongolio. Eleponu ngoa̒amilalo boito malo toduo, timongolio debo diila mololohe ola-U̒ meaalo muli mohualingai ode Olau̒, Eeya Allahu Taa̒ala limongolio.

¹¹ Isirai̒lu odito mota odia mai debo odelo bulungi poombo u mohulodu. Bohu-bohulio tau-taulio lei̒tuulungi to Masiri, lapatao̒ timongolio tilumetea̒ ode Asyur!

¹² Bo timii̒du timongolio lumaodeo̒, Wau̒ mamolaalao̒ taalo wau moheu̒upa olimongolio debo odelo tau moheu̒upa bulungi. Wau̒ mamo hukuumani mai olimongolio sababu totoonulalo ololeeti mongolio umaa ilotaawa-U̒.

¹³ Tilopotala timongolio, sababu timongolio malo lolaa ola-U̒. Timongolio mamoa̒ntulu sababu malo luwali ola-U̒. Wau̒ ohilaa mopoa̒ahu olimongolio, bo ibaadati limongolio paaluti ngoa̒amilalo.

¹⁴ Timongolio diila tio̒otutua helodua̒ ode Olau̒. Wonu timongolio modua̒, timongolio hemo pomahulo batanga ode tambati potuluhelo, wau hemoyongo debo odelo u pilohutu lotau-tauwalo tadiila palacaya to Olau̒. Wonu timongolio modua̒ u mohile pale wau angguru, timongolio momali mao̒ batanga debo odelo u pilohutu lotau-tauwalo tahi polubowa dewa. Timongolio tio̒otutua moluwali ola-U̒!

¹⁵ Eleponu Wau̒ulo talo pou̒daa̒ mola wau lopoo̒ lotolao̒ olimongolio, bo timongolio lo woomboa loluwali ola-U̒.

¹⁶ Timongolio tulusi wambai̒o hemodudua̒ dedeewaalo usama-samaata diila okawasa wolo-wolo. Timongolio diila mowali palacayalo debo odelo buutio̒ u ilunggoyongo. Mongo tau̒wa limongolio hemo bisala wolo sombongi, sababu uito timongolio mapateelio wolo wamilo mate-mateelo mao̒, wau poi̒ii̒ya lotau-tauwalo Masiri.”