ESTERI 7 - KITABI HABARI MOPIOHE

¹ Yi u oluolio ti olongia wolei Haman helo lamelo wau longilu pee̒-pee̒enta woli Esteri.

² Sambela hemongilu angguru, ti olongia luli lohintu mao̒ oli Esteri, “Naa, polomaisuriu̒, wolo u otohilaamu? Poleleaalo mai! Tantuulo mao̒ mawohiu̒ mai eleponu u pohilemu ngotayadio lo yilaidiau̒.”

³ Tametao̒ li Esteri, “Wonu ti Baginda motuuhatawa, watotia momolohone mai alihu watotia wau bangusa lo watotia mowali tumumulo.

⁴ Sababu watotia wau bangusa lo watotia mapilotali u pateelio mate-mateelo mao̒. Humayaalio mongowatotia bo pilotali u lowali wato, yi watotia maa motipoo̒yo mao̒ wau diila tamomuyu oli Baginda. Bo botia mongowatotia mabinasaalio wau poo̒pulitolio!”

⁵ Lapatao̒ malohintu ti Olongia Ahasyweros odeli Olongia taabua Esteri, “Tatoonu tabuheli mohutu odito? Tou̒toonu taulio?”

⁶ Ti Esteri lolametao̒, “Tei Haman tamoleeto botieelo musu tamoo-ngalinayawa to mongowatotia!” Lou̒ madiluito daa̒ tei Haman lomiloheo̒ oli olongia woli ratu.

⁷ Ti olongia loingo daa̒, tulusi tilimihula mola wau lololaa mao̒ meja wau hua̒a yilumualao̒, ode ileengi lobunga lobele biluloa̒ li olongia. Ilotaawa lei Hamani deu̒ ti olongia malohama putusani u mohukumani olio, sababu uito tio debo woli Olongia taabua Esteri u lomolohone mao̒ alihu tio poa̒ahulo.

⁸ Lou̒ lotombodu tei Haman lopodehu batangalio toitaato heetule li Esteri helohile ambungu, bo lotuuhatawa to saaa̒tilo boito ti olongia luli lohualingai lonto ileengi lobunga lobele biluloa̒ li olongia. Yi loo̒onto olei Haman odito, ti olongia longiibodu, “Wolo? Debo donggo buheli olo yio̒ mopolokosa oli ratu tewe, totaluu̒ wau tobele biluloa̒ li olongiyau̒ lohihilao?” Lolamemeto lapatao̒ ti olongia loloi̒ya mao̒ odito, tahidihuma pantungo lipu lonao̒ mai wau lolau̒beo̒ lunggongee Haman.

⁹ Lapatao̒ ualei Harbon, ngotaalio lo tahidihuma pantungo lipu boito, “Baginda, totili lobele lei Haman woluo wolihi pontayangalo ngoilanggato dulo pulaa dulo meeteri. Tei Haman malo potihulao̒ wolihi boito u pontayangalo olei Mordekhai, taulo Yahudi tamalo poa̒ahu nyawa li Baginda.” Tulusi palenta mao̒ li olongia, “Ntayangaalo tei Haman to wolihi boito!”

¹⁰ Odi-odieelo mola tei Haman ntilayangio to wollihi u mapilo tihulio odelei Mordekhai. Bolo lapatio mao̒ uito yiloolelo mola muluka li olongia.