ESTERI 6 - KITABI HABARI MOPIOHE

Ti olongia helo hurumati olei Mordekhai

¹ Tou̒ hui boitolo ti olongia diila loo̒ tuluhu. Sababu uito tio lei̒hama mai buku cataatani sojara lo bele biluloa̒ saaha li olongia wau lei̒ pobaca mao̒ totau.

² To delomio ilodunggalio cataatani deu̒ tei Mordekhai malo poduloheo̒ ihitiyari u momate mate-mateelo mao̒ oli olongia u yiranjana lei Bigtan wolei Teres, taduulota tolomodu dihudihu pantungo tahemodaha huwali li olongia.

³ Ti olongia helohintu mao̒, “Polohurumati wolo u potuli mao̒ bule u mailohi odelei Mordekhai boito?” Tahi pomayawa lolametao̒, “Tio diila mololimo wolo-wolo.”

⁴ Lapatao̒ maloloi̒ya ti olongia, “Tatoonu talonto pogaweeu̒ tawoluo tobele biluloa̒ li olongia botia?” Letaahua tei Haman boheli tuotuotai ode paango lobele biluloa̒ li olongia; tio ohilaa mei̒ poluasi oli olongia u montayanga olei Mordekhai to wolihi pontayangalo u mapilopo tihulio mola boito.

⁵ Tahi pomayawa boito lolametao̒ odeli olongia, “Tei Haman woluo tobele biluloa̒ li olongia ohilaa mai motaalua woli Baginda.” “Pei̒ tuotilo mai tio,” uali olongia.

⁶ Tou̒ tei Haman tilumuotai, ti olongia maloloi̒ya mao̒ olio, “Woluo taa u mawohiyau̒ polohurumati daa̒. Wolo u mapohutuwou̒ mao̒ olio?” To pikiilangi mola lei Haman, “Malo tatoonu tamaa wohiyalo mao̒ polohurumati odito udaa̒lio? Tantuulo mao̒ wau̒!”

^7-8 Sababu uito tio lolametao̒, “Patutilio tau boito pei̒hama mao̒ pakeyangi odudaa̒ u biasaalio hepomake li Baginda lohihilao. Lapatao̒ wadala li Baginda polomuwalo lalaa-mbangiyaalo bele biluloa̒ saaha li olongia.

⁹ Ngotaalio lo tau̒daa̒ lolipu monto kaumu bangusa musi mopopake mao̒ pakeyangi boito totaa u ohilaa hurumatio li Baginda boito, lapatao̒ modelo pee̒-pee̒enta mopohelili mota tau boito wolo tae̒tae̒ to wadala li Baginda moli tanalapa lo kota. Tadudulaa̒ lolipu boito mamonao̒ to talulio sambela hitingalaa̒ meengahu, ‘Odi-odieelo mola ti olongia mongohi polohalaga totaa u hurumatiolio!’ ”

¹⁰ Lapatao̒ maloloi̒ya ti olongia odelei Haman, “Aliheo̒, hamaawa mao̒ pakeyangi wau wadala boito wau wohiyalo totoonulalo polohurumati boito odelei Mordekhai, taulo Yahudi boito. Pohutualo mao̒ debo odelo uiloi̒yamu engonti, lou̒ diila mopokuulangi penu boli tuwau mao̒. Tio mao̒dunggamu mota totalu lohuhebu hulubangi lobele biluloa̒ li olongia.”

¹¹ Lapatao̒ tei Hamani lohama pakeyangi wau wadala boito wau lopopake mao̒ pakeyangi boito odelei Mordekhai. Tou̒ tei Mordekhai lotitae̒ mola to wadala boito, tei Haman lodelo pee̒-pee̒enta lopehelili olio lolibaaya tanalapa lokota, sambela hiwengahe, “Bilohi, odi-odieelo mola ti olongia mongohi polohalaga totaa u hurumatiolio!”

¹² Lapatao̒ uito tei Mordekhai luli lohualinga mota ode huhebu hulubangi lobele biluloa̒ li olongia. Bo tei Haman bolo tametameo̒ lohualingo. Tio diila mohuto oontonga lotau sababu tio moolito daa̒, yi tilanggualio bayalio.

¹³ To dilelio wau ngoa̒amila mongo sahaabatilio tio helo hungguli mao̒ wolo u malo toduo mai olio. Lapatao̒ dilelio wau mongo sahaabatilio tamolinepo boito loloi̒ya mao̒ olio, “Yio̒ diila botie molotolo wolei Mordekhai. Tio taulo Yahudi wau yio̒ diila tamoo̒ tuwali olio. Tio tantu mamopo olaaheo̒ olemu.”

Tei Haman hulikumani mate

¹⁴ Tou̒ timongolio donggo bibiisalawa wolei Haman, tahidihuma pantungo lobele biluloa̒ li olongia lonao̒ mai wolo tame-tameo̒ ohilaa modepita mota olei Haman ode totamelo u pilohutu li Esteri.