ESTERI 5 - KITABI HABARI MOPIOHE

Ti Esteri helo loduo oli olongia wolei Haman ode totamelio

¹ To otolu dulahu lo puasaalio, ti Esteri lomake mao̒ pakeyangi liratulio, lapatao̒ lonao̒ ode paango delomo bele biluloa̒ li olongia wau timilihulao̒ totalu lohuhebu balairungi. Ti olongia donggo hulohuloa̒a toitaato bele biluloa̒ saaha li olongia talutalu ode huhebu boito.

² Tou̒ tio loo̒onto mao̒ oli Olongia taabua Esteri tihutihula to bulemengio, tio lolaasa lotolia̒ngo olio wau lohudu mao̒ tunggudio hulawa ode olio. Yi malo dudulai ti Esteri, tulusi lodedetao̒ huudu tunggudu boito.

³ Lapatao̒ malohintu ti olongia, “Hinta wolo, Polomaisruriu̒? Wolo u otohilaamu? Polelealo mai! Eleponu pohilemu ngotayadio lo yilaidiau̒, yi mawohiu̒ mai olemu olo.”

⁴ Ti Esteri lolametao̒, “Wonu ti Baginda motuuhatawa, patutilio tou̒ hui botie ti Baginda wolei Haman monao̒ mai ode totamelo u pohutuo mao̒ lo watotia odeli Baginda.”

⁵ Ti Olongia hua̒a lopoa̒hu olei Haman lonao̒ mai, alihu timongolio mowali mopoo̒polu mao̒ totoduo li Esteri. Yi malonao̒ mai timongolio ode totamelo u pilohutu li Esteri boito.

⁶ Tou̒ donggo hemongilu angguru, ti olongia lohintu mao̒, “Botia poleleaalo mai wolo u otohilaamu. Penu boli wolo u pohilemu mawohiu̒ mai, eleponu ngotayadio lo yialidiau̒!”

⁷ Ti Esteri lolametao̒,

⁸ “Wonu ti Baginda potaala motuuhatawa modungohe polohone lo watotia, patutilio ti Baginda wolei Haman muli monao̒ mai ode totamelo u pohuto mao̒ lo watotia loombu lou̒ hui. De to totamelo boito watotia mamoo̒owoli mai polohone lo watotia odeli Baginda.”

Tei Haman oniyati mamomate olei Mordekhai mate-mateelo mao̒

⁹ Tei Haman maa lohualingai lonto totamelo li Olongia taabua Esteri wolo hilaa u sanangi wau leengahu. Bo tou̒ to huhebu hulubangi lobele biluloa̒ li olongia tio loo̒onto olei Mordekhai diila tilimihula mola u longohi hurumati olio, oditolio tio maloingo daa̒.

¹⁰ Bo tio helo ngotonga batanga wau lohualinga ode belelio. Tou̒ leidungga mola odito tio helei̒ nao̒ mai tomongo sahaabatilio wau lohile mao̒ oli Jeres, dilelio, u lotihuloa̒a pee̒-pee̒enta woli mongolio.

¹¹ Lapatao̒ tei Haman helo tabibo olimongolio wau loposombongi okokayalio, daatalio lowalao̒ mongo lolai̒lio, huhuloa̒a upolohuna daa̒ u tilolimolio lonto li olongia, wau paanggatilio u lebe lailiao̒ wolo mongo pogawee wewo.

¹² Ualio mao̒ olo, “Tumbao̒ ti Olongia taabua Esteri poli bo moloduo olau̒ wau ti olongia ode totamelo u pilohutulio ode olami, wau loombu mola lou̒ hui ami tiloduolio.

¹³ Bo ngooa̒aa̒mila boito diila obolilio, ngotilonggadu donggo oo̒onto olau̒ tei Mordekhai, taulo Yahudi boito, hulohuloa̒a tohuhebu hulubangi lobele biluloa̒ li olongia.”

¹⁴ Loo̒dungohe uito dilebua wau ngoa̒amila mongo sahaabatilio helo nasehati mao̒ odie, “Pei̒ hutualo mao̒ wolihi pontayangalo ngoilanggato dulo pulaa dulo meeteri. Lapatao̒ loombulio mola, didimodupo pohileelo iijini toli olongia u montayangaao̒ olei Mordekhai to wolihu pontayangaalo boito. Lou̒ odito yio̒ moo̒ nao̒ mota ode totamelo boito wolo hilaa duo̒duo̒oto.” Nasehati boito mopiohe daa̒ modudua̒a huhama lei Haman, sababu uito tio hua̒a lei̒ hutu mao̒ wolihi pontayangaala boito.