ESTERI 3 - KITABI HABARI MOPIOHE

Tei Haman helohutu lanjana moleeto u mopobinasa taulo Yahudi

¹ Dengolo wakutu mola lapatio mao̒ ti Olongia Ahasyweros lomudua̒a ngotaalio taa tai̒lunte Haman lowali tau̒wa lo kabineti. Tei Haman yito walae̒e Hamedata lonto wali mai lei Agag.

² Ti olongia helo malentao̒ ngoa̒amila pogaweelio alihu mohurumati olei Haman wolo mosujudu totalulio. Ngoa̒amilalo helo dungohe palenta boito, ngopohia tei Mordekhai.

³ Mongo pogawee wewo tobele biluloa̒ li olongia helohintu mao̒ olio yilongola tio lolambanga palenta li olongia,

⁴ wau timii̒du dulahu timongolio helo huntula olio alihu moduduo̒ wambao̒, bo tio diila lohuto lodungohu. Ualio mao̒, “Wau̒ taulo Yahudi; wau̒ diila mowali mosujudu to manusia.” Lapatao̒ timongolio helo poduloheo̒ sua̒li boito odelei Haman sababu timongolio ohilaa motota mao̒ deu̒ huhutu wolo u mahamaalio to olei Mordekhai.

⁵ Tei Haman loingo daa̒ tou̒ lotota mao̒ deu̒ tei Mordekhai diila mohuto mosujudu to olio.

⁶ Wau tou̒ ilotaawalio deu̒ tei Mordekhai ngotaalio lo Yahudi, yi tio malohama putuusani u mohukumani olei Mordekhai wau diila bo tio wambao̒, bo mapobinasaalio olo ngoilanggubu bangusa lo Yahudi to bele biluloa̒ saaha li olongia lo Persia.

⁷ To taunu opulaa duluo pamalenta li Olongia Ahasyweros, to hulalo bohulio, deu̒yito-yito hulalo Nisani, tei Haman helei̒ pahuta undi u ilunte “purim” u motota mao̒ dulahu wau hulalo toonu u motuuhatawa poponao̒olo niyatilio u moleeta boito. Yi matilantulio mao̒ todulahu opulaa totolu wau hulalo opulaa duluo, deu̒yito-yito hulalo Adar.

⁸ Lapatao̒ tei Hamani maloloi̒ya odeli olongia, “Baginda, woluo bangusa deli tuwau u helo loo̒po to timii̒du polopinsi lo bele biluloa̒ saaha li olongia botie. Uu̒dulio hihiihede daa̒ wolo babaa-ngusawalo wewo. Timongolio boito diila modungohe totoonulalo butoo̒ lo bele biluloa̒ saaha li olongia. Oditolio, opiohelio ti Baginda diila mao̒ mopoluli olimongolio mohutu totoonulalo otohilaa limongolio.

⁹ Wonu ti Baginda diila o kabaraatani, paatutilio poluwala mota tuladu palenta u mopobinasa mao̒ olimongolio. Wonu ti Baginda mololimo hihiile lo watotia, yi watotia mamoo̒ potuotai lebe lou̒ tolo hetuto wopato pulu lolihu lo kiloharamu talaa̒ ode kasi li Baginda.”

¹⁰ Loo̒dungohe uito, ti olongia lomahutao̒ hua̒limo lonto tingongoalio upakepake olio u locapu mao̒ totoonulalo polomalalumu upidu-piduduto, lapatao̒ yiludulio odelei Haman, musu daa̒ bangusa lo Yahudi.

¹¹ Uali olongia mao̒ olio, “Bangusa boito wau olo doilio wuduwou̒ mai olemu. Pohutualo mao̒ wolo u oontongamu mopiohe toli mongolio.”

^12-13 Yi to todulahu opulaa totolu hulalo bohulio, tei Haman helo tiangai ngoa̒amila dulutuli li olongia. Timongolio hepilei̒ tuladelio tuladu tutuuu̒de wolo totoonulalo u pilomalentalio, tulusi tuladu boito tilohuwale todelomo ngoa̒amila bahasa wau yilami todelomo ngoa̒amila tuladu u hepomake to bele biluloa̒ saaha li olongia boito. Tuladee boito tiluladeo̒ to tangguli Olongia Ahasyweros wau cilapua wolo hua̒limolio, lapatao̒ hua̒a yilaolio ode tahi kawaasawa, tadudulaa̒ lo ulipu to ngoa̒amila polopinsi. Tuangio yito palenta deu̒ todulahu opulaa totolu hulalo Adar, ngoilanggubu bangusa lo Yahudi, mopio panggola meaalo humula, mopio mongobua meaambo tau̒ kekeei̒, musi pateelo mate-mateelo mao̒ lou̒ diila o aambungu, wau harata upango limongolio hamaalo.

¹⁴ Palenta boito musi pomalalumuolo to timii̒du polopinsi alihu ngoa̒amila tau malo tidapa-dapato to dulahe u matilantu mao̒ boito.

¹⁵ Tahe ahulaalo hua̒a lomonggato lodepita tutuu-ladeyaalo boito ode polopinsi lo bele biluloa̒ saaha li olongia. To poa̒hu mao̒ li olongia, palenta boito hepilo malalumu olo to Susan, tiilo lokota Persia. Lapatao̒ uito ti olongia wolei Haman malo tihuloa̒a sambela hemongilu angguru, bo tokota Susan mahi buluhutawa sababu habari boito.