ESRA 3 - KITABI HABARI MOPIOHE

Ibaadati luli tilumulalio

¹ To hulalo opitulio, tau-tauwalo Isirai̒lu malo titatapu to kotalio ngota-ngota. To bohulo dulahu tohulala boito timongolio lotia̒mbu to Yerusalemu,

² lapatao̒ tei Yesua walae̒e Yojadak wau mongo sahaabatilio mongo iimamu wolei Jerubabel walae̒e Sealtiel wau mongo ilaatolio, luli lomongu mesba Allahu Taa̒ala lo Isirai̒lu. Lou̒ odito timongolio lowali lomobu bake toitaatio, lotuuu̒de wolo totoonulalo potuhata utula-tuladu todelomo buku Butoe̒e Musa, wato lo Allahu Taa̒ala.

³ Eleponu timongolio moohe to ulipu tolipu boito, bo timongolio debo helomongu mao̒ mesba boito to tambatilio bohu-bohulio mai. Lapatao̒ timongolio lolumulao̒ luli helo podewo bake yilalango, tou̒ dimodupo wau lolaango.

⁴ Timongolio olo helo polame Dulahu Buka lo Wombohe Duungo, lotuuu̒de wolo wuu̒du; wau timii̒du dulahu hemopodewo bake u matilantu mao̒ duo̒lo dulahe boito.

⁵ Wewolio mao̒ leeto timongolio lou̒ aa̒atulu hemopodewo bake yilalango wau bake to Dulahu Buka Hulala Bohu, wau to ngoa̒amila dulahu buka wewo upilopo woluo u molubo to Eeya. Timongolio olo helo podewo dewo iloheela lohilao to Eeya.

⁶ Eleponu Bele lo Eeya diipo tilumula bilongulio mola poli, bo tobohulo dulahu tohulalo opitulio ulipu malo lumula helomobu bake ode Eeya.

Pomongulalo Bele lo Eeya tilumula

⁷ Ulipu helo dembulo doi u powuupaalo pani lobotu wau pani lo ayu. Timongolio olo he lolao u aalo wau u yilumoolo wau winulo jaitun ode kokoo-tawaalo Tirus wau Sidon u tuloa̒alo wolo ayu woohu lo Libanon lonto kokoo-tawaalo boito. Ayu boito he dilelio ode Yapo loli deheeto. Ngoa̒amila boito hekilaraja lo ulipu to iijini lei Kores, olongia lo Persia.

⁸ Yi tohulalo oluolio, todelomo taunu oluolio tou̒ Isirai̒lu lohualingai ode Yerusalemu, maluli tilumula mola limongolio lomongu Bele lo Eeya. Tei Jerubabel, Yesua wau mongo sahaabati limongolio ngobangusa, mongo iimamu, taulo Lewi, limbui̒o mao̒, ngoa̒amila taa bakasi polayahu, helo dudua̒ lokalaja. Tau-tauwalo Lewi tao̒ umulu dulo pulu lotaunu odeitaato tilunulio mao̒ longimato kalaja pomongulalo Bele lo Eeya boito.

⁹ Yi tei Yesua, taulo Lewi boito, wolo mongo walai̒o wau mongo wutatio wau olo tei Kadmiel wolo mongo walai̒o (Kaumu lei Hodawya) pee̒-pee̒enta helo ngimato mao̒ kalaja pomongulalo Bele lo Eeya boito. Timongolio hebilantua taulo Lewi lonto kaumu Henadad.

¹⁰ Tou̒ tahi pokalajawa hudungu lolumula lomayangao̒ pundasi Bele lo Eeya, mongo iimamu helomake jumba wau wolo hidihuma toroompeti helohama tambati ngota-ngota. Tau-tauwalo Lewi lonto kaumu Asap olo hitihula teto wolo hidihuma toongi kekeei̒. Timongolio helomuji-muji mola to Eeya lo tuuu̒de wolo wuu̒du u matilantu mao̒ tumulalo mai maasa li Olongia Dauda.

¹¹ Ulipu hipomuji-mujia mola to Eeya, sambela hiponguli-ngulia mola tayadio u pulitio, odie mola tingohio, “Eeya boito mopiohu; ponu-Lio ode Isirai̒lu kakaali diilo opulitio.” Ngoilanggubu u lipu lodudua̒ lotingalaa̒a mola leengahe wau helomuji Eeya, sababu pundasi Bele lo Eeya mapilayango.

¹² Dadaata to wolota lomongo iimamu, tau-tauwalo Lewi wau mongo lokaumu tau̒umurulio mapanggola pee̒enta loo̒onto Bele lo Eeya u muloololio mai. Tou̒ timongolio helo sakusi mao̒ pilomayango pundasi Bele lo Eeya u utie, yi mahilumoyongo timongolio wolo suala daa̒-daa̒alo mao̒. Bo tau-tauwalo wewo tawoluo teto bolo hitingalaa̒awa mola hiweengahe,

¹³ tilinggula diilalo iloo pohiihedi mongolio wolota tingalaa̒ hiweengahe wau hehiyonga. Tingohio malo odito huu̒lio, tilinggula ilodungohe demola u molamingo.