EPESUS 3 - KITABI HABARI MOPIOHE

Kalaja lei Paulus ode taa diila Yahudi

¹ Uito sababuulio watia, Paulus, tilutupalio sababu ti Isa Almasi ode polohuna daa̒ limongoli tadiila taulo Yahudi.

² Tantu timongoli maloo̒ dungohe deu̒ Allahu Taa̒ala, sababu opopiohu hilaa-Lio, malongohi mai olaatia tuugasi botie domi polohuna daa̒ limongoli.

³ Allahu Taa̒ala lomuo̒ hitua-tuawua u milakusudu hetuuo̒lo lanjana-Lio wau piloo̒taa-Lio mai olaatia. (Tomimbihu sua̒li botie matiluladei lowatia toitaato wolo limbu-limbuo̒,

⁴ wau wonu timongoli mopobaca mao̒, timongoli mamongalati hitua-tuawua u milakusudu hetuuo̒lo tomimbihu li Almasi debo odelo watia longalati mao̒).

⁵ Muloololio mai hitua-tuawua u milakusudu hetuuo̒lo boito diila pee̒enta mao̒ piloo̒taa tomanusia, bo botia Rohullah malopo ilaalo mai tomongo rasulu wau mongo nabi-Lio.

⁶ Hitua-tuawua u milakusudu hetuuo̒lo boito yito utie: motimbulude to Habari Mopiohe boito, tadiila taulo Yahudi modudua̒ moo̒laasa totoonulalo balakati lo Allahu Taa̒ala u muloololio mai pilohetu bo ode taulo Yahudi. Tau-tauwalo diila taulo Yahudi malowali pongawaa̒ lobatanga u tutuuwauwa, wau lodudua̒ lololimo wolo upilo danti mai lo Allahu Taa̒ala lotimbulude li Isa Almasi.

⁷ Allahu Taa̒ala longohi mai olaatia ponu – deu̒ito-yito tuugasi – u mopololadu Habari Mopiohe boito. Tilolimo lowatia ponu boito lotimbulude tokawasa lo Allahu Taa̒ala u kalakalaja todelomo batanga lowatia.

⁸ Towolota lou̒ ngoa̒amila umati lo Allahu Taa̒ala, wawaatiyalo talaba-labaalo hina. Bo penu odito Allahu Taa̒ala longohi mai olaatia ponu botie: tuugasi u mopohabari totau-tauwalo tadiila taulo Yahudi Habari Mopiohe tomimbihu okokaya li Almasi udiila opulitio;

⁹ wau olo alihu motimbuludei olaatia ngoa̒amila tau motota mao̒ woloolo mola Allahu Taa̒ala, Talopowali ngoilanggubu aalamu botie, moponao̒ lanjana-Lio u anggadu muloololio mai daa̒ hitua-tuawua u milakusudu hetuuo̒lo duo̒lo dunia.

¹⁰ Makusudu lo Allahu Taa̒ala yito alihu botia, motimbuludei tojamaa̒, ngoa̒amila tahidihima kawasa todulente motota otinepo Allahu Taa̒ala todelomo tilolahepe modeliilio.

¹¹ Allahu Taa̒ala lohutu mai uito lotuuu̒de wolo lanjana-Lio u ohiheo-hiheolo mao̒, upilo ponao̒-Lio lotimbulude li Isa Almasi Eeyanto.

¹² Lou̒ palacaya li Almasi wau sababu lotituwau wo-Lio ito loo̒tapu ololopato u motahude Allahu Taa̒ala wolo opopalacaya lealeaatulo mao̒.

¹³ Sababu uito, hihiile lowatia yito: diila mao̒ polawalo tomimbihu wolo u dilutola lowatia sababu timongoli, sababu ngoa̒amilalo boito yito duo̒lo opopiohu limongoli.

Ponu li Almasi

¹⁴ Masababu uitolo watia loti bonggohuu̒ mola totalu li Paapa.

¹⁵ Monto o-Lioolo timii̒du ngaalaa̒ tosologa wau todunia mololimo tolomodu pii̒lii-Lio.

¹⁶ Watia modua̒ mola bolo potala Allahu Taa̒ala talaba-labaalo lailaio̒ motuhatawa u mopoo̒ lotolo hilaa limongoli wolo Rohu-Lio.

¹⁷ Pohileaalo dua̒ sababu timongoli palacaya li Almasi, ti Almasi motibiluloa̒ todelomo hilaa limongoli, wau tutumuli mongoli pilopo daasali wau kiluwasa lo tolia̒ngo.

¹⁸ Watia mohile dua̒ bolo potala pee̒-pee̒enta wolo ngoa̒amila umati lo Allahu Taa̒ala, timongoli moo̒ tonea̒a deu̒ donggo boli luasilio wau hayai̒o wau langgatio wau delomio ponu li Almasi, u wolo aakali lomanusia diila opahamua modelo-delomolo mao̒.

¹⁹ Pohileaala dua̒ timongoli motota ponu li Almasi boito, tilinggula timongoli mopolu lopii̒li lo Allahu Taa̒ala u ngoa̒amilalo wimu-wimumuto.

²⁰ Wolo kawasa lo Allahu Taa̒ala u moo̒lohe mokalaja todelomo batanganto, Allahu Taa̒ala mowali mohutu mai lebe dadaata daa̒ lou̒ wolo umowali pohilento mola meaalo pikiiliyolo.

²¹ Wajibulio Allahu Taa̒ala polaio̒olo wawaalia mola todelomo jamaa̒, motimbulude li Isa Almasi. Ilopujialo mola Allahu Taa̒ala ohiheo-hiheolo mao̒! Amin.