BOHULO SEMUEL 9 - KITABI HABARI MOPIOHE

Tei Saul lodunggaya wolei Semuel

¹ Woluo ngotaalio takaya wau otilihula lonto suku Benyamin, tanggulio tei Kish. Tio pongawaa̒ ngaalaa̒ lei Bekhorat, tilitangoa lo maraga lei Apiah. Tiyamolio tei Abiel wau tinenelio ti Jeror.

² Tei Kish owalao̒ talolai̒, tanggulio Saul, tabohulotau ngota gaaga boli molotolo. Diaaluo penu boli ngotaa mao̒ to Isirai̒lu talebe gaaga wolio. Wawai̒o olo lebe molanggato; ratarata taulo Isirai̒lu langgatio bo tunggula to binggungio.

³ Tou̒ dulahee tuwau dengolo kolodai haku lei Kish yilooli. Sababu uito malo loi̒ya tei Kish odelei Saul, “Delowalo mota tala ngota lowato, wau lolohe mai kokoo-lodaiyalo boito.”

⁴ Lapatao̒ tei Saul wau watolio helo lontale lipu hihui̒-hui̒dea lo Epraim wau huta Salisa, bo diila loo̒dungga bibii-natangiyalo boito. Lapatao̒ timongolio lonao̒ tulusi ode huta lo Sahalim, bo kokoo-lodaiyalo boito diaaluo olo mota teto. Timongolio malo lolohe olo tomadala lei Benyamin, bo debo diila ilohunalio.

⁵ Tou̒ timongolio leidungga mota tohuta lo Jup, tei Saul loloi̒ya mao̒ ode watolio, “Dulo ito mohualingolo, diila bolo tipaapa lebe molawalo hemo mikiilangi olanto wolo kokoo-lodaiyalo boito.”

⁶ Wato boito lolametao̒, “Wolaatipo! To kota botie woluo wato ngota lo Allahu Taa̒ala. Tio hepasisia daa̒ lotau sababu wolo u heloi̒yaalio laito otu-otutuulo mao̒ motoduo mai. Dulo ito monao̒ mota ode olio, otanu tio mowali mopoo̒taa mai tou̒toonu kokoo-lodaiyalo boito.”

⁷ Ualei Saul mao̒, “Wonu ito monao̒ mota modunggaya wolio, wolo u mawohinto olio? Tomeu̒ u dilelonto mai malo pulito, wau ito diilalo owolo-wolo u wohinto mao̒ ode wato lo Allahu Taa̒ala boito, diila odito?”

⁸ Wato boito lolametao̒, “Letaahua donggo woluo to olaatia doi talaa̒ ngopita. Uito mawohi mao̒ lowatia ode wato lo Allahu Taa̒ala boito alihu tio mohuto mopoo̒taa mai olanto tou̒toonu kokoo-lodaiyalo boito.”

^9-11 “Ooo̒!” Tametao̒ lei Saul, “Duloolo ito monao̒.” Lapatao̒ malonao̒lo timongolio ode kota, ode tambati lowato Allahu Taa̒ala boito. Tou̒ timongolio lotao̒de mola huludu u duludulunga ode kota boito, timongolio malo dunggaya wolo dengolo lota mongo dulahu u mamolime taluhee to ali. Lapatao̒ timongolio malohintu tomongo dulahu boito, “Wolo woluo tamoomilohe to kota?” (To jamani boito ngotaalio lo nabi heu̒nteelio tamoomilohe, oditolio wonu bolo ngotaalio ohilaa mohintu u hitua-tuawua ode Allahu Taa̒ala, yi tio moloi̒ya mao̒ odie, “Duloolo ito monao̒ mota ode tamoomilohe.”)

^12-13 “Saaya, woluo,” tametao̒ lomongo dulahu boito, “tio boheli lopaluta mota leimulo woli mongoli. Wonu timongoli loa̒lihei, tanu otunuhe mota limongoli tio. Tio boheli leidungga mai ode kota sababu todulahee botie toitaato mesba to huludu woluo dewo lobake ode ulipu. Tahe tiloduo diila tamolamela tou̒ tio diipo meidungga mai, sababu tio musi mobalakati mao̒ bake boito meimulo. Wonu timongoli monao̒ mota botia, timongoli mamoo̒ dungga olio tou̒ tio diipo motao̒de huludu mola molamelo.”

¹⁴ Oditolio tei Saul wau watolio malonao̒ ode kota, wau tou̒ timongolio tilumuwotao̒ huhebu hulubangi, timongolio lolaawode wolei Semuel tadonggo duludulunga ode tambati potabiyalo to huludu.

¹⁵ Tutuulio tutu ngohui tou̒ dipo-dipolulio uito Eeya longohi mai tahuli odelei Semuel odie,

¹⁶ “Loombu dimodupo tanu tou̒ wakutu odie, Wau̒ mamopoa̒hu mai ngotaalio monto suku Benyamin mai modunggaya wolemu. Pudua̒alo mao̒ tio wolo upacala wilinulaa u mowali olongia to umati-U̒ Isirai̒lu. Tio mamopoa̒ahu umati-U̒ monto taulo Pilistin. Wau̒ maloo̒onto mai polodutolo umati-U̒ wau lodungohe hihiiyongi mongolio mei̒ tuulungi.”

¹⁷ Tou̒ tei Semuel loo̒onto mao̒ olei Saul, Eeya lotahuda mai olio, “Uti-utieelo taa u tilanggulu-U̒ mai olemu boito. Tio mamo malenta umati-U̒.”

¹⁸ Sambela uito tei Saul lohimbideo̒ olei Semuel totili lohuhebu hulubangi, wau lohintu mao̒, “Bolo maa̒apu Paaa̒, tou̒toonu bele lo tamoomilohe boito?”

¹⁹ Tei Semuel lolametao̒, “Wau̒lo tamoomilohe boito. Ponao̒lo mota meimulo wolaau̒ ode tambati potabiyalo tohuludu, sababu todulahee botie timongoli mamolamela wolaau̒. De loombu mola didimodupo ngoa̒amila u yilintumu boito matametau̒ mai, lapatao̒ uito timongoli bolo mowali mohualingo.

²⁰ Pasali lo kokoo-lodaimu uilooli tolo hui yilaalu mao̒ boito, diila mao̒ polawalo, sababu maa ilodungga. Odito olo, u ohalaga daa̒ to ngoilanggubu lo Isirai̒lu mawohilio mai olemu wau ode ngaalaa̒ liyamamu.”

²¹ Tei Saul lolametao̒, “Watia botie lonto suku Benyamin, suku u mailaba ngoi̒dilio to Isirai̒lu, wau olo ngaalaa̒ lowatia malo diila botie oboliilio todelomo suku boito. Oditolio yilongola ti Paaa̒ loloi̒ya odito olaatia?”

²² Lapatao̒ tei Semuel loheinga olei Saul wau tamoomayawa olio tilumuwota ode delomo huwali uleidaa̒, tulusi tio longohi mao̒ tambati ulaba-labaalo mopiohu ode limongolio totalu lotahe tiloduo u jumulaalio otanu tolopulu lota.

²³ Wumbutio mola tei Semuel loloi̒ya mao̒ ode taa u kalajaalio motubu, “Pohintawa mao̒ tapu u engentie pilohangatuu̒ mai olemu boito.”

²⁴ Lapatao̒ taa u kalajaalio motubu boito lohama mai tayadu tilulaoto lonto tapu lo bungolopa, lapatao̒ pilohintalio odelei Saul. Tei Semuel loloi̒ya mao̒, “Uite tayadu u pilopo wiwiu̒ mao olemu alihu mowali tamelomu to saa̒ati botie pee̒-pee̒nta wolo tahe tiloduo wewo. Toduwolo molamelo.” Lapatao̒ malo lamela tei Saul. Oditolio todulahee boito tei Saul lolamelo pee̒-pee̒enta wolei Semuel.

²⁵ Lapatao̒ uito timongolio lolaahe mola lonto tambati lo ibaadati boito wau tilumuwota ode kota. Tei Saul yilohialio tambati potuluhelo,

²⁶ lapatao̒ tio lotuluhu. Tou̒ madulahei, tei Semuel lotiangao̒ olei Saul uwoluo toitaato pahu boito, wau loloi̒ya mao̒, “Pobongulo, dulo madepitou̒ mai yio̒ monao̒.” Yi malobongu tei Saul, tulusi lomonggato pee̒-pee̒enta wolei Semuel.

Tei Saul piludui̒o lowali olongia lei Semuel

²⁷ Tou̒ timongolio leidungga mota tobiihu kota, malo loi̒ya tei Semuel odelei Saul, “Ahuli mota wato boito monao̒ meimulo wolanto.” Lapatao̒ malonao̒ wato boito, wau tei Semuel luli loloi̒ya mao̒, “Pohuhelipo tewe ngopee̒ mola, wau̒ mamo poo̒taa mai tahuli lo Allahu Taa̒ala ode olemu.”