BOHULO SEMUEL 8 - KITABI HABARI MOPIOHE

Umati lo Isirai̒lu helohile ngotaalio li olongia

¹ Tou̒ tei Semuel mapanggola mola, tio helo muduo̒ mongo walai̒o lowali hakimu to Isirai̒lu.

² Walai̒o tamohuhula daa̒ tai̒lunte Yoel wau tao̒luolio Abia. Timongolio lowali hakimu to Bersyeba.

³ Bo timongolio diila loo̒dudua̒ pii̒li liyamo limongolio, bo hemo hilapita pae̒eda lobatanga limongolio lohihilao wambai̒o. Timongolio hemo lolimo doi palele wau hemomutoo̒ ulipu lou̒ diila aadili.

⁴ Sababu uito ngoa̒amila tau̒wa lo Isirai̒lu malo tia̒mbu, lapatao̒ mola lotaalua wolei Semuel to Rama,

⁵ wau loloi̒ya mao̒ olio, “Dungohilo mai Paaa̒, ti Paaa̒ mapanggola wau mongo walai̒ Paaa̒ diaaluo talo dudua̒ pii̒li li Paaa̒. Oditolio opiohelio ti Paaa̒ momuduo̒ ngotaalio li olongia alihu amiaatia o olongia debo odelo babaa-ngusawalo wewo.”

⁶ Bo tei Semuel diila sanangi wolo potuhata limongolio boito. Lapatao̒ tio malodua̒ mola ode Eeya,

⁷ wau Eeya lotahuda mai, “Tolimowalo totoonulalo hihiile bangusa boito to olemu. Sababu diila yio̒ tapilotouli limongolio, bo Wau̒. Timongolio diilalo mokahandaki ola-U̒ odelo olongia limongolio.

⁸ Anggadu Wau̒ lodelo olimongolio yilumualai lonto Masiri, timongolio helo palingo lonto ola-U̒ wau helolubo dedeewaalo, wau wolo umasaatia pilohutulio olemu, ui-uitolo u mapilohutu limongolio ola-U̒.

⁹ Sababu uito wohiyalo mao̒ hihiile limongolio; bo poe̒ela mao̒ tio̒otutua timongolio, wau poo̒taa mao̒ demaa woloolo mola pohutu mai li olongia olimongolio.”

¹⁰ Totoonulalo tahuda lo Eeya boito pilopo tunggulao̒ lei Semuel ode tau-tauwalo tahe mohile ngotaalio li olongia to olio, ualio mao̒,

¹¹ “Demaa odieelo mola ti olongiyamu mopohutu mao̒ limongoli,” oditoliolo mola tei Semuel latombangao̒, “Tio mamo makusa mongo walau̒mu tumuwoto suludadu; ngotayadi mongolio odelo pasuukani tokaleta, ngotayadio odelo pasuukani towadala, wau tawewolio odelo pasuukani tolimbuta.

¹² Ngotayadu bilintai̒o lowali polowila ode tangolihu lota. Ti olongia boito mamo makusa mongo walau̒mu momadeo̒ halabolulio, mohimoa̒ tilapulo sembolio, mohutu titii-ngoloolio wau pakaakasi lokaleta popaatealio.

¹³ Mongo walau̒mu taabua mapei̒ hutualio winulo moonu olio wau mokalaja odelo tamootubua olio wau tamoohutua rotilio.

¹⁴ Tio mamohama halabolumu, ilengi lo anggurumu, wau ilengi lo jaitunimu ulaba-labalo mopiohu wau wohilio ode mongo pogaweelio.

¹⁵ Halabolu wau ilengi lo anggurumu mao̒tuhata lobeya ngotayade mopulu monto tilapulio, lapatao̒ mawohilio ode mongo polowila wau mongo pogaweelio.

¹⁶ Tio mamohama watomu, bibiyahumu ulaba-labalo mopiohu wau kolodaimu wau pomakelio ode kalajaalio.

¹⁷ Ngotayde mopulu monto himbala batade wau himbamu mahamaalio. Wau timongoli lohihilao mamowali watolio.

¹⁸ Wonu masa boito malei dungga mamolapali totoonulao u tilumoodu sababu osuusa hilaa limongoli sababu olongia tatilulaoti mongoli boito, bo Eeya diila ohilaa modungohe hihiilemu.”

¹⁹ Bo bangusa boito diila mohuto momandungi loi̒ya lei Semuel, tumbao̒ timongolio loloi̒ya, “Huliilo mao̒! Penu boli wolo umowali wambai̒o amiaatia motohilaa olongia.

²⁰ Otohilaa lamiaatia debo odelo bangusa wewo, olongia lamiaatia musi momalenta olamiaatia wau modelo olamiaatia ode popaatea.”

²¹ Tou̒ tei Semuel loo̒dungohu ngoa̒amila loi̒ya limongolio boito, pilopo tunggulio loi̒ya boito ode Eeya.

²² Yi Eeya lolameto, “Dudui̒ mao̒ otohilaa limongolio wau pudui̒lo ngotaalio li olongia ode limongolio.” Lapatao̒ ilahula mota lei Semuel tau-tauwalo Isirai̒lu boito lohualingo ngota-ngota ode belelio.