BOHULO SEMUEL 7 - KITABI HABARI MOPIOHE

¹ Yi tuwango lipu lo Kiryat-Yearim lohama Bulua Daantia lo Eeya boito lapatao̒ dilelolio ode delomo bele lotau tai̒lunte Abinadab; bele boito mola toitaato huludu. Lapatao̒ tilahabisi mao̒ limongolio tei Eleazar walae̒e Abinadab, u modaha Bulua Daantia boito.

Tei Semuel helo malenta Isirai̒lu

² Lohiheo mola olo Bulua Daantia lo Eeya boito tolatola to Kiryat-Yearim, tanu dulopulu lotaunu. Ngotilonggadu uito ngoilanggubu umati lo Isirai̒lu helo ngiibodu mola to Eeya lei̒ tulungi.

³ Lapatao̒ malo loi̒ya tei Semuel ode umati lo Isirai̒lu, “Wonu timongoli ohilaa mohuwalingo ode Eeya wau molubo o-Lio wolo lea-leaatu lohilaamu, mamusi timongoli mohinggi ngoa̒amila dewa deli wau bui̒ Dewi Asytoret. Wuduwalo mola batangamu sama-samata ode Eeya wau taa̒luku boli pasisi o-Lio wambao̒, yi timongoli mabebasia-Lio monto taulo Filistin.”

⁴ Oditolio taulo Isirai̒lu malo hinggi ngoa̒amila Bui̒ Baal wau bui̒ Dewi Asytoret, turusi bo lomaya to Eeya wambao̒.

⁵ Lapatao̒ uito malo loi̒ya tei Semuel, “Ambuwa mao̒ ngoa̒amila bangusa lo Isirai̒lu to Mispa, yi wau̒ mamodua̒ mola to Eeya odeli mongoli.”

⁶ Lapatao̒ malo ambuwa timongolio ngoa̒amila to Mispa. Timongolio helo luuntu taluhu tulusi loluangao̒ odelo podewo ode Eeya, lapatao̒ timongolio lopuasa ngohilayao̒ dulahee boito. Uali mongolio, “Amiaatia mailodusa to Eeya.” (To Mispa boito tei Semuel malo poo̒lapato ngoa̒amila palakala hulinggila taulo Isirai̒lu.)

⁷ Tou̒ taulo Pilistini loo̒dungohu deu̒ taulo Isirailu malo tia̒mbu to Mispa, olimo olongia lo Pilistini lomonggato mola odito wolo suludadu limongolio u loluhu taulo Isirai̒lu. Taulo Isirai̒lu loo̒dungohe sua̒li boito turusi mailoohe.

⁸ Uali mongolio odelei Semueli, “Diila mao̒ pohuheli modua̒ mola ode Eeya Allahu Taa̒alanto alihu ito poa̒ahuo-Lio mai monto taulo Pilistini.”

⁹ Sababu uito tei Semueli longolotao̒ tuwau himba buboto, turusi lopodewo odelo bake yilalango ode Eeya. Lapatao̒ uito tio lodua̒ mola alihu Eeya motulungi mai taulo Isirai̒lu, wau dua̒lio boito dilungohe-Lio.

¹⁰ Tou̒ tei Semueli donggo hemopodewo bake yilalango boito, taulo Pilistini maloluhu; bo pasipasi to saaa̒ti boito Eeya loti bulonggodu mai lonto hulungo toitaati mongolio. Timongolio malowali lopupuyoto daa turusi tilumeteo̒ hilingua.

¹¹ Suludadu lo Isirai̒lu yilumualai lonto Mispa turusi helo hilapita taulo Pilistini boito ngopee̒ ngoilaminga Bet-Kar, wau helo ngantulu olimongolio.

¹² Lapatao̒ uito tei Semuel lopo tihulao̒ botu ngobotu, to sipatana lo Mispa wau Sen. Tio loloi̒ya, “Eeya malo tulungi mai olanto lealeaatulo mao̒.” – Lapatao̒ botu boito iluntelio “Botu Polotulungi.”

¹³ Odieelo mola taulo Pilistin ilolaahelio. Eeya diilalo lopoluasi olimongolio tumuwota ode madala lo Isirai̒lu, ngotilonggadu tei Semuel donggo tumu-tumulo.

¹⁴ Ngoa̒amila kota lo Isirai̒lu u matilaa̒-lukulio lotau Pilistin, tumulalo mao̒ lonto Ekron demola Gat, luli pilowalingio ode Isirai̒lu. Oditolio taulo Isirai̒lu luli loo̒tapu mai ngoa̒amila madalalio. Taulo Isirai̒lu wau taulo Kanaa̒n hitumula wolo dame olo.

¹⁵ Tei Semuel helo malenta Isirai̒lu ngotupa lo tutumulio.

¹⁶ Timii̒du taunu tio molontale hemomalita ode Betel, Gilgal, wau Mispa. Wau to tataa-mbatiyalo boito tio helo poo̒lapato papaa-lakalaalo hulinggila.

¹⁷ Laito lapatio mao̒ uito tio hemo hualinga mola ode belelio to Rama. Mola teto tio lowali hakimu taulo Isirai̒lu wau helo potihulao̒ mesba tuwau ode Eeya.