BOHULO SEMUEL 6 - KITABI HABARI MOPIOHE

Bulua Daantia luli pilowalingio

¹ Tou̒ Bulua Daantia lo Eeya woluo to Pilistin pitu lohula mola hiheolio,

² taulo Pilistin helo tiangao̒ mongo iimamu wau tamoo-sihiria tulusi helohintu mao̒, “Mamusi pongolanto Bulua Daantia lo Eeya boito? Wonu muli powalingonto ode tambatilio, woloolo mola dudelolio?”

³ Lapatao̒ tametao̒ limongolio, “Bulua Daantia Allahu Taa̒ala lo Isirai̒lu boito diila mao̒ powalingonto bo odito wambai̒o, bo musi tunuhela lo paraseni u potolotalo dusa limongoli. Lou̒ odito timongoli mapoo̒luli lo Eeya, wau demaa otaawa mao̒ limongoli yilongola Allahu Taa̒ala lo Isirai̒lu boito mololaalaaita hemo hukuumani mai olimongoli.”

⁴ “Tolotaa wolo u musi wohinto o-Lio?” yilintu mao̒ lotau-tauwala boito. Tametao̒ lomongo iimamu boito, “Limo lobongga hulawa wau limo udu hulawa, tutuuu̒de wolo jumulaa olongia lo Pilistin. Diila mabaala debo odelo himunggu-munggula wau udu boitolo olo u malolemba mai olimongoli ngoa̒amila, mopio ulipu meaambo olongia?

⁵ Oditolio, timongoli musi mohutu mao̒ tiruuwani monto himunggu-munggula wau monto udu u donggo hemongamo to lipumu. Lou̒ odito timongoli mongohi hurumati ode Allahu Taa̒ala lo Isirai̒lu. Otanu Tio mamohuheli mohukuumani mai olimongoli, wau dedee-waalo wau huta limongoli.

⁶ Wolo hunalio timongoli motibaaa̒ngi debo odelo olongia wau taulo Masiri muloololio mai? Diila mao̒ lipata woloolo mola Allahu Taa̒ala helopoi-poitohei olimongolio, tilinguula timongolio loliliihu wau taulo Isirai̒lu boito piloluli limongolio lololaa mao̒ Masiri.

⁷ Sababu uito, podapato mao̒ goloba tuwau u bohu wolo sapi mohelu duluo u donggo hemolutu, wau diipo pee̒enta mao̒ pilomake helo dedea̒ goloba, wau muli deloa mota mongo walao̒ sapi boito ode delomo lantunga.

⁸ Lapatao̒, hamaawa mao̒ Bulua Daantia lo Eeya, potae̒ya mola ode yitaato goloba, wau podutua mao̒ to ambahu kasi u hetuanga upango hulawa u musi podewo limongoli o-Lio odelo potoloto dusa limongoli. Polulia mao̒ goloba wau sapi boito monao̒ wolo hilaalio.

⁹ Poo̒tuota mao̒ dalalio; wonu Bulua Daantia boito deloolio ode mantahu lipulio lohihilao, deu̒yito-yito kota Bet-Semes, uito boliilio deu̒ Allahu Taa̒ala taulo Isirai̒lulo tamalo podungga mai baala ulaba-labaalo boito ode olanto. Bo wonu goloba boito diila motidulunga mola odito, yi maa otaawanto deu̒ musiba boito diila monto Allahu Taa̒ala lo Isirai̒lu, bo lolaahunga mai wambai̒o.”

¹⁰ Tau-tauwala boito helo dudua̒ao̒; timongolio malohama sapi mohelu duluo u donggo hemolutu, tulusi pilohulilio togoloba, hiambola mongo walao̒ sapi boito ilulungio todelomo lantunga.

¹¹ Lapatao̒ Bulua Daantia boito pilopotae̒lio mola ode yitaato goloba, wau olo kasi u hetuanga udu hulawa wau tiruuwani u himunggu-munggula boito.

¹² Sasaa-piyaalo boito lato lonao̒ ode mantahu Bet-Semes; binatangi boito mbolo-mboloo̒ sambela hinao̒wa tulusi, diila helo basepi ode oloihi meaalo ode olowala lonto dalala daa̒. Olimo lota olongia lo Pilistin helo duduo̒ tulusi demola sipatana lo Bet-Semes.

¹³ Tou̒ boito ulipu lo Bet-Semes donggo polosembo lopale to lumbaya. Tou̒ timongolio loo̒onto mao̒ Bulua Daantia boito, yi wolo wengahe timongolio helo lunuheo̒.

¹⁴ Goloba boito lohuheli totili lobotu leidaa̒ tuwau to halabolu lei Yosua, ngotaalio lo ulipu lo Bet-Semes. Ulipu lokota boito helo mutamutao̒ ayu logoloba boito tulusi longolotao̒ sapi mohelu duluo boito duo̒lo bake yilalango ode Eeya.

¹⁵ Lapatao̒ tau-tauwalo Lewi malo polaahe mola Bulua Daantia lo Eeya wau kasi u hetuanga upango hulawa boito, tulusi lopodutu mao̒ toitaato botu leidaa̒ boito. Lapatao̒ uito ulipu lo Bet-Semes helo podewo bake yilalango wau babaa-keyaalo wewolio ode Eeya.

¹⁶ Tou̒ olimo lota olongia lo Pilistin loo̒onto mao̒ ngoa̒amilalo boito yi malo hualingolo timongolio ode Ekron to dulahulo boito.

^17-18 Lou̒ odito taulo Pilistin malolao ode Eeya dewo potoloto dusa ode ulipu limo lokota upale-palenta to olimo lota olongia lo Pilistin. Kokoo-tawaalo boito yito: Asdod, Gasa, Askelon, Gat wau Ekron. To wolotalio woluo u obiintengi, woluo udiila. Timii̒du kota boito helolao ngobongga hulawa wau udu hulawa tuwau. Bukuti lou̒ yilowali boito yito botu leidaa̒ tambati pilodutua limongolio Bulua Daantia lo Eeya. Tunggula todulahee botieelo olo botu boito donggo woluo to halabolu lei Yosua, taulo Bet-Emes boito.

¹⁹ Bo sababu tau-tauwalo Bet-Semes boito helo hedupao̒ ode delomo Bulua Daantia lo Eeya, yi pitu lopulu lota towolota limongolio pilate lo Eeya yila-yilateelo mao̒. Lapatao̒ ulipu helo tilimi sababu Eeya lolemba olimongolio wolo baala umalo odito udaa̒alio.

Bulua Daantia to Kiryat-Yearim

²⁰ Lapatao̒ ulipu lo Bet-Semes maloloi̒ya, “Tatoonu tamoo̒ taahangi totalu lo Eeya, Allahu Taa̒ala Taa Mantali boito? Ode utoonu bulua boito musi depitonto alihu molamingao̒ monto olanto?”

²¹ Lapatao̒ timongolio helolao mola utolio ode ulipu lo Kiryat-Yearim wolo tahuli odie mola, “Taulo Pilistin malo powalingai Bulua Daantia lo Eeya. Ponao̒lo mai wau delowalo bulua boito ode tambatimu.”