BOHULO SEMUEL 5 - KITABI HABARI MOPIOHE

Bulua Daantia tohuungo taulo Pilistin

¹ Lapatao̒ taulo Pilistin lolambatao̒ Bulua Daantia lo Allahu Taa̒ala, madilelo limongolio lonto Eben-Haejer ode kota limongolio, Asdod.

² Mota teto bulua boito dilelo limongolio tilumuwota ode kuili lodewa limongolio, Dagon, wau pilodutulio totili lobui̒ dewa boito.

³ Tou̒ ulipu lo Asdod loombulio mola didimodupo lonao̒ mai ode kuili boito, timongolio loo̒onto mao̒ deu̒ bui̒ lo Dagon boito malei padungo mola tohuta, totalu Bulua Daantia lo Eeya! Timongolio malomintaa̒a bui̒ boito wau lopo walingao̒ ode tambatilio.

⁴ Bo loloombulio mola, didimodupo, iloontonga limongolio deu̒ bui̒ boito maluli lodehu mola totalu lo Bulua Daantia boito. Pee̒enta botie lunggongo bui̒ boito wau polotodio duuduluo maloboli wau leidutu to koosengi lohuhebu; bo wawao̒ lobui̒ boito u donggo wimu-wimumuto. (

⁵ Uitolo sababuulio, tunggula todulahee botie mongo iimamu lobui̒ Dagon wau ngoa̒amila tahi poluboa olio to Asdod hemolibaya mao̒ koosengi lohuhebu kuili Dagon wau diila modutaa̒ao̒.)

⁶ Lapatao̒ Eeya helo hukuumani mai ulipu lo Asdod wau madala topalitio wolo himunggu-munggula to wawai̒ mongolio.

⁷ Tou̒ timongolio loo̒onto wolo u donggo pohupohutu toli mongolio boito, timongolio loloi̒ya, “Allahu Taa̒ala malo hukuumani mai olanto wolo dewaanto Dagon. Ito diila mowali mopoluli mao̒ Bulua Daantia-Lio motibiluloa̒ tewe lebe mohiheo mao̒.”

⁸ Sababu uito timongolio helo loduo olimo lota olongia lo Pilistin alihu motia̒mbu mai, lapatao̒ helohintu mao̒ olimongolio, “Maamusi pongolaanto mao̒ Bulua Daantia lo Allahu Taa̒ala lo Isirai̒lu boito?” Tametao̒ lomongo olongia boito, “Limbatalo mota ode kota Gat.” Oditolio, bulua boito mailimbatio ode kota Gat, kota tuwau lo Pilistin uwewo.

⁹ Bo tou̒ bulua boito leidungga mota odito, Eeya lohukuumani mai kota boito olo wau helo potoodei tolonggalo ulaba-labaalo udaa̒alio. Ulipu lo kota boito, mopio tahi muudawa meaambo tahi panggolawa hilukuumani lo Eeya wolo himunggu-munggula ulobutu to wawai̒ mongolio.

¹⁰ Lapatao̒ Bulua Daantia boito dilepitio mota ode Ekron, kota lo Pilistin uwewo poli. Tou̒ leidungga mota odito bulua boito, ulipulio tilonggo watio̒, uali mongolio, “Bulua Daantia lo Allahu Taa̒ala lo Isirai̒lu madilelolio mai odia u momate olanto ngoa̒amila mate-mateelo mao̒.”

¹¹ Sababu uito timongolio helo tiangai ngoa̒amila olongia lo Pilistin alihu motia̒mbu, tulusi loloi̒ya mao̒, “Powalingalo mota Bulua Daantia lo Allahu Taa̒ala lo Isirai̒lu boito ode tambatilio bohu-bohulio mai alihu diila pateelio ito wau ngaalaa̒nto mate-mateelo mao̒.” To ngoilanggubu kota helo toduo tolonggalo sababu Allahu Taa̒ala lohukuumani mai ulipulio wolo laba-labaalo buheetio.

¹² Tau-tauwalo tadiila yilate, ilodungga lo ngongoto himunggu-munggula boito, tilinggula ulipu lokota boito hiwuwaatia̒ ode dedee-waalo limongolio, mei̒ tuulungi.