BOHULO SEMUEL 4 - KITABI HABARI MOPIOHE

Bulua Daantia yilambato taulo Pilistin

¹ To maasa boito taulo Pilistin lotiangai motia̒mbu ngoilanggubu suludadulio moluhu Isirai̒lu; sababu uito suludadu lo Isirai̒lu malomaju ode tambati lo popaatea; timongolio lotikema totili lo Eben-Haejer, hiambola suludadu lo Pilistin helo tikema to Apek.

² Suludadu lo Pilistin lolumula loluhu, wau lapatao̒ popaatea donggo pohupohutu wolo laba-labaalo, suludadu lo Isirai̒lu ilolaahelio wau tanu wopato lihu lota tailate to tambati lo popaatea boito.

³ Tou̒ labito suludadu taa ilolaahelio luli lohualingai ode pilo tikemawa, mongo tau̒wa lo Isirai̒lu loloi̒ya mao̒, “Tingga mailongola Eeya helo poluli mao̒ olaanto ilolaahe taulo Pilistin todulahee botie? Dulo ito mola mohama Bulua Daantia lo Eeya lonto Silo, wau deloonto mai odia, alihu Eeya mamo tulungi mao̒ olanto wau mopoa̒ahu olanto monto musu.”

⁴ Lapatao̒ timongolio malolao tau ode Silo mola lohama mai Bulua Daantia lo Eeya u debo odelo pua̒de lo Eeya Taa Laba-labaalo kawasa. Taduulota walae̒e Eli, tei Hopni wolei Pinehas helo lunuhe Bulua Daantia boito.

⁵ Tou̒ Bulua Daantia boito leidungga mai ode pilo tikemawa, malo tingalao̒lo mola hiwengahe taulo Isirai̒lu, tilinggula huta hilumehela.

⁶ Taulo Pilistin olo loo̒dungohe suala tingalao̒ boito lapatao̒ malo loi̒ya, “Yilongola tau-tauwalo Ibrani boito lotingalao̒ hiwengahe?” Bo tou̒ ilotaawa limongolio deu̒ Bulua Daantia lo Eeya malei dungga mai ode kema taulo Ibrani,

⁷ timongolio mailoohe, wau loloi̒ya, “Woluo dewa lonao̒ mai ode pilo tikemawa limongolio! Matopotala ito! Diipo pee̒enta mao̒ ilolaasanto sua̒li debo odelo utie!

⁸ Matopotala tutu! Tatoonu tamopoa̒ahu olanto monto dedeewaalo u molotola boito? Diila madedee-waalo boito olo tahe lomate yila-yilateelo mao̒ taulo Masiri to huta hungayo u luasi daa̒ muloololio mai?

⁹ Pobuheliyalo mola hilaamu, wuu taulo Pilistin! Popaatealo debo odelo talolai̒, wonu diila, timongoli mamowali wato tau-tauwalo Ibrani boito, debo odelo timongolio muloololio mai lowali wato limongoli. Sababu uito popaatealo wolo lotolo boli buheli!”

¹⁰ Lapatao̒ malopaatea taulo Pilistin wolo laba-labaalo daa̒ wau helo poo̒laaheo̒ suludadu lo Isirai̒lu. Taulo Isirai̒lu tilumetea̒ ode kemalio ngota-ngota. Otutu udaa̒ ololaahe boito: tilinggula tolopulu lolihu lota pajule lo Isirai̒lu tailate.

¹¹ Bulua Daantia lo Allahu Taa̒ala yilambato musu lo Isirai̒lu, wau walae̒e Eli duulota, tei Hopni wolei Pinehas, yilate.

Tei Eli yilate

¹² Ngotaalio lonto suku Benyamin tilumetea̒ lonto tambati lo popaatea ode Silo, wau leidungga mota odito to dulahulo boito. Odelo tuoto lou̒ limilimi, makile-kiledengio pakeyangilio wau diulutualio huta to lunggongio.

¹³ Tei Eli, tailoohe daa̒ hemo mikiilangi mola, osalaamati Bulua Daantia lo Eeya, donggo hulohuluo̒ to kadera tobiihu dalalo, sambela hemotolo eelao̒. Tou̒ tau boito lopohabari mao̒ habari lotau Isirai̒lu ilohamaalio, ngoilanggubu ulipu lokota hilumoyonga loo̒ohuu̒.

¹⁴ Tei Eli loo̒dungohe hilimuta boito, tulusi malohintu mao̒, “Tolonggalo wolo uito?” Sambela uito tae̒ngonti tilumetea̒a mota odelei Eli; tou̒ leidungga mota, tio lopoo̒taa mao̒ habari u moleeta boito.

¹⁵ Tutuulio tutu tei Eli matio lopulaa walu lotaunu umululio wau tio bolo ngopee̒ mola pitoo̒.

¹⁶ Tau boito loloi̒ya mao̒ odelei Eli, “Watia tilumetaa̒i todulahee botie lonto tambati lo popaatea wau boheli leidungga mai.” Tei Eli lohintu mao̒ olio, “Woloolo mola habariilio, walau̒uu̒?”

¹⁷ Tamoodeloa habari boito lolametao̒, “Taulo Isirai̒lu matilumetea̒ lonto taulo Pilistin. Ito lodutolo laba-labaalo sababu ilolaahelio. Dadaata tailate, wau olo walai̒ Paaa̒ duulota, tei Hopni wolei Pinehas. Wau Bulua Daantia lo Allahu Taa̒ala yilambato lomusu!”

¹⁸ Tou̒ tau boito lolele mao̒ pasali lo Bulua Daantia boito, tei Eli lodehu lomola leii̒nggaya lonto kaderalio to ambahu huhebu hulubangi. Tio mapanggola daa̒ wau molingohu tilinggula tou̒ lodehu mola buloi̒o loboli, wau tio yilate. Tio malodelo taulo Isirai̒lu wopato pulu lotaunu mola hiheolio.

Janda lei Pinehas yilate

¹⁹ Tou̒ boito, walao̒ moluhengee Eli, deu̒yito-yito dile lei Pinehas, donggo ombodaa̒, wau bolo ngopee̒ mola motutu mai. Tou̒ ilodungohelio deu̒ Bulua Daantia lo Allahu Taa̒ala mailambato, wau deu̒ tiyamo moluhengio wau dilelio mailate, debolo tio loo̒laasa mongongoto mamotutu mai, tulusi malo tutuulo mai tio diila lohiheo lapatio mao̒.

²⁰ Tou̒ tio mameembideo̒ mate, mongobua tahe lotulungi olio loloi̒ya mao̒, “Poo̒lotola mola hilaamu! Walau̒mu talolai̒!” Bo tio diila lolameto meaalo lopoo̒tuoto olimongolio.

^21-22 Walao̒ boito ilunteelio Ikabot, ualio, “Owoluo lo Allahu Taa̒ala Taa Molamahu mailooli lonto Isirai̒lu,” – u milakusudulio yito deu̒ Bulua Daantia mailambatio wau tiyamo moluhengio boli dilelio mailate. Sababu uito tio loloi̒ya, “Owoluo lo Allahu Taa̒ala Taa Molamahu mailooli lonto Isirai̒lu, sababu Bulua Daantia lo Allahu Taa̒ala mailambatio.”