BOHULO SEMUEL 31 - KITABI HABARI MOPIOHE

Tei Saul wau walai̒o mongo lolai̒ yilate

¹ Tou̒ boito taulo Pilistin donggo hemopaatea hipoluwalia taulo Isirai̒lu to hihui̒-hui̒dea lo Gilboa. Dadaata taulo Isirai̒lu tailate teto, wau tawewolio, leituwoto tei Saul wau walai̒o mongo lolai̒ loo̒ lolahi.

² Bo timongolio hetilunuhe lotau Pilistin wau toulota towolota walae̒e Saul mongo lolai̒ boito ilopatealio yila-yilateelo mao̒; deu̒yito-yito tei Yonatan, Abinadab, wau Malkisua.

³ Popaatea boito malo laba-labaalo topalitio lei Saul, wau tio lohihilao ilotuhata lo papaa-nawaalo musu tilinggula pilalia daa̒.

⁴ Lapatao̒ ualei Saul ode tabohulotau tadelodelo tingololio, “Pahutalo mola wamilumu wau ngamowalo mai wau̒, alihu wau̒ diila mao̒ poi-poitohio wau pateelio mate-mateelo mao̒ lotaa udiila hitootawa to Eeya boito.” Bo tabohulotau boito diila lohuto longamo olio, sababu he hurumatiolio daa̒ tio. Sababu uito tei Saul malohama wamilio lohihilao wau lopo woombahe mola batangalio ode yitaato mato lowamilo boito.

⁵ Tou̒ tabohulotau boito loo̒onto deu̒ tei Saul mailate, yi tio olo malo powoombahe mola batangalio ode yitaato mota lo wamilio tulusi yilate totili lei Saul.

⁶ Odi-odieelo mola tei Saul wolo walai̒o mongo lolai̒ toulota, wau ngoa̒amila tahidudua̒ olio wau tabohulotau boito yilate tou̒ ngohuilo boito.

⁷ Tou̒ taulo Isirai̒lu tahi biluloa̒wa to ngotuali lo Lumbaya Yijreel wau wimbihu tiimuru lo Dutulaa Yordan loo̒dungohe deu̒ suludadu lo Isirai̒lu malolahi, wau deu̒ tei Saul wau walai̒o mongo lolai̒ mailate, yi timongolio tilumeteo̒ lololaa mao̒ kokoo-tawaalo limongolio. Lapatao̒ taulo Pilistin helo tihuloa̒ to kokoo-tawaalo boito.

⁸ Loombulio mola tou̒ taulo Pilistin lonao̒ mai molambata mimii-lateyaalo, ilodungga limongolio tei Saul wau walai̒o mongo lolai̒ toulota mailate to hihui̒-hui̒dea lo Gilboa.

⁹ Timongolio lolimadeo̒ lunggonge Saul wau lohama boo̒ lo popaatealio, lapatao̒ taulo Pilistin helolao utolia ode ngoilanggubu lipu lo Pilistin u lopo tunggulao̒ habari mopiohe boito ode ulipu wau dewa limongolio.

¹⁰ Lapatao̒ boo̒ lo popaatea lei Saul boito tilahu limongolio todelomo kuili lo dewi Asytoret, wau wawaai̒o pilakulio to dingingo meeseli lokota Bet-Sean.

¹¹ Bo ulipu lo Yabesh to Gilead loo̒dungohe wolo u mapilohutu lotau Pilistin odelei Saul,

¹² tulusi tau-tauwalo tahi buuhelia daa̒ malo monggato lonteto wau lonao̒ ilo-iloonua ode Bet-Sean. Timongolio helo polaaheo̒ milate lei Saul wau milate lowalai̒o mongo lolai̒ toulota lonto dingingo meeseli lokota boito tulusi dilelo limongolio ode Yabesh, wau tilumbilalio.

¹³ Ngoa̒amila tulalio yilimoi̒o wau yilobungio towalungo bungo lo ayu tamariska tokota boito, lapatao̒ timongolio helo puasa pitu hui mola hiheolio. 93