BOHULO SEMUEL 30 - KITABI HABARI MOPIOHE

Popaatea helo luwali taulo Amalek

^1-5 Duuhui mola lapatio mao̒, tei Dauda wau tahidudua̒ olio luli lohualinga ode kota Jiklag. Tou̒ leidungga mola odito, ilodungga limongolio deu̒ taulo Amalek maloluhu wimbihu huliaalio lipu lo Yehuda wau loluhu Jiklag. Penu boli ngotaa mao̒ diaaluo tapilate limongolio yila-yilateelo mao̒. Bo pilopo waahu limongolio kota boito wau lopo tolongao̒ mola lonao̒ limongolio wau helodelo mongobua, tau̒kekeei̒ wau ulipu wewolio. Timongolio olo malo tawalo ngaalaa̒ lei Dauda wau ngaalaa̒ lo tahidudua̒ olio, leituoto dile lei Dauda duulota, ti Ahinoam woli Abigail. Tei Dauda wau tahidudua̒ olio odito suukalilio, tilinggula timongolio maa hilumoyonga diila huheliilio tunggula dimulutu diilalo olootolo.

⁶ Tahidudua̒ olei Dauda siluukali daa̒ sababu timongolio maa iloolia lowalao̒ wau dile limongolio. Sababu uito timongolio mamomai̒ olei Dauda wolo botu. Oditolio tei Dauda todelomo ileepita daa̒, bo hilaalio luli piloo̒ lotoolai lo Eeya Allahu Taa̒alaalio.

⁷ Lapatao̒ tei Dauda loloi̒ya mao̒ odeli Iimamu Abyatar walae̒e Ahimelek, “Delowa mai boo̒ li iimamu boito odia!” Yi tei Abyatar malodelo boo̒ li iimamu boito ode olio.

⁸ Lapatao̒ malohintu tei Dauda ode Eeya, “Wolo tingga wajibu watotia mohilapita woomboa lo tamooluhua boito? Wolo tingga otunuhe lo watotia timongolio?” Tametai lo Eeya, “Ooo̒, yilapitilo mota; yio̒ mamoo̒ lapita olimongolio wau molopato tahi taawaloa.”

^9-10 Lapatao̒ malo monggato tei Dauda pee̒-pee̒enta wolo olimo lohetuto lota tahidudua̒ olio. Tou̒ timongolio leidungga mola to Dutulaa Besor, tei Dauda lopo tolongao̒ nonao̒olio pee̒-pee̒enta wolo wopato hetuto lota; hiambola tadulo hetuto lota wewolio lotitolaa teto. Sababu mailoongolo daa̒ wau diilalo mambo mobalango Dutulaa Besor.

¹¹ To delomo nonao̒ boito tahidudua̒ olio lodunggaya wolo talolai̒ ngota lo Masiri tohuta datahu wau luasi, lapatao̒ tio dilelolio mai odelei Dauda. Tio yilohiyalio ua̒alo wau u yilumolo,

¹² wau olo kuukisi hungo lo ara, wau dulo pangge angguru mohengu. Lapatao̒ tio lolamelao̒; lotoolio luli longuli mai; malo patatao̒ deu̒ tio matolo hui diila lolamelo wau diila longilu!

¹³ Lapatao̒ tei Dauda lohintu mao̒ olio, “Tatoonu tituanimu, wau lonto utoonu mai yio̒?” Tametao̒ lowalao̒ boito, “Watia taulo Masiri, wato taulo Amalek. Watia tilolaa mao̒ lituani laatia tolo hui u lopalutao̒ sababu watia mongongoto.

¹⁴ Amiaatia maloluhu madala taulo Kreti to ambahu huliaalio lo Yehuda wau tomadala lo maraga lei Kale, wau malomobu yilaahu kota lo Jiklag.”

¹⁵ Lapatao̒ yilintu mao̒ lei Dauda olio, “Mohuto yio̒ modepita olau̒ ode tambati lo woomboa boito?” Tametio mao̒, “Watia mohuto, asali ti Tuani modanti mai olaatia domi tanggulo Allahu Taa̒ala, deu̒ watia diila patee li Tuani mate-mateelo mao̒ meaalo wuduo li Tuani odeli tuani lowatia.”

¹⁶ Lapatao̒ tio malo depita olimongolio ode tambati lo woomboa boito. Tou̒ boito woomboa boito hipula-pulatia to ngoilanggubu tambati boito, sambela hipolamela, hipongiluma wau hipo tihunggua daa̒ sababu daatalio lobalangi yilambato u madilelo mai limongolio lonto lipu lo Pilistin wau Yehuda.

¹⁷ Tou̒ dulahee mamo baangai loloombulio mola, timongolio tiluhu lei Dauda, popaatea boito pohupohutu demola hui. Ngopohia lou̒ wopato hetuto lota tahi muudawa u lolahi wolo lotitae̒ to unta, diaaluo penu boli ngotaa mao̒ lonto musu taloo̒lahi.

¹⁸ Tei Dauda ilohaasili helo lopato totoonulalo hitua-tuawua u mailambata lotau Amalek, leituwoto dilelio duulota;

¹⁹ diaaluo mao̒ penu boli hitua-tuawua uilooli. Ngoa̒amila walao̒ mongo lolai̒ wau mongobua boli totoonulalo balangi yilambato u mahilama lotau Amalek, luli hilama lei Dauda.

²⁰ Ngopohia leeto tei Dauda olo helo lambata ngoa̒amila himba wau bibiahu. Bibii-natangiyalo boito heilami lo tahidudua̒ olei Dauda ode talu, lobua̒ wolo totoonulalo balangi yilambato u wewo, wau timongolio loloi̒ya mao̒, “Utie tayadio lei Dauda!”

²¹ Lapatao̒ uito tei Dauda luli lohualinga ode tadulo hetuto lota tamai loongolo daa̒ helo dudua̒ olio, wau tamaa tilolaalio mai tobiihu Dutulaa Besor. Timongolio lalaawania mantahio wolei Dauda wolo tahidudua̒ olio, wau tei Dauda lohimbideo̒ wau lolantobe hilaa limongolio.

²² Bo towolota lo tahidudua̒ olei Dauda tapee̒-pee̒enta lodudua̒ olio, woluo tamoleeto wau langgamu. Timongolio loloi̒ya, “Tau-tauwalo botie diila loduduo̒; oditolio timongolio diila ohaku moo̒tapu wolo-wolo monto balangi yilambatai boito. Timongolio bo mowali mohama mao̒ walao̒ wau dile limongolio, wau monao̒.”

²³ Bo tei Dauda lolametao̒, “Mongo wutatuu̒, diila mao̒ pohutua limongoli odito tou̒ wolo u mailohi mai lo Eeya olanto! Ito madiluo̒la-Lio mai wau lopoo̒haama olanto to woomboa lo tamoo-lambata boito?”

²⁴ Oditolio penu boli ngota mao̒ diila mowali moa̒korowa usulu boito! Ngoa̒amilalo musi moo̒tapu tayadu u tutuuwauwa daatalio: taa ulotitola u lodaha babaa-langiyalo musi moo̒tapu tayadu u tutuuwauwa debo odelo taa ulomaju lopaatea.

²⁵ Lapatao̒ sua̒li boito pilohutu mao̒ lei Dauda lowali wuu̒du tuwau wau dilungohelio to Isirai̒lu tunggula botia.

²⁶ Tou̒ tei Dauda luli lohualinga ode Jiklag, tio malolao ngotayadu lonto babaa-langiyalo yilambata boito ode mongo tau̒wa lo kokoo-tawaalo Yehuda tamalo panggala wolio, ualio mao̒, “Uti-utieelo paraseni ode olemu lonto balangi yilambato u hilama lami lonto musu lo Eeya.”

^27-31 Kokoo-tawaalo boito yito: Betel wau Rama to wimbihu huliaalio lo Yehuda, Yatir, Aroe̒r, Sipmot, Estamoa, Rakhal, wau olo kokoo-tawaalo taulo Yerahmeel, kokoo-tawaalo taulo Keni, Horma, Bor-Asan, Atakh wau Hebron. Ngoa̒amila kota u tou̒toonu tei Dauda wau tahidudua̒ olio, mapee̒enta helonao̒ ode utoonulalo mao̒, pilo laolalio paraseni boito.