BOHULO SEMUEL 29 - KITABI HABARI MOPIOHE

Tei Dauda pilei̒ walainga lotau Pilistin

¹ Taulo Pilistin helo ngambu ngoilanggubu suludadulio to Apek, hiambola taulo Isirai̒lu helo tikema totili butu lotaluhu to Lumbaya Yijreel.

² Olimo lota olongia lo Pilistin tinggai helomaju hibarisia wolo kosatuuwani limongolio tilitangoalio lou̒ ngohetuto lota wau ngolihu lota; tei Dauda wau tahidudua̒ olio hibarisia to dibalaka pee̒-pee̒enta woli Olongia Akhis.

³ Mongo eyaanggu taulo Pilistin loo̒onto olimongolio lapatao̒ malohintu, “Tau-tauwalo Ibrani boito mai mongola tewe?” Tei Akhis lolametao̒, “Botie tei Dauda, bakasi pogawee li Olongia Saul lonto Isirai̒lu. Tio malohiheo lotibiluloa̒ to olau̒. Anggadu tio lonao̒ mai ode olau̒ tunggula todulahee botie, diipo ilodunggau̒ tio ilototala.”

⁴ Bo mongo eyaanggu lo Pilistin boito maloingo olei Akhis wau loloi̒ya mao̒ olio, “Ahuli mao̒ tau boito mohualinga ode kota u mailohimu mao̒ olio. Tio diila mowali mopaatea pee̒-pee̒enta wolanto; diila bolo tio de mamo hiyanati olanto tohuungo lo popaatea. Diila maa utieelo hianga u mopiohe daa̒ olio u mohama hilaa li olongiyalio wolo dalala momate-mateelo mao̒ to tahidudua̒ olanto?

⁵ Matioolo tei Dauda, diila odito? Ode oliyolo mongobua omoo̒omolu helo ngelo-ngelungo sambela hipolahua mola odie, ‘Tei Saul malomate yila-yilateelo mao̒ hilihu-lihua musu, bo tei Dauda hipulu-pulua lolihu.’ ”

⁶ Lapatao̒ tei Akhis lotiangai olei Dauda wau loloi̒ya mao̒ olio, “Wau̒ palacaya domi Eeya tatumu-tumulo, deu̒ yio̒ tatapu wau molotolo hilao to olau̒. Wau̒ sanangi wonu yio̒ mowali wolau̒ todelomo popaatea botie. Sababu anggadu yio̒ lonao̒ mai ode olau̒ tunggula saaa̒ti botie, diila ilodunggau̒ totalamu. Bo mongo olongia uwewo boito diila motohilaa olemu.

⁷ Sababu uito pohualingolo wolo moa̒ahu, wau diila mao̒ pohutu hitua-tuawua u moo̒toodei oyiyingo limongolio.”

⁸ Tei Dauda lolametao̒, “Totala wolo u mapilohutu lo watotia, Baginda? Wonu debo odelo loi̒ya li Baginda, ti Baginda diila loo̒dungga penu boli totala wolo to watotia anggadu watotia helomaya oli Baginda tunggula to saaa̒ti botie, bo yilongola watotia diila luasiyalo mopaatea moluwali musu li Baginda?”

⁹ Tei Akhis lolametao̒, “Otaawamu deu̒ yio̒ he anggapuwou̒ tatapu wau molotolo hilao debo odelo malai̒kati lo Allahu Taa̒ala. Bo mongo eyaanggu boito malolantu mao̒ deu̒ yio̒ diila mowali modudua̒ mopaatea wolami.

¹⁰ Sababu uito Dauda, loombu timongoli ngoa̒amila talo lolaa mao̒ olei Saul wau malonao̒ mai ode olau̒, musi mobongu didimodupo wau hua̒a momonggato lapatio mao̒ dulahee mobutu mai.”

¹¹ Sababu uito dulahee loombulio mola didimodupo, malo monggatolo tei Dauda wau tahidudua̒ olio lohualinga ode lipu lo Pilistin, hiambola suludadu lo Pilistin boito lomonggata ode Yijreel.