BOHULO SEMUEL 27 - KITABI HABARI MOPIOHE

Tei Dauda lotibiluloa̒ towolota taulo Pilistin

¹ Tei Dauda helo mikiilangi mola todelomo hilaalio, “Penu boli woloolo mola olo tou̒ dulahee tuwau tei Saul mamomate olau̒ mate-mateelo mao̒. Oditolio, diduu̒ dalala wewo olau̒, ngopohia mopolahi lobatanga ode lipu lo Pilistin. Lou̒ odito tei Saul diilalo molololohe olau̒ to Isirai̒lu, wau wau̒ olo maa̒amani.”

² Lapatao̒ tei Dauda wau tawolomo hetuto lota tahidudua̒ olio hua̒a lonao̒ odelei Akhis walae̒e Maoh, olongia lokota Gat.

³ Yi malo titatapu tio wolo tahidudua̒ olio to Gat, ngota-ngota wolo ngaalaa̒ limongolio. Tei Dauda lodelo olo dilelio duulota, deu̒yito-yito ti Ahinoam taabua lonto Yijreel, wau ti Abigail, janda lei Nabal taabua lo Karmel.

⁴ Tou̒ tei Saul loo̒dungohe deu̒ tei Dauda malolahi ode Gat, yi tio diilalo lotolopani moheu̒pa olio.

⁵ Lapatao̒ tei Dauda loo̒owoli mao̒ odelei Akhis, “Wonu ti Baginda molaasa sanangi wolo watotia, wohia mai ode watotia kota kikiia̒ tuwau to kambungu u mowali tambati poti biluloa̒lo, tilinggula wato li Baginda botie diila motihangato toli Baginda totiilo lokota botie.”

⁶ Lapatao̒ tei Akhis malongohi mao̒ kota lo Jiklag odelei Dauda, wau uitolo sababuulio Jiklag lowali haku lomongo olongia lo Yehuda tunggula botia.

⁷ Tei Dauda lotibiluloa̒ tolipu lo Pilistin ngotilonggadu ngotaunu wopato hula mola.

⁸ Ngotilonggadu maasa boito tei Dauda wau tahidudua̒ olio laito hemoluhu taulo Gesur, taulo Girji, wau taulo Amalek; babaa-ngusawalo boito malohiiheo hibiluloa̒wa tomadala boito. Tio heloluhu ode huta boito ngoilaminga lo Sur, wau tulusi ode Masiri.

⁹ Tio lomate yila-yilateelo mao̒ ngoa̒amila mongo lolai̒ wau mongobua wau helo lambato himba, sapi, kolodai, unta, tumbao̒ pakeyangi olo. Lapatao̒ tio luli lohualinga wau mota lotaalua wolei Akhis.

¹⁰ Wonu tei Akhis mohintu mao̒ olio, “Tou̒toonu u hetiluhu limongoli pee̒enta botie?” Yi tei Dauda molametao̒ olio deu̒ tio malonao̒ ode wimbihu huliaalio lo Yehuda meaalo ode madala lotau Yerahmeel meaalo ode madala tambati biluloa̒ taulo Keni.

¹¹ Diaaluo penu boli ngotaa mao̒ to mamaa-dalawaalo u tiluhulio boito piloluliilio tumutumulo, alihu diaaluo taa lonto mamaa-dalawaalo boito tamoo̒ nao̒ ode Gat u mopo duloheo̒ wolo u otutuulio mao̒ maa pilohutu lei Dauda wau tahidudua̒ olio. Odi-odieelo mola huhutu lei Dauda ngotilonggadu tio bilu-biluloa̒ tolipu lo Pilistin.

¹² Bo tei Akhis momalacaya olei Dauda wau todelomo hilaalio hemokiilangi mola, “Tio odito yilonuo̒ lo bangusaalio lohihilao, tilinggula tio bolo pakusa lowali watou̒ ngotupa lo tutumulio.”