BOHULO SEMUEL 26 - KITABI HABARI MOPIOHE

Tei Dauda luli lopotouli u momete-mateelo mao̒ olei Saul

¹ Tou̒ dulahee tuwau tau-tauwala lonto Jip lonao̒ mai odelei Saul to Gibea wau helo poo̒taa mao̒ olio deu̒ tei Dauda donggo tuutuuo̒ to Hui̒dee Hakhila tobiihu huta datahu u luasi daa̒ wau delita lo Yehuda.

² Yi wolo lolamemeto tei Saul lomonggato tilunuhe lopajule tolo lihu lota tahipiohe daa̒ to Isirai̒lu, lotidulunga ode huta luasi daa̒ udelita lo Jip mola lololoohe olei Dauda.

³ Tei Saul lotikema tobiihu dalalo membideo̒ lo Hui̒dee Hakhila boito. Tei Dauda tamola tohuta datahu u luasi daa̒ wau delita, loo̒dungohe deu̒ tei Saul lodudua̒i olio demai huta datahu u luasi daa̒ wau delita.

⁴ Lapatao̒ tio olo lolao taa u tilugasia motulete lou̒ poo̒-poo̒oyo, wau ilotaawalio lou̒ mopatato deu̒ tei Saul woluo teto.

⁵ Wolo lolamemeto tei Dauda lonao̒ mota ode kema lei Saul wau mota teto ilodunggaalio kema tou̒toonu tei Saul tuutuluhu totili lei Abner walae̒e Ner. Kema lei Saul boito woluo tohuungio, hiambola suludadulio lotikema to palitio.

⁶ Lapatao̒ tei Dauda lohintu mao̒ olei Ahimelek taulo Het boito, wau olei Abisai wutatei Yoab (Tiilo limongolio yito ti Jeruya), “Tatoonu tabuheeli tumuwotao̒ walau̒ ode delomo kema lei Saul?” Tei Abisai lolametao̒, “Wau̒!”

⁷ Yi tou̒ hui boito tei Dauda wolei Abisai tilumuwotao̒ poo̒-poo̒oyo ode delomo kema boito wau loo̒onto olei Saul donggo tuutuluhu tohuungo kema, totobui̒o panto-pantonga tohuta totili lo lunggongio. Tei Abner wau pasuukanilio tuutuluhu to palitio lei Saul.

⁸ Lapatao̒ ualei Abisai odelei Dauda, “Allahu Taa̒ala malohudu mai musuumu ode olemu tou̒ hui botie. Polulia mai wau̒ mopo lantongao̒ totobui̒o lohihilao to wawaai̒o tunggula molaapata mola ode huta, mapateeu̒ tio mate-mateelo mao̒ wolo pee̒entaalo molobuo̒, sambelolo tunggula poo̒oluo!”

⁹ Bo tei Dauda malo loi̒ya, “Diila mao̒ pongolawa tio! Eeya tantu mohukuumani mai taa u mohutu u moleeto toli olongia tatilulaoto Eeya.

¹⁰ Domi Eeya tatumu-tumulo, otaawau̒ deu̒ de Eeya lohihilao tamaa momate olei Saul mate-mateelo mao̒, wonu opopatelio malei dungga, meaambo wonu tio mate mao̒ todelomo popaatea.

¹¹ Potala Eeya mongabutai olau̒ momate oli olongia tatilulaoto Eeya! Hamawalo mao̒ totobui̒o wau gintilio, tulusi ito monao̒lo!”

¹² Yi tei Dauda lohama mao̒ totobuo̒ wau ginti lei Saul boito lonto ambahu lunggongee Saul, tulusi malonao̒. Diaaluo penu boli ngotaa mao̒ taloo̒onto sua̒li boito meaambo lotota wolo u malo toduo, meaambo lohulimangu mai, sababu Eeya lohutu mao̒ olimongolio ngoa̒amilalo leinuloto daa̒.

¹³ Lapatao̒ tei Dauda lobalanga mota ode biihu lumbaya uwewo demola bolitutuo̒ hui̒dee, tilinggula tio malo laminga lonto kema lei Saul.

¹⁴ Lapatao̒ malo ngiibode mota tei Dauda olei Abner wau suludadu lei Saul ualio mao̒, “Abner! Wolo odungohemu sualau̒?” Tei Abner olo lotuwaheo̒, “Tatoonu yio̒ tawuwa-wuwaatia̒i boito?”

¹⁵ Tametaa mota lei Dauda, “Diila mayio̒ taa upolu-polutuo̒ daa̒ to Isirai̒lu? Yilongola yio̒ diila lodaha mao̒ oli tuanimu, ti baginda olongia? Boheli woluo taa tilumuwotao̒ ode kemamu u momate-mateelo mao̒ oli tuanimu.

¹⁶ Yio̒ diila mambo moponao̒ lo tuugasimu, Abner! Domi Eeya tatumu tumulo, timongoli ngoa̒amila patutilio mate, sababu diila helodaha oli tuanimu, olongia tatilulaoto Eeya. Nte bilohilo! Tou̒toonu totobui̒ olongia? Tou̒toonu ginti uwoluo to ambahu lunggongio engonti?”

¹⁷ Iloonuhe lei Saul suala lei Dauda, tulusi tio malohintu mota, “Dauda, mayio̒lo uito, Walau̒uu̒?” Tametaa mota lei Dauda, “Saaya, Baginda.”

¹⁸ Lapatao̒ ualio poli, “Yilongola ti Baginda debo donggo hemo hilapita olo watotia? Wolo totala lowatotia.

¹⁹ Baginda, dungohilo mai tuboo lowatotia botie. Wonu humaya Eeya talo poa̒hu mai oli Baginda alihu u moluwali olo watotia, yi tuwaulio lou̒ mopodewo bake mamowali moo̒oleo̒ omuluka lo Eeya olo watotia. Bo wonu humaya talo poa̒hu mai oli Baginda boito yito manusia, pohileaala dua̒ timongolio laa̒anatia mai lo Eeya! Sababu akiibati lohuhutu limongolio boitolo, watotia mapilo lontulio lonto huta miliki lo Eeya wau bolo pakusa musi monao̒ ode lipu wewo tou̒toonu watotia musi moi̒baadati to dedee-waalo deli.

²⁰ Diila mao̒ polulia watotia mate tohuta u deli, molaminga monto Eeya. Wolo hunalio olongia lo Isirai̒lu monao̒ mai momate-mateelo mao̒ utu ngobotu debo odelo watotia botie? Wolo hunalio tio mohilapita olo watotia debo odelo taa mohilapita maluo̒ huta?”

²¹ Lapatao̒ tei Saul lolameto, “Wau̒ malohutu totala. Pohualingolo mai Dauda, Walau̒uu̒! Wau̒ diilalo mohutu u moleeto olemu sababu yio̒ malo poluli olau̒ tilumumulo ohui. Watedeu̒ otutu mohulodu. Wau̒ otu-otutuulo mao̒ matilaala!”

²² Bo tei Dauda malo lameto, “Uti-utieelo totobui̒ Baginda, ahulilo mai ngotaalio lopajule li Baginda monao̒ mai odia mohama mao̒.

²³ Eeya mamo balakati mai timii̒du taa utatapu wau molotolo hilao wau juujulu. Sababu eleponu todulahee botie Eeya mohudu mai oli tuani lowatotia ode watotia, bo watotia debo diila ohilaa mohutu mao̒ u moleeto odeli Baginda, olongia tatilulaoto Eeya.

²⁴ Oditolio, debo odelo ti Baginda mapiloluli mao̒ lo watotia tilumumulo todulahee botie, odito olo watotia potala duo̒la mai lo Eeya wau lopato-Lio monto totoonulalo umoo̒ topotala!”

²⁵ Lapatao̒ malo loi̒ya tei Saul odelei Dauda, “Eeya mobalakati mai olemu, walau̒uu̒! Yio̒ maa o tilapulo todelomo tilolahepaalo kalajaamu!” Lapatao̒ tei Dauda lopo tolonga mola lononao̒lio, wau tei Saul olo lohualinga ode belelio.