BOHULO SEMUEL 25 - KITABI HABARI MOPIOHE

Tei Semuel yilate

¹ Diila lohiheo mola lapatio mao̒ tei Semuel yilate. Ngoilanggubu Isirai̒lu lotia̒mbu u lodudua̒ upacala ilopatea. Lapatao̒ tio yilobungio tobelelio to Rama. Lapatao̒ uito tei Dauda maa lonao̒ mola ode huta datahu u luasi daa̒ wau delita lo Parani.

Tei Dauda woli Abigail

^2-3 To kota Maon woluo ngotaalio talolai̒ lonto kaumu Kale, tai̒lunte Nabal. Tio ohuta pomiyahelo binatangi totili lokota Karmel. Tio kaya daa̒ wau ohimba tolo lihu wau batade ngolihu. Ti Abigail dilelio, motota boli gaaga, bo tei Nabal owatade bangganga wau opii̒li moleeto. Tou̒ dulahee tuwau tei Nabal donggo hemo huntinga lambuto lo himbalio to Karmel.

⁴ Tou̒ tei Dauda tamola tohuta datahu u luasi daa̒ wau delita, loo̒dungohe sua̒li boito,

⁵ yi tio malo poa̒hu mopulu lota tabohulotau lonao̒ ode Karmel,

⁶ mola lodunggaya wolei Nabal wau lopo tunggulao̒ salamu lei Dauda olio. Tio lei̒ poo̒taa mao̒ olimongolio odie odelei Nabal, “Salamu moa̒ahu olemu wau ngaalaa̒mu boli totoonulalo milikiimu.

⁷ Ilodungoheu̒ deu̒ yio̒ donggo hemo huntinga lambuto lo himbamu. Ototai mao̒ deu̒ mongo ditimu tawoluo tomadala lami, diila pee̒enta mao̒ hepiluyu lami, wau olo diipo pee̒enta mao̒ timongolio iloolia penu boli loolo ngotilonggadu to Karmel.

⁸ Nte yintuwalo mao̒ olimongolio, tantu timongolio mamopo otutu mao̒ sua̒li boito. Sababu uito harapuwou̒ alihu tahidudua̒ olau̒ tolimoomu lou̒ mopiohe tobelemu, sababu ami monao̒ mai todulahee daa̒ botie. Wohia mao̒ olo ode mongo watomu botie wau ode olau̒, tei Dauda, sahaabatimu tamopiohe, penu boli wambai̒o modudua̒ oreela lohilaamu.”

⁹ Leidungga mola ode Karmel, tahidudua̒ olei Dauda helopo tunggulao̒ tahuli boito odelei Nabal to tanggulei Dauda, lapatao̒ timongolio malohima.

¹⁰ Bo tei Nabal lolametao̒, “Tei Dauda? Tatoonu tio? Tatoonu tio walae̒e Isai boito? Diipo pee̒enta mao̒ wau̒ loo̒dungohe pasali olio! To momooliilio mai botie dadaata tahelo lahi lonto oli tuanilio tolipu botie!

¹¹ Diila pongalo aakali wau̒ mohama mao̒ roti wau taluhu u yilumou̒, wau tapu u mapilo dapatuu̒ ode mongo tawuu̒ tamoo-huntingawa, tulusi wohiu̒ mao̒ ngoa̒amilalo boito ode taa udiila mopatato asaliilio mai!”

¹² Yi tahidudua̒ olei Dauda luli lohualingai odelei Dauda wau lopoo̒taa mao̒ olio loi̒ya lei Nabal boito.

¹³ Tou̒ loo̒dungohe uito tei Dauda malo poa̒hu, “Awadelo wamilumu towohuta ngota-ngota!” Yi tahidudua̒ olio hua̒a lopohutu mao̒ palenta boito. Tei Dauda olo longawadeo̒ wamilio to wohutalio wau malo monggata wolo otanu wopato hetuto lota, hiambola dulo hetuto lota lotitolaa mao̒ helodaha babaa-langiyalo.

¹⁴ Sambela uito toli Abigail dile lei Nabal, mapiloo̒taa mao̒ lo tamoomayawa ngota lei Nabal, odie, “Wolo mailo dungohe limbuui̒? Tei Dauda malo poa̒hu mai dengolo lota utolia lonto huta datahu u luasi daa̒ wau delita u longohi mao̒ salamu odeli tuaninto, bo tituani helo muamuayo mao̒ olimongolio.

¹⁵ Lebe-lebe pomao̒ timongolio mopiohe daa̒ to olamiaatia. Diila pee̒enta mao̒ amiaatia piluyu limongolio, wau olo diipo pee̒enta mao̒ amiaatia iloolia penu boli loolo tou̒ helo sahabatia woli mongolio tohuta datahu u luasi daa̒ wau delita.

¹⁶ Hui wau dulahu timongolio helodaha olamiaatia ngotilonggadu amiaatia hemo himbala batade wau himba totili limongolio.

¹⁷ Sababu uito, toloe̒elawa mola sua̒li botie, wau tantuwalo wolo u mowali pohutuo mao̒ limbuui̒. Sababu tantuulo mao̒ mamei dungga mai tuliilio odeli tuaninto wau ngoilanggubu ngaalaa̒lio. Ti tuaninto baa̒angiyolo daa̒ tilinggula diila mowali waitola mobisala!”

¹⁸ Lapatao̒ ti Abigail hua̒a lohama mao̒ roti dulo hetuto, wau bututu lowalito mohelu duluo hipolua lotaluhu angguru, limo himba pilanggangi, mopulaa pitu lokilo pale tilinanga, ngohetuto pangge hungo lo angguru mohengu wau dulo hetuto kuukisi lo ara. Ngoa̒amilalo boito hediletohio toitaato kolodailio.

¹⁹ Lapatao̒ malo loi̒ya tio ode tahi pomayaalio, “Timongoli monao̒ meimulo walau̒; wau̒ mamo lunuhe olimongoli.” Bo tio diila loloi̒ya mao̒ wolo-wolo todilelio.

²⁰ Ti Abigail malo titae̒ to kolodailio, wau tou̒ tio leidungga mota to pobaleyalo tuwau tobiihu hui̒dee, malo laawode tio wolei Dauda wau tahidudua̒ olio tadonggo hituhuta dulu-dulungai ode olio.

²¹ To saaa̒ti boito tei Dauda donggo hemotolo mikiilangi mola, “Diila ilohuna wambai̒o wau̒ helodaha miliki lotau boito tohuta datahu u luasi daa̒ wau delita! Diaaluo penu boli ngoi̒di mao̒ uilooli lonto milikiilio; wau botia tiluliilio opopiohuu̒ wolo u moleeto!

²² Bolo potala Allahu Taa̒ala momate mai olau̒ mate-mateelo mao̒ wonu bolo diila pateeu̒ mate-mateelo mao̒ ngoa̒amila mongo lolai̒ tawoluo mola teto tou̒ dulahee diipo mobutu mai!”

²³ Tou̒ ti Abigail loo̒onto olei Dauda, tio hua̒a lolaaheo̒ lonto kolodailio tulusi losujudu mola to oa̒atee Dauda,

²⁴ wau loloi̒ya mao̒ olio, “Tuani lowatotia, ambunguolo modungoheo̒! Huliyalo mao̒ totala boito bantaa lowatotia lohihilao!

²⁵ Diila mao̒ pikiilangia li Tuaniu̒ tei Nabal taa udiila ohuna boito! Tio taa mohulodu tutuuwauwa wolo boli lo tanggulio. Wato diila moo̒onto mongo utolia tai̒lahula li Tuaniu̒ boito.

²⁶ Allahu Taa̒ala malo ngabuto oli Tuani lowatotia motuli wau momate-mateelo mao̒ mumuu-suwaalo li Tuani. Wau botia Tuani lowatotia, domi Eeya tatumu-tumulo, watotia motadia mai, bolo potala paladu lo ngoa̒amila musu li Tuani lowatotia wau timii̒du taa ohilaa mopo topotala oli Tuani lowatotia tutuuwauwa debo odelo paladu lei Nabal.

²⁷ Tolimowalo mao̒ paraseni u dilelo mai lowatotia botie odeli Tuani lowatotia, wau ode tahidudua̒ li Tuani lowatotia.

²⁸ Maa̒apuwalo mai totala lowatotia. Eeya tantu mamopowali mao̒ oli Tuani lowatotia wau wali mola li Tuani lowatotia olongia lo Isirai̒lu, sababu ti Tuani lowatotia mopaatea duo̒lo Eeya; wau ti Tuani lowatotia diila tamohutu u moleeto ngotupa lo tutumulo.

²⁹ Humayaalio ngotaalio moluhu oli Tuani lo watotia, wau mohimontala momate oli Tuani lo watotia mate-mateelo mao̒, yi ti Tuani tantu maa duo̒la mai lo Allahu Taa̒ala debo odelo halata u dilaha lotaa ohuwolio. Bo musu li Tuani lowatotia mapomahulo Eeya mola-molamingolo mao̒, pomahulo lo tamoo-mahulawa wolo tali.

³⁰ Eeya mamohutu tilohepaalo u mopiohe u pilodantia-Lio mai odeli Tuani lowatotia, diilalo mohiheo ti Tuani lowatotia powalio-Lio mai olongia lo Isirai̒lu.

³¹ Tou̒ boito ti Tuani lowatotia mamoe̒ela mola deu̒ ti Tuani lowatotia diila tamomate-mateelo mao̒ lou̒ diila o alaasani meaalo motolo hakimu lohihilao tilinggula ti Tuani lowatotia diila palalu molaasa suukali meaalo molee̒e. Wau wonu bolo Eeya malo balakati mao̒ oli Tuani lo watotia, diila mao̒ lipata wato li Tuani lo watotia botie.”

³² Lapatao̒ loloi̒ya mao̒ tei Dauda olio, “Ilopujialo mola Eeya, Allahu Taa̒ala lo Isirai̒lu, talolao mai olemu lodunggaya wolau̒ todulahee botie!

³³ Ilopujialo mola tinepomu wau ilopujialo mola olo yio̒ lohihilao sababu malo ngotonga olau̒ u momate-mateelo mao̒ wau motolo hakimu lohihilao.

³⁴ Eeya malo ngabutao̒ olau̒ mohutu u moleeto to olemu. Domi Eeya, Allahu Taa̒ala lo Isirai̒lu tatumu-tumulo, humayaalio yio̒ diila hua̒a lodunggaya wolau̒, yi tantulo mao̒ ngoa̒amila tahidudua̒ olei Nabal mailate tou̒ dulahee mobutu mai.”

³⁵ Lapatao̒ uito tei Dauda lololimo mao̒ wolo u dilelo mai li Abigail olio, tulusi loloi̒ya olio, “Pohualingolo ode belemu wau diila mao̒ polawalo. Hihiilemu boito tilolimou̒.”

³⁶ Tou̒ ti Abigail luli lohualinga odelei Nabal, malo ilaalo woluo potihunggu daa̒ to belelio, debo odelo potihunggu li olongia. Wau sababu tei Nabal huwohuwoo̒ wau malo wenga-wengahe, yi dilelio diila lopoo̒taa mao̒ penu boli wolo to olio demola loombulio.

³⁷ Dumodupio mola, tou̒ tei Nabal diilalo huwohuwoo̒, bolo dilelio lopoo̒taa mao̒ olio tomimbihu ngoa̒amila ololeeto boito. Lapatao̒ tei Nabal ilongongota loputu wau ngangaawaa̒lo mao̒ malo bualodu wau didu mowali monao̒.

³⁸ Tanu mopulu hui mola lapatio mao̒ tei Nabal luli ilongongota loputu lonto Eeya tilinggula tio yilate.

³⁹ Tou̒ tei Dauda loo̒dungohe deu̒ tei Nabal mailate, malo loi̒ya tio, “Ilopujialo mola Eeya! Eeya malotuli mai polohina u pilohtu lei Nabal to olau̒, wau malo ngabuta wato-Lio mohutu u moleeto. Eeya malo hukuumani mai olei Nabal sababu ololeetio.” Lapatao̒ tei Dauda malolao utolia odeli Abigail mola lotobalango olio mowali dilelio.

⁴⁰ Yi malei dungga mola utolia lei Dauda ode taabua boito to Karmel wau loloi̒ya mao̒ olio, “Amiaatia yilao mai lei Dauda motaalua woli Mbuui̒, sababu tio ohilaa motobalango oli Mbuui̒ mowali dilelio.”

⁴¹ Ti Abigail olo tilimihula wau losujudu mola boli loloi̒ya mao̒, “Wau̒ botie wato lei Dauda, wau̒ dapa-dapato mongulo oa̒ato lomongo watolio.”

⁴² Lapatao̒ hua̒a lotidapato tio. Tio malotitae̒ mola ode yitaato kolodailio wau tilunuhe lo mongobua limo lota tahi pomayaalio, tulusi lomonggatolo tio lodudua̒ utolia lei Dauda, yi tio malowali dile lei Dauda.

⁴³ Tou̒ dipo-dipolulio mai tei Dauda malonika woli Ahinoam lonto Yijreel, wau botia ti Abigail olo lowali dilelio.

⁴⁴ Sambela uito tei Saul malo ponika mao̒ ti Mikhal puusililio, deu̒yito-yito dile lei Dauda, woli Palti walae̒e Lais lonto kota lo Galim.