BOHULO SEMUEL 24 - KITABI HABARI MOPIOHE

Tei Dauda diila lohuto lomate yila-yilateelo mao̒ olei Saul

¹ Lonteto tei Dauda lonao̒ mota ode madala lo En-Ged, wau malo tituuo̒ to gogoowaalo.

² Tou̒ tei Saul boheli lohualingai lonto popaatea loluwali taulo Pilistin, tio loo̒tapu habari deu̒ tei Dauda mola to huta datahu u luasi daa̒ wau delita membideo̒ lo En-Ged.

³ Lolamemeto tei Saul lolulaotao̒ pajule tololihu lota tahipiohe daa̒ lonto ngoilanggubu Isirai̒lu, lapatao̒ lomonggata lololoohe olei Dauda wau tahidudua̒ olio to ambahu tiimuru lo Hui̒dee Botu Batade Oa̒ayua.

⁴ Yi malei dungga mota tei Saul totili lo dengolo lantunga lohimba tobiihu dalaalo. Mota teto woluo olo gowa tuwau, wau tei Saul tilumuotao̒ u mongili. Letaahua daa̒ tei Dauda wau tahidudua̒ olio donggo hituua̒ togowa boito olo, lebe mao̒ ode delomio.

⁵ Lapatao̒ maloloi̒ya tahidudua̒ olei Dauda to olio, “Uti-utieelo hiyangio toli Paaa̒! Diila maa Eeya taa lotahuda mai odeli Paaa̒ odie, ‘Musumu mawuduwo-U̒ mai olemu, pohutuwalo totoonulalo otohilaa lohilaamu to olio!’ ” Lapatao̒ tei Dauda tilumuotao̒ ode tambati lei Saul wau lou̒ poo̒poo̒oyo iloyodio jumba lei Saul.

⁶ Bo lapatao̒ uito, tei Dauda loraasa ilototala sababu tio malohutu sua̒li boito.

⁷ Tio loloi̒ya mao̒ ode tahidudua̒ olio, “Pohileaala dua̒ Eeya modaha mai diila bolo wau̒ moo̒hutu u moleeto toli olongiyau̒ tatilulaoto Eeya! Penu boli ngoi̒di mao̒ wau̒ diila mowali mopongongoto olio, sababu tio olongia tatilulaoto Eeya!”

⁸ Odi-odieelo mola tei Dauda helo poduo̒tao̒ hilaa lo tahidudua̒ olio, wau diila lopoluasi olimongolio moluhu olei Saul. Tei Saul tilimihula wau lololaa mao̒ gowa boito, lapatao̒ lopotulusi lononao̒lio.

⁹ Tei Dauda olo yilumualai lonto gowa boito wau longiibode to dibalaka lei Saul, “Baginda!”

¹⁰ Tei Saul loili ode wulea wau tei Dauda losujudulo mola wolo hurumati tulusi loloi̒ya mao̒, “Yilongola ti Baginda lodungohe bisala lotaa u hipoloi̒yawa deu̒ watotia ohilaa mopotopotala oli Baginda?

¹¹ Botia ti Baginda loo̒toduo lohihilao deu̒ todelomo gowa engonti, Eeya malohudu mai oli Baginda ode watotia. Watotia mapiliyo lo tahingota-ngotaawa u momate oli Baginda mate-mateelo mao̒, bo watotia diila lololimo. Watotia lolametao̒ deu̒ watotia diila mohuto mopongongoto li olongia lo watotia tamaa tilulaoto Eeya.

¹² Bilohilo mai, Paapa lo watotia! Bilohilo mai pitango jumba li Baginda u dilihuma lo watotia botie! Tutuulio tutu watotia moo̒pate oli Baginda mate-mateelo mao̒, bo watotia bo longoyodeo̒ ngoi̒di biihu jumba li Baginda. Oditolio, malo patatao̒ deu̒ watotia diila opatuju u moleeto meaambo mojuluhaka. Ti Baginda helo hila-hilaapita olo watotia u momate olo watotia mate-mateelo mao̒, eleponu watotia diila ototala penu boli ngoi̒di mao̒ toli Baginda.

¹³ Pohileaala dua̒ Eeyaalo tamolantu mai tatoonu to wolotanto tao̒totala! Bolo potala Eeyaalo tamolontuli mai huhutu li Baginda olo watotia, bo penu boli ngoi̒di mao̒ watotia diila tamopo ngongoto oli Baginda.

¹⁴ Otaawa li Baginda pohumaya kuno botie, ololeeto bo heputuo lotaa u moleeto. Sababu uito wato diila tamopo ngongoto hilaa li Baginda.

¹⁵ Poo̒tuotilo watotia botie tamaa patee mate-mateelo mao̒ li olongia lo Isirai̒lu! Bolohilo mao̒ watotia botie tahe yila-yilapitalio yilapitalio! Watotia bo apula tuwau u yilate, utu tuwau wambai̒o.

¹⁶ Eeya mamowali hakimu towolota li Baginda wolo watotia. Pohileaala dua̒ Tio momalakisao̒ palakala botie, wau mopoduulua olo watotia wau mopoa̒ahu mao̒ watotia monto oli Baginda.”

¹⁷ Lapatao̒ tei Dauda lolapalao̒ tataa-heyaalo boito, maloloi̒ya tei Saul, “Mayio̒olo uito, wuu Dauda, walau̒u̒?” Lapatao̒ mahilu moyongolo mola tio.

¹⁸ Yi ualio mao̒ odelei Dauda, “Yio̒ tao̒tutu, wau wau̒lo tatilaala.

¹⁹ Ololeetuu̒ to olemu matilontulimu lou̒ mopiohu. To dulahee botie yio̒ malo poi̒laalo deu̒ yio̒ opatuju u mopiohe to olau̒, sababu yio̒ diila lomate olau̒ yila-yilateelo mao̒, eleponu Eeya malohudu mao̒ olau̒ ode olemu.

²⁰ Molawata daa̒ tahingota-ngotaawa modunggaya wolo musulio bo piloluliilio mao̒ tumu tumulo! Oditolio, pohileaala dua̒ Eeya mobalakati mai olemu masababu huhuutumu u mopiohe ode olau̒ todulahee botie!

²¹ Botia wau̒ yakini deu̒ yio̒ mamowali olongia lo Isirai̒lu wau deu̒ bele biluloa̒ saaha li olongia lo Isirai̒lu madebo motoheeto totibawa lo pamalentaamu.

²² Botia podantilo mai olau̒ domi Eeya, deu̒ yio̒ diila tamomate-mateelo mao̒ waliu̒ mola, wau olo diila tamolulutao̒ tanggulo ngaalaa̒au̒!”

²³ Lapatao̒ lotadiyalo mola tei Dauda mamohutu mao̒ sua̒li boito. Lapatao̒ malo hualinga tei Saul ode belelio, wau tei Dauda wolo tahidudua̒ olio olo luli lohualinga ode tambati pilotituua̒lio.