BOHULO SEMUEL 23 - KITABI HABARI MOPIOHETei Dauda helo poa̒ahu kota lo Kehila 1 Tou̒ dulahee tuwau piloo̒taalio mao̒ odelei Dauda deu̒ taulo Pilistin heloluhu kota Kehila wau lolambata pale u boheli tilotobeo̒. 2 Lapatao̒ malohintu tio ode Eeya, “Ambunguolo wolo watotia patuti mota moluhu taulo Pilistin?” “Ooo̒,” tametai lo Eeya, “tuhuwalo timongolio wau poa̒ahua mao̒ ulipu lo Kehila.” 3 Bo tahidudua̒ olei Dauda loloi̒ya mao̒ olio, “Hiambola tewe, to Yehuda, ito mailoohe daa̒; debolo wonu ito musi mota moluhu suludadu lo Pilistin to Kehila.” 4 Sababu uito pee̒entapo tei Dauda helo molohone potuhata lonto Eeya, wau Eeya lolametai, “Diila mao̒ polawalo. Tuhuwalo kota lo Kehila, sababu suludadu lo Pilistin boito mawuduwo-U̒ mai olemu.” 5 Yi lonao̒lo tei Dauda wolo tahidudua̒ olio ode Kehila lapatao̒ tiluhulio wau hepilatelio yila-yilateelo mao̒ dadaata taulo Pilistin, yilambatio bibiahi mongolio. Odi-odieelo mola tei Dauda helo lopato ulipu lokota boito. 6 Tou̒ tei Abyatar walae̒e Ahimelek lolahi odelei Dauda, wau lodudua̒ olei Dauda ode Kehila, tio olo lodelo mota boo̒ li iimamu. 7 Tou̒ piloo̒taalio odelei Saul deu̒ tei Dauda woluo to Kehila, to pikiilangi lei Saul, “Tei Dauda mailudu mai lo Allahu Taa̒ala olau̒. Tio leitaalo sababu maa tilu muwota ode delomo kota u odingingo meeseli wau ohuhebu hulubangi.” 8 Lapatao̒ tei Saul lotiangai lotia̒mbu suludadulio wau lomonggata ode Kehila mola lomala olei Dauda pee̒-pee̒enta wolo ngoa̒amila tahidudua̒ olio. 9 Bo mailotaawa lei Dauda deu̒ tei Saul oniyati u moleeto to olio. Sababu uito tio loloi̒ya odeli Iimamu Abyatar, “Delowalo mai boo̒ li iimamu boito odia mai.” 10 Lapatao̒ malodua̒ mola tei Dauda, “Yaa Eeya, Allahu Taa̒ala lo Isirai̒lu, ilodungohe lo watotia deu̒ tei Saul oniyati u monao̒ mai ode Kehila wau mongantulu kota boito sababu watotia, wato lo Eeya. 11-12 Ambunguolo wolo otutu u ilodungohe lo watotia boito? Yaa Eeya, Allahu Taa̒ala lo Isirai̒lu, potala poo̒taalo mai ode watotia.” Eeya lolametai, “Ooo̒, tei Saul mamonao̒ mai.” Lapatao̒ luli yilintu lei Dauda, “Ambunguolo wolo ulipu lokota Kehila mamohudu mao̒ olo watotia wau tahidudua̒ olo watotia odelei Saul?” Yi Eeya lolametai, “Ooo̒.” 13 Lapatao̒ tei Dauda wau tahidudua̒ olio otanu wolomo hetuto lota, hua̒a lololaa mao̒ Kehila wau lonao̒ ode utoonulalo mao̒ lonto tambati tuwau ode tambati uwewo. Tou̒ tei Saul loo̒dungohe deu̒ tei Dauda malo monggato lonto Kehila, yi tio diilalo lopomata lanjana u moluhu olio. Tei Dauda tomadala hihui̒-hui̒dea 14 Lapatao̒ uito tei Dauda malo tibiluloa̒ to gogoowaalo hihui̒-hui̒dea tohuta u luasi daa̒ wau delita lo Jip. Tio laito heilapita lei Saul, bo Eeya diila lohudu olio odeli olongia boito. 15 Penu boli odito tei Dauda debo moohe olo, sababu tei Saul oniyati ohilaa momate olio mate-mateelo mao̒. Tou̒ wakutu tuwau tei Dauda woluo to Hores, tohuta u luasi daa̒ wau delita lo Jip. 16 Tei Yonatan mai lodunggaya wolio teto u lopoo̒ lotolao̒ iimanilio deu̒ tio maduo̒la mai lo Allahu Taa̒ala. 17 Ualei Yonatan olio, “Diila mao̒ oohe, yio̒ diila tamodehu ode uluu̒ li paapau̒. Otaawa tutu li paapau̒ deu̒ yio̒lo tamamowali olongia lo Isirai̒lu wau deu̒ wau̒ mamoo̒tapu mao̒ huhuloa̒a to tibawaamu.” 18 Lapatao̒ tei Dauda wolei Yonatan malohutu daantia u mosaahabatia totalu lo Eeya. Lapatao̒ uito tei Yonatan malo hualinga ode belelio, hiambola tei Dauda debo bilu-biluloa̒ to Hores. 19 Lapatao̒ dengolo lota talonto Jip mota lotaalua woli olongia to Gibea wau loloi̒ya mao̒, “Tei Dauda tuutuuo̒ tomadala lo mongowatotia todelomo gogoowaalo totili lo Hores, toitaato Huludu Hakhila to ambabu huliaalio huta u luasi daa̒ wau delita lo Yehuda. 20 Otaawa lo mongowatotia, deu̒ ti Baginda ohilaa daa̒ moheu̒pa olio; sababu uito, ponao̒lo mai ode madala lo mongowatotia. Pongakua mai lo mongowatotia deu̒ ti Baginda tantulo mao̒ moo̒ pontoa̒a olio.” 21 Tei Saul lolametao̒, “Pohileaala dua̒ timongoli balakatia mai lo Eeya sababu helohutu u mopiohe to olau̒. 22 Ponao̒lo wau muli tantuwalo mao̒; palakisailo lou̒ tio̒otutua tou̒toonu ilowoluwoa lei Dauda wau tatoonu tamaa loo̒onto olio mola teto. Ilodungoheu̒ deu̒ tio laba-labaalo motota. 23 Oditolio palakisailo wolo ulintapo gogoowaalo u mapee̒enta lowali tambati pilo tituua̒lio, wau muli pohualingai odia u mopodulohe olau̒. Lapatao̒ wau̒ mamonao̒ pee̒-pee̒enta woli mongoli, wau wonu tio donggo woluo tomadala boito, tantu malolohuu̒, penu boli musi anta-antangou̒ mao̒ ngoilanggubu Yehuda!” 24 Yi malo monggatolo tau-tauwala boito luli lohualinga ode Jip lotimulo wolei Saul. Tou̒ boito tei Dauda wau tahidudua̒ olio tohuta u luasi daa̒ wau delita lo Maon, to lumbaya u molilo tomadala huliaalio huta u luasi daa̒ wau delita lo Yehuda. 25 Tei Saul wau suludadulio lonao̒ mai ohilaa mololohe olei Dauda, bo tau lopoo̒taa mao̒ sua̒li boito odelei Dauda, tilinggula tio malonao̒ mola ode hui̒dee botu tohuta u luasi daa̒ wau delita lo Maon wau lotibiluloa̒ mota teto. Tou̒ ilotaawa lei Saul sua̒li boito, yi tio hua̒a lohilapita mota olei Dauda. 26 Tei Saul wau suludadulio lonao̒ to biihu hui̒dee wimbihia, hiambola tei Dauda wau tahidudua̒ olio tobiihu wimbihito mola. Tei Dauda hua̒a lolahi lonto olei Saul tamalo lumula lomala ohilaa moheu̒pa olimongolio. 27 Bo debolo malonao̒ mai utolia ngota lopo duloheo̒ olei Saul wau loloi̒ya mao̒, “Patutilio ti Baginda hua̒a mohualingolo! Taulo Pilistin maloluhu lipunto!” 28 Lapatao̒ tei Saul malo pohuheli mao̒ hemo hilapita olei Dauda, wau lonao̒ mota loluhu wau loluwali taulo Pilistin. Uitolo sababuulio tambati boito iluntelio Hui̒dee Pomua̒ala. |
LAI 2006
Indonesian Bible Society