BOHULO SEMUEL 22 - KITABI HABARI MOPIOHE

Mongo iimamu hepilatelio yila-yilateelo mao̒

¹ Lapatao̒ tei Dauda lololaa mao̒ kota Gat wau lotituuo̒ togowa membideo̒ lokota Adulam. Tou̒ wutatio hihuulanga wau ngoa̒amila ngaalaa̒lio loo̒dungohe deu̒ tio woluo teto, yi malonao̒ mai timongolio ode olio.

² Wau olo tau-tauwalo tahi deehea, taa obiloli, wau taa lolaasa diila ilolulia lohilao, ngoa̒amilalo helo paanggala wolei Dauda, wau tei Dauda lowali tau̒wa limongolio. Jumulaa lo tahidudua̒ olei Dauda tanu wopato hetuto lota.

³ Lonto gowa boito tei Dauda lonao̒ mola ode Mispa to Moab wau loloi̒ya mao̒ odeli olongia lipu lo Moab, “Poluwasia mao̒ tiyamo wau tiilo lo watotia motibiluloa̒ toli Tuani lo watotia, dilumutu otaawa lo watotia wolo makusudu mai lo Allahu Taa̒ala ode watotia.”

⁴ Lapatao̒ mongo dulaa̒lio boito dilelolio mai odeli olongia lipu lo Moab, wau timongolio debo mola teto ngotilonggadu tei Dauda tuutuua̒ to gowa.

⁵ Tou̒ dulahee tuwau ngotaalio lo nabi tai̒lunte Gad lonao̒ mai odelei Dauda wau loloi̒ya, “Diila mao̒ potibiluloa̒ togowa botie, hua̒a ponao̒lo ode huta lo Yehuda.” Lapatao̒ malonao̒ tei Dauda wau tilumuwota ode oa̒ayua lo Keret.

⁶ Tou̒ dulahee tuwau tei Saul donggo hulohuloa̒a towalungo bungo lo ayu tamariska toitaato huludu to Gibea; tio dihudihu totobui̒o hiambola ngoa̒amila pogaweelio hitihula to palitio. Tou̒ tio loo̒dungohe deu̒ tambati lei Dauda wau tahidudua̒ olio mai̒lotaawa,

⁷ yi tio loloi̒ya mao̒ ode mongo polowilalio boito, “Dungohilo mai, wuu tau-tauwalo Benyamin! Wolo tei Dauda boito mamongohi mai olimongoli halabolu wau ileengi lo angguru? Wolo timongoli ngoa̒amila mapuduo̒lio mowali polowila todelomo suludadulio?

⁸ Wolo mau̒itolo uloo̒ sababu olimongoli helo woomboa moluwali olau̒ wau diaaluo penu boli ngotaa mao̒ talo poo̒taa mai olau̒ deu̒ walau̒uu̒ lohihilao malo tiwambao̒ odelei Dauda boito? Diaaluo penu boli ngotaa mao̒ limongoli talo mikiilangi mola batangau̒ meaambo lopoo̒taa mai olau̒ deu̒ tei Dauda, tauu̒ lohihilao, to saaa̒ti botie donggo hemohima ohiyango u momate olau̒ mate-mateelo mao̒, wau deu̒ tei Yonatan walau̒uu̒ malo huntulao̒ olio!”

⁹ Tei Doe̒g tau̒wa loditi lo bibiahu lei Saul, woluo olo teto wolo mongo polowila lei Saul, lapatao̒ tei Doe̒g loloi̒ya, “Watotia maloo̒onto olei Dauda lonao̒ mai odelei Ahimelek walae̒e Ahitub to Nob.

¹⁰ Tei Ahimelek malohile potuhata to Eeya tomimbihu wolo u musi pohutuo lei Dauda. Wewolio mao̒ leeto tei Dauda tilomeu̒lio olo wolo ua̒alo wau yilohilio mao̒ olio wamilo lei Goliat, taulo Pilistin boito.”

¹¹ Lapatao̒ ti olongia malei̒ tiangai oli Iimamu Ahimelek wau ngoa̒amila mongo ilaatio talowali iimamu to Nob; yi malonao̒ mai timongolio lotaalua wolio.

¹² Ualei Saul odelei Ahimelek, “Dungohilo mai, wuu walae̒e Ahitub!” Tametio mao̒, “Saaya, Baginda!”

¹³ Yilintu mao̒ lei Saul olio, “Yilongola yio̒ malo heeluma wolei Dauda moluwali olau̒? Yilongola tilomeu̒mu tio wolo roti wau yilohiyamu wamilo wau pilo hileyamu mao̒ potuhata lonto Allahu Taa̒ala? Oditolio botia tio moluwali olau̒ wau donggo hemohima ohiyango u momate olau̒ mate-mateelo mao̒.”

¹⁴ Lapatao̒ tei Ahimelek lolametao̒, “Diila tei Daudaalo polowila li Baginda tamalo odito tatapu wau molotolo hilao? Tio yito moluhengi Baginda lohihilao, tau̒wa lo tamoo-kawalia li Baginda lohihilao, wau hepasisia daa̒ lotaa ngoa̒amila todelomo bele biluloa̒ saaha li olongia li Baginda.

¹⁵ Memangi, watotia malo molohone mola potuhata lonto Allahu Taa̒ala ode olio, bo diila boheli bohulio watotia helohutu mao̒ uito. Tomimbihu heeluma moluwali oli Baginda, diila mao̒ potulude mai li Baginda ode watotia meaambo penu boli ngotaa mao̒ todelomo ngaalaa̒ lo watotia. Watotia diili motota lolo-loolo pasali lopalakala boito!”

¹⁶ Bo ti olongia loloi̒ya mao̒, “Ahimelek! Yio̒ wau ngoilanggubu mongo ilaatamu musi mate.”

¹⁷ Lapatao̒ tio helo poa̒hu mao̒ to tamoo-kawalia tatihu-tihula totililio, “Ntali, pateaalo mate-mateelo mao̒ mongo iimamu lo Eeya boito! Timongolio malo heeluma wolei Dauda. Otaawa limongolio deu̒ tei Dauda malolahi, bo timongolio diila lohuto lopoo̒taa mai olau̒.” Bo tamoo-kawalia boito diila lohuto lomate yila-yilateelo mao̒ mongo iimamu lo Eeya boito.

¹⁸ Sababu uito malo loi̒ya tei Saul odelei Doe̒g, “Ntali aliheo̒! Yio̒olo tamomate olimongolio mate-mateelo mao̒!” Yi malo dudulao̒ tei Doe̒g wau hepilatelio yila-yilateelo mao̒ mongo iimamu boito. Todulahee boito tio loo̒pate yila-yilateelo mao̒ walu lopulu lota iimamu tao̒haku momake boo̒ li iimamu.

¹⁹ Tei Saul olo helo poa̒hu u lomate yila-yilateelo mao̒ ngoilanggubu ulipu lo Nob, kota lo iimamu boito; mongo lolai̒, mongobua, tau̒kekeei̒ wau tau̒nge wau olo sapi, kolodai wau himba, ngoa̒amilalo piloo̒ pulitio nyawalio.

²⁰ Bo tei Abyatar, ngotaalio lo walae̒e Ahimelek loo̒lahi. Tio lolahi odelei Dauda,

²¹ tulusi lopoo̒taa mao̒ deu̒ tei Saul malomate yila-yilateelo mao̒ mongo iimamu lo Eeya.

²² Yi malo loi̒ya tei Dauda olio, “Tou̒ iloontongau̒ tei Doe̒g mola teto todulahee boito, bolo ilotaawau̒ lou̒ tantu deu̒ tio mamopo duloheo̒ odelei Saul. Oditolio wau̒ulo tatihu-tihulo to opopate lo ngoilanggubu mongo ilaatamu.

²³ Potibiluloo̒lo wolau̒ wau diila mao̒ oohe. Tei Saul ohilaa momate olemu mate-mateelo mao̒, wau tio olo ohilaa momate olau̒ mate-mateelo mao̒. Oditolio, yio̒ maa̒amani to tambati botie.”