BOHULO SEMUEL 21 - KITABI HABARI MOPIOHE

Tei Dauda lolahi lonto olei Saul

¹ Yi malonao̒lo tei Dauda odeli Iimamu Ahimelek to Nob. Wolo iloohea tei Ahimelek yilumualai loduunggaya wolei Dauda wau lohintu mao̒ olio, “Yilongola yio̒ lonao̒ mai odia tutuuwau wambai̒o?”

² Tametao̒ lei Dauda, “Watia mailuduwalio tuugasi tuwau li Baginda wau dilinilio mopoo̒taa penu boli olita pasali lo tuugasi boito. Sababu uito tahidudua̒ olaatia mapilei̒ yimaa mao̒ lowatia totambati tuwau.

³ Maa̒apu, botia watia ohilaa mohintu, ua̒alo wolo uwoluo toli Paapa? Wohiyalo mai olaatia limo lobotu roti meaalo penu boli wolo wambai̒o uwoluo tewe.”

⁴ Lapatao̒ uali iimamu boito, “Wau̒ diila oroti biasa, bo roti podewo uwoluo; yio̒ mowali mohama mao̒, asali tahidudua̒ olemu diila helohule boheli boti-boti mao̒.”

⁵ Tei Dauda lolametao̒, “Tantulo mao̒ timongolio diila helohutu uito. Laito wonu amiaatia otuugasi, tahidudua̒ olaatia hemodaha mao̒ alihu timongolio belesi modudua̒ao̒ to agama, lebe-lebe pomao̒ biasaalio uito bo duo̒lo tutuu gasiyalo biasa; tidiyolo mao̒ tuugasi u tolomodu debo odelo masaatia botie!”

⁶ Lapatao̒ ti iimamu boito longohi mao̒ odelei Dauda roti podewo boito, sababu uwoluo to olio bo wambao̒ roti u podewolo ode Allahu Taa̒ala, wau mabilintao̒ lonto mesba u tiluloa̒a wolo roti bohu. (

⁷ Letaahua, tei Doe̒g taulo Edom, tau̒wa loditi lo bibiahu lei Saul woluo teto todulahee boito u lopoo̒polu mao̒ tuwaulio u wajibu to agama.)

⁸ Lapatao̒ malohintu tei Dauda odelei Ahimelek, “Wolo ti Paaa̒ tahutahu totobuo̒ meaambo wamilo u mowali pomake lowatia? Palenta li Baginda boito bolo tilimahuo̒lo mola tilinggula watia lomonggata wolo tametamea̒a daa̒ wau diilalo ilohiyango helohama wamilo meaambo tingolo uwewo.”

⁹ Lapatao̒ tei Ahimelek lolametao̒, “Wau̒ lolahu mao̒ wamilo lei Goliat, taulo Pilistin tapilatemu yila-yilateelo mao̒ to Lumbaya lo Ela boito; wamilo boito woluo to dibalaka loboo̒ li iimamu, bolubolu todelomo kaingi. Wonu yio̒ mohuto, hamaalo mao̒, sababu bo uitolo tingolo uwoluo tewe.” Ualei Dauda mao̒, “Wamilo boito wamilo u mopiohe tutu to ngoilanggubu lipu, wohiyalo mai uito olaatia!”

¹⁰ To dulahulo boito tei Dauda malolahi lonto olei Saul, lapatao̒ leidungga mola odelei Akhis olongia lokota Gat.

¹¹ To olei Akhis piloo̒taa mao̒ lomongo pogaweelio odie mola, “Diila maatio botie tei Dauda, olongia to lipulio? Wau diila maduo̒lo oliyolo mongobua tou̒ boito helo ngelu-ngelungo sambela hipolahua mola odie, ‘Tei Saul helomate yila-yilateel mao̒ hilihu-lihua musu, bo tei Dauda hipulu-pulua lolihu?’ ”

¹² Tataa-heyaalo boito helomuyu pikiilangi lei Dauda, wau tio mailoohe daa̒ toli Olongia Akhis.

¹³ Sababu uito, totalu ulipu tei Dauda helo tia̒akali debo odelo taa biyongo. Tou̒ timongolio helo himontala molahangi olio, tio lotihutu debo odelo tadiila o pikiilangi, tio helongahu-ngahu huhebu lokota wau helo poluli wiyohio hilumeheto ode danggulio.

¹⁴ Lapatao̒ tei Akhis loloi̒ya mao̒ ode mongo pogaweelio, “Wolo timongoli diila loo̒onto deu̒ tau boito biyongo? Yilongola dilelo mai limongoli odia tio?

¹⁵ Wolo donggo ii̒ilangi taa biyongo to palituu̒, tilinggula luli dilelo mai limongoli taa biyonga ngota ode beleu̒ botie?”