BOHULO SEMUEL 20 - KITABI HABARI MOPIOHE

Tei Yonatan helo tulungi olei Dauda

¹ Yi malolahi tei Dauda lonto Nayot membideo̒ lo Rama wau mola lodunggaya wolei Yonatan, lapatao̒ lohintu mao̒, “Wolo totalau̒? Ololeeto wolo u mapilohutuu̒ wau wolo dusaau̒ toli Paapamu tilinggula tio ohilaa momate olau̒ mate-mateelo mao̒?”

² Tametao̒ lei Yonatan, “Diila mao̒ poloi̒ya odito! Domi Eeya, yio̒ diila tapateelio mate-mateelo mao̒. Ti Paapau̒ laito hemopoo̒taa mai olau̒ ngoa̒amila lanjanaalio, mopio upolohuna daa̒, meaambo udiila. Oditolio diila pongalo aakali ti Paapau̒ momuli makusuduulio boito olau̒. Sababu uito, wolo uiloi̒yaamu boito diila otutu!”

³ Tei Dauda lolametao̒, “Otaawa tutu li Paapamu deu̒ yio̒ motolia̒nga olau̒. Oditolio tantulo mao̒ tio diila mohuto mopoo̒taa mao̒ sua̒li boito olemu alihu yio̒ diila mao̒ suukali. Penu boli woloolo mola olo, domi Eeya tatumu tumulo, tutuulio tutu tutumuluu̒ debo odelo putito tohuudio lotunge!”

⁴ Lapatao̒ malo loi̒ya tei Yonatan, “Penu boli wolo wambai̒o u pohileemu mapo hutuwou̒ mao̒.”

⁵ Tei Dauda lolametao̒, “Odie, loombu yito Potihunggu lo Hulalo Bohu, wau patutilio wau̒ molamela pee̒-pee̒enta woli baginda. Bo wonu yio̒ akolo, wau̒ mamonao̒ wau motituuo̒ tohuta datahu wau luasi tunggula ngoonu lou̒ hui.

⁶ Wonu ti Paapamu mohintu mai yilongola wau̒ diaaluo, polelea mao̒ oli paapamu, deu̒ wau̒ malohile luasi to olemu u hua̒a mohualinga mola ode Betlehemu, sababu mola teto hepo woluwoalio upacala lobake timii̒du taunu ode ngoa̒amila ngaalaa̒au̒.

⁷ Wonu ti olongia moloi̒ya mai, ‘Ooo̒,’ yi wau̒ maa aamani, bo wonu ti olongia moingo, ototailo mao̒ deu̒ ti olongia malohama putuusani umopo topotala olau̒.

⁸ Wau̒ mei̒ tulungi olemu, sababu ito malo daantia totalu lo Eeya. Bo wonu wau̒ ototala, pateaalo mai wau̒ mate-mateelo mao̒, bo diila mao̒ wuduo wau̒ odeli paapamu.”

⁹ Tametao̒ lei Yonatan, “Diila mao̒ polawalo! Wonu otaawau̒ lou̒ tantu deu̒ ti paapau̒ mai̒lo teekati umopo topotala olemu, tantulo mao̒ mapoleleu̒ mai olemu.”

¹⁰ Lapatao̒ tei Dauda lohintu mao̒, “Tatoonu tamaa mopoo̒taa mai olau̒ humayaalio ti paapamu molametai olemu wolo yingo-yingo daa̒?”

¹¹ Tulusi ualei Yonatan mao̒, “Duloolo ito monao̒ mola ode huta datahu wau luasi.” Yi malonao̒lo timongolio pee̒-pee̒enta ode huta datahu wau luasi.

¹² Lapatao̒ tei Yonatan loloi̒ya mao̒ odelei Dauda, “Pohileaala dua̒ Eeya, Allahu Taa̒ala lo Isirai̒lu mowali sakusi olanto! Loombu mola dimodupo meaambo ngoonu tanu towakutu debo odelo masaatia botie, wau̒ mamo tolopani u molapu mao̒ tuango hilaa li paapau̒. Wonu tio o siikapu mopiohe olemu, mapoleleu̒ mai olemu.

¹³ Wonu tio oniyati mopotopotala olemu, tantu mapoo̒taau̒ mai olemu olo alihu yio̒ moo̒ poa̒ahu batangamu. Pohileaala dua̒ Eeya momate mai olau̒ mate-mateelo mao̒ wonu sua̒li boito diila o pohutuwou̒. Pohileaala dua̒ Eeya motulungi mai olemu debo odelo tio matilulu-ngiaalio mai olo!

¹⁴ Wau wonu wau̒ donggo tumutumula mola, eelailo mao̒ dantiyaanto totalu lo Eeya wau potatapulo wau polootola mola hilao to olau̒; bo wonu madiduu̒,

¹⁵ pobiloheelo otatapu wau olootolo hilaamu ode waliu̒ mola u ohiheo-hiheolo mao̒. Wau wonu bolo Eeya mopobinasa ngoa̒amila musuumu,

¹⁶ diila mao̒ daantia to wolotanto duulota mobunto. Wonu bolo mobunto, yi Eeyaalo tamaa mohukuumani mai olemu.”

¹⁷ Oditolio u oluolio tei Yonatan lopoa̒hu olei Dauda lodantia mamo tolia̒nga olio, sababu tio motolia̒nga olei Dauda debo odelo batangalio lohihilao.

¹⁸ Lapatao̒ malo loi̒ya tei Yonatan olio, “Loombu mola Potihunggu lo Hulalo Bohu. Tantu mao̒taahua deu̒ yio̒ diaaluo, sababu tambatimu diila otua tomeja polamelalo;

¹⁹ tidiyolo mao̒ ngoonu! Sababu uito ponao̒lo ode tambati pilo tituua̒mu omoo̒omolu boito, wau pohimaalo mao̒ todibalaka huuntua lobotu mota teto.

²⁰ Ngoonu wau̒ mamo lopatai mohelu totolu walao̒ pana ode mantahu botu boito, debo odelo mamo ngantade mota tambatilio.

²¹ Lapatao̒ maa ahulau̒ mota watou̒ mohimoa̒i papaa-nawaalo boito, wau wonu wau̒ moloi̒ya mao̒ olio, ‘Ai, pana boito lebe membideo̒ poli odia mai; hamaawa mao̒,’ uito boliilio deu̒ yio̒ aamani wau mowali lumualao̒. Wau̒ motadia mai domi Eeya tatumu tumulo deu̒ yio̒ diila todelomo marapo penu boli loolo.

²² Bo wonu wau̒ moloi̒ya mao̒ ode watou̒, ‘Ai, pana boito lebe molaminga mola poli,’ uito boliilio Eeya mopoa̒hu olemu monao̒; oditolio ponao̒lo.

²³ Pohileaala dua̒ Eeya modaha mai alihu ito ohiheo-hiheolo mao̒ modihu daantia to wolotanto duulota.”

²⁴ Yi malo tituuo̒olo tei Dauda tohuta datahu wau luasi. To Potihunggu lo Hulala Bohu, ti Olongia Saul lonao̒ mai ode totamelo.

²⁵ Debo odelo biasaalio tio hemo tihuloa̒a totili lo dingingo; tei Yonatan lohama mao̒ tambati totalulio, tei Abner to ngotuali lei Saul, bo kadera lei Dauda debo diila otua.

²⁶ Bo tei Saul diila loo̒ tanggulao̒ sua̒li boito todulahee boito, sababu to pikiilangilio mola, “Otanu tei Dauda ilodungga lou̒ sua̒li u hitua-tuawua, tilinggula tio diila belesi modudua̒ao̒ to agama.”

²⁷ Todulahee u wumbutio mola, deu̒yito-yito dulahe oluolio lo Hulala Bohu, kadera lei Dauda debo diila otua olo, lapatao̒ malohintu tei Saul olei Yonatan, “Yilongola olaango wau to dulahee botie tei Dauda diaaluo to totamelo?”

²⁸ Tei Yonatan lolametao̒, “Tio malohile luasi olaatia lonao̒ ode Betlehemu.

²⁹ Ualio mao̒, ‘Poluasia mai wau̒ monao̒, sababu ngaalaa̒au̒ donggo hemopolame potihunggu lobake to Betlehemu, wau wau̒ ilahula mai lowutatuu̒ tamohuhula. Sababu uito, wonu poluasiyomu, huliilo mai wau̒ monao̒ mola modunggaya wolo mongo ilaatau̒.’ Uitolo sababuulio tio diaaluo to totamela botie, Paapa.”

³⁰ Loo̒dungohe uito tei Saul maloingo olei Yonatan wau loloi̒ya mao̒ olio, “Walao̒ haramu! Botia mailo taawau̒ deu̒ yio̒ lotiwambao̒ to olei Dauda wau lopoo̒olito batangamu wau limaamamu!

³¹ Wolo yio̒ diila mongalati deu̒ ngotilonggadu tei Dauda tumu-tumulo yio̒ diila tamowali olongia tolipu botie? Botia pei̒ lolohelo mai tio wau delowa mai odia, sababu tio musi mate!”

³² Yi tametao̒ lei Yonatan, “Yilongola tio musi mate? Wolo dusaalio?”

³³ Loo̒dungohe uito tei Saul lopomahulao̒ totobui̒o odelei Yonatan mamomate olio mate-mateelo mao̒. Deu̒ito bolo ilotaawa mao̒ lei Yonatan deu̒ ti paapalio memangi tio̒otutua oniyati ohilaa mamomate olei Dauda mate-mateelo mao̒.

³⁴ Wolo yingo-yingo daa̒ tei Yonatan lololaa mao̒ meje lo totamelo wau diila lolamelao̒ wolo-wolo todulahee oluolio to Potihunggu lo Hulalo bohu boito. Malo siluukali hilaalio hemotolo mikiilangi mola olei Dauda tamaa hilina lei Saul tipaapalio.

³⁵ Loombu mola dulahio tei Yonatan malonao̒ ode huta datahu wau luasi mola lodunggaya wolei Dauda debo odelo u mailanjana mao̒ limongolio duulota. Tio lodelo walao̒ talolai̒ ngota, watolio,

³⁶ lapatao̒ loloi̒ya mao̒ olio, “Ntali, yimoa̒alo mai papaa-nawaalo u mapomanau̒ mota.” Sambela walao̒ boito donggo tete-teteea̒ mota, tei Yonatan malo pomana mota pana ngoputu yilumaodeo̒ towalao̒ boito.

³⁷ Tou̒ walao̒ boito leidungga mota ode tambati u pilodehua lopana boito, tei Yonatan malo ngiibode mota olio, “Ai, pana boito lebe molaminga poli odito mola!

³⁸ Poa̒lihe ngopee̒, diila bo pomikiilangi layangao̒-layangao̒!” Walao̒ boito lohama pana boito wau luli lohualingai odeli tuanilio.

³⁹ Tio sama-samaata diila mongalati patuju lo tataa-heyaalo lei Yonatan boito, bo tei Yonatan wolei Daudaalo tamongalati.

⁴⁰ Lapatao̒ tei Yonatan longohi mao̒ pakaakasi pomanalio to walao̒ boito wau luli lei̒ walingao̒ olio ode kota.

⁴¹ Tou̒ walao̒ boito malonao̒, tei Dauda yilumualai lonto dibalaka huuntua lobotu boito, tulusi losujudu lomola poo̒otolu. Mopio tio boli tei Yonatan, duduulotalo maa hilumoyongo tou̒ timongolio lodidiilao̒. Osuukali lei Dauda lebe udaa̒ mao̒ wolo osuukali lei Yonatan.

⁴² Lapatao̒ malo loi̒ya tei Yonatan odelei Dauda, “Pohileaala dua̒ Allahu Taa̒ala motulungi mai olemu. Eeya mamotuli mai olanto wau waliinto mola laito modihu mao̒ daantiyanto duulota totalu lo Allahu Taa̒ala.” Lapatao̒ uito malonao̒lo tei Dauda, wau tei Yonatan olo malo hualinga ode kota.