BOHULO SEMUEL 2 - KITABI HABARI MOPIOHE

Dua̒ li Hana

¹ Lapatao̒ ti Hana helodua̒, ualio mao̒, “Eeya lopo wengahei hilaa lo watotia; huhutuu-Lio loo̒sanangi jiwa lo watotia. Wolo laasa sanangi tutu hilenteo̒ watotia musu lo watotia, sababu otu-otutuulo mao̒ Allahu Taa̒ala malo tulungi olo watotia.

² Diaaluo tamantali debo odelo Eeya! Bo Tio tamowali mongohi mai poloduo̒lo.

³ Otongaalo loi̒yamu u latabu! Poo̒pulitalo tabibo u mangimangi! Sababu Eeya boito Allahu Taa̒ala talaba-labaalo paahamu; tamomutoo̒ totoonulalo huhutu lotau.

⁴ Buutio̒ lotaa molotolo daa̒ boli buheli malo bolilo mola, bo lebe hemo lotolao̒ taa molulupuhu.

⁵ Taa u muloololio mai hibutuhe sababu ilolaabawa tutu lou̒ aalo, botia lowali buru tahe wuupaalo bo u moo̒tapu mao̒ ua̒alo. Taa u muloololio mai hipolaanga, botia ilolulia lohilao, ilotuheta lou̒ aalo. Dile bintela, botia meengahu, pitulota walao̒ mapilo tutulio mai! Bo tiilo tadadaata walai̒o, tilolaalio, pilolulilio mao̒ modutolo.

⁶ Eeya moo̒pate, Tio olo moo̒tumulo. Ode dunia lotaa yilate yilaa-Hio mola manusia. Wau Tio olo tamomintaa̒ mola monteto mai.

⁷ Woluo taa u pilohutu-Lio mosikini, woluo olo taa pilohutu-Lio kaya. Woluo taa u pilodupapa-Lio, woluo olo tapilo polai-I̒o

⁸ Monto dutolo bilinta-I̒o taa diila ohalata, monto polodutolo bilebasia-Lio taa u hina. Timongolio pilopowali sahaabati lo lotahi bangusawa, wau yilohiyalio huhuloa̒ u huru-hurumati. Wapidu huta Eeyaalo tao̒ huu̒wo, toitaatio bilongu-Lio dunia.

⁹ Taa tatapu wau molotolo hilao laito aamani todelomo poloduo̒lo Eeya. Bo tau moleeto moa̒ntulu wau binasa todelomo udiila botie mobaango wau modio̒loma daa̒. Lotolo hihilao diila mowali pomangga, olootolo manusia diila mongohi ohohaama.

¹⁰ Mumuu-suuwaalo Eeya lotoyopuulo mola, timongolio moohe; lonto hulungo Tio loti bulonggodei. Eeya mamomutoo̒ ngoilanggubu dunia botie, wau mongohi mai kawasa u molamahu ode olongia tatilulao-Tio.”

¹¹ Lapatao̒ malo hualingolo tei Elkana wau ngaalaa̒lio ode Rama, bo tei Semuel, walao̒ boito, lotibiluloa̒ to Silo wau helomaya to Eeya to imato li Iimamu Eli.

Mongo walae̒e Eli

¹² Mongo walae̒e Eli hileeta daa̒. Timongolio diila momandungi to Eeya

¹³ wau odelo iimamu timongolio helohutu totoonulalo otohilaa limongolio to bangusa lo Isirai̒lu. Wonu humayaalio woluo taa u mopodewo bake, tamomantua li iimamu monao̒ mai modelo tutunggoo̒ omatolio totolu. Tou̒ tapu boito donggo helaheelio,

¹⁴ tutunggoo̒ boito powunggoi̒o mola ode delomo panji tambati lotapu u hetubuolio boito, lapatao̒ penu boli wolo wambai̒o u obantanga ode bulemengio wolo tutunggoo̒ boito mowali haku li iimamu. Ngoa̒amila taulo Isirai̒lu talonao̒ mai lonto Silo mai lopodewo bake hepilo hutulio debo odelo uito.

¹⁵ Tumbao̒ tingga maito tamomantua boito monao̒ mai tou̒ tabolio diipo bilua̒alio u lalangolo, lapatao̒ tio moloi̒ya mao̒ totaa u hemopodewo bake boito, “Wohia mai tapu u donggo meenggo boito odeli iimamu alihu panggangiolio; tio diila mohuto tapu uilahe.”

¹⁶ Wonu tau boito molametao̒, “Opiohelio ito modungoheo̒ wuu̒du, wau molalangao̒ meimulo tabo boito; lapatao̒ uito bolo hamaamulo totoonulalo u otohilaamu,” yi tamomantua boito moloi̒ya mao̒, “Diila, botiaalo musi wohimu mai, wonu diila, mahamaau̒ wolo pakusa.”

¹⁷ Odi-odieelo mola walae̒e Eli taduulota boito heilodusa daa̒ to mato lo Eeya, sababu bo hea̒nggapuo limongolio gambangi dewo lobake ode Eeya.

Tei Semuel to Silo

¹⁸ Tou̒ boito, tei Semuel tadonggo ukikiia̒ boito tulusi hemomaya to Eeya. Tio helomake boo̒ tolomodu lonto kaingi lineni, debo odelo boo̒ ibaadati lomongo iimamu.

¹⁹ Timii̒du taunu tiilolio hemohutu jumba kikiio̒ lapatao̒ hewohilio odelei Semuel wonu taabua boito pee̒-pee̒enta wolo dilelio monao̒ mai mopodewo bake timii̒du taunu.

²⁰ Yi tei Eli helo balakati olei Elkana wau dilelio, wau loloi̒ya mao̒ tio odelei Elkana, “Pohileaala dua̒ Eeya muli mongohi mai tau̒kekeei̒ olemu monto oli dilemu botie, u molowoli mao̒ walao̒ tamailudu limongoli ode Eeya.” Lapatao̒ uito malo hualingolo timongolio ode Rama.

²¹ Ti Hana bilalakatia lo Allahu Taa̒ala, tilinggula luli lopotutu mai walao̒ mongo lolai̒ toulota wau mongobua duulota. Tei Semuel olo heo̒duhenga mola udaa̒alio tou̒ tio hemomaya to Allahu Taa̒ala.

Tei Eli wau mongo walai̒o

²² Tei Eli mapanggola daa̒. Tio mololaalaaita hemoo̒ dungohe dudulohu tomimbihu pii̒li lomongo walai̒o to taulo Isirai̒lu. Otaawa lei Eli olo deu̒ mongo walai̒o boito hemotuluhe wolo mongobua tahe otuugasia totalu lohuhebu Kema Owoluo lo Eeya.

²³ Sababu uito malo loi̒ya tio ode mongo walai̒o boito, “Wau̒ malo lolimo dudulohu lonto ngoilanggubu umati tomimbihu pii̒li limongoli u moleeto. Yilongola timongoli helohutu odito?

²⁴ Diilalo mao̒ pohutu odito, walau̒uu̒. Otutu moleeta daa̒ wolo u hebisalaa umati lo Eeya tomimbihu olimongoli!

²⁵ Wonu tau ototala to manusia, yi Allahu Taa̒ala mowali mopodulua olio; bo wonu tau odusa to Eeya, tatoonu tamowali motulungi olio?” Bo timongolio diila momandungi nasehati lei Eli tiyamo limongolio, sababu Eeya malolantu mai u momate olimongolio mate-mateelo mao̒.

²⁶ Bolii̒o mao̒ tei Semuel, walao̒ boito, mahe udaa̒ mola wau lebe aahudulio, mopio duo̒lo Eeya, boli duo̒lo ngoa̒amila tau.

Nubuwati tomimbihu ngaalaa̒ lei Eli

²⁷ Tou̒ dulahee tuwau malonao̒ mai nabi ngota odelei Eli wau lopo tunggulao̒ tahuli lo Eeya to olio, tahuda-Lio mao̒, “Tou̒ loluuhurumu tei Haruna wau ngaalaa̒lio lowali wato li olongia lo Masiri, Wau̒ malo poi̒laalo batanga-U̒ ode lei Haruna.

²⁸ Lonto totoonulalo suku lo Isirai̒lu matilulaotu-U̒ ngaalaa̒lio lowali iimamu-U̒, u momaya tomesba, momobu totabu, wau momake boo̒ lo epod wonu mobisala wola-U̒. Wau to limongolio boli wali limongolio mailohiya-U̒ haku u mohama mao̒ ngotayade monto bake podewo u yilalango tomesba.

²⁹ Oditolio, yilongola yio̒ donggo langgamuolo moo̒onto babaa-keyaalo u motuuu̒de wolo palentaa-U̒, u hepilo dewolio lo bangusaa-U̒ ola-U̒? Yilongola yio̒ Eli, lebe mohurumati mongo walau̒mu wolo mohurumati ola-U̒, wau hemopoluli mao̒ olimongolio mopolingohe batangalio wolo tayadu u mopiohe daa̒ monto timii̒du dewo lo bangusaa-U̒ ola-U̒?

³⁰ Wau̒ Eeya Allahu Taa̒ala lo Isirai̒lu, muloololio mai malodanti mai, deu̒ ngaalaa̒mu wau malagaamu mamomaya to ola-U̒ odelo iimamu u ohiheo-hiheolo mao̒. Bo botia Wau̒ diilalo mokahandaki sua̒li boito! Sababu tamo hurumati ola-U̒, mahurumatio-U̒ bo tamohina ola-U̒, mahinaa-U̒.

³¹ Dungohilo, mamei dungga wakutuulio Wau̒ mamomate mateelo mao̒ ngoa̒amila tabohulotau todelomo ngaalaa̒mu wau malagaamu, tilinggula diaaluo penu boli ngotaa mao̒ mongo lolai̒ todelomo ngaalaa̒mu mamoo̒oma mola tutumulo hayahaya.

³² Yio̒ masuukali mai wau molaasa mohiihia moo̒onto mao̒ totoonulalo balakati u mawohi-U̒ ode tau-tauwalo wewo to Isirai̒lu, hiambola todelomo ngaalaa̒mu lohihilao maamate donggo muda.

³³ Bo ngotaalio monto waliimu, mapoluli-U̒ mao̒ tumu-tumulo wau momaya ola-U̒ odelo iimamu. Bo tio mamowali pitoo̒ wau tumumulo wolo diila ohalapani. Ngoa̒amila waliimu uwewo maa opatealio mate-mateelo mao̒.

³⁴ Odelo bukuti deu̒ ngoa̒amila u pilotahuda-U̒ mai boito otutu mamotoduo, yi walau̒mu duulota boito, tei Hopni wolei Pinehas maamate todelomo u ngohui mola.

³⁵ Lapatao̒ Wau̒ maa molulaoto iimamu tau̒ tatapu wau molotolo hilao to ola-U̒ wau tamohutu mao̒ wolo upilo malentaa-U̒ olio. To olioolo mawohi-U̒ mai wali u laito mamotuugasi odelo iimamu totalu lomongo olongia tatilulaotu-U̒.

³⁶ Timii̒du waliimu tadonggo hitumula, mamo tahudeo̒ odeli iimamu boito u mohile doi wau ua̒alo. Tio mamolohone mao̒, “Polulia mai watia momantu tomongo iimamu, alihu watia moo̒ tamela penu boli bo ngeengito wamabao̒.”