BOHULO SEMUEL 19 - KITABI HABARI MOPIOHE

Tei Dauda heili-yililapita lei Saul

¹ Tei Saul loloi̒ya mao̒ odelei Yonatan walai̒o talolai̒, wau ode ngoa̒amila pogaweelio deu̒ tio ohilaa momate-mateelo mao̒ olei Dauda. Bo tei Yonatan motolia̒nga daa̒ olei Dauda,

² sababu uito tio loloi̒ya mao̒ olio, “Ti Paapau̒ hemo tolopani u momate-mateelo mao̒ olemu; oditolio poo̒dahailo mao̒! Loombu mola dumodupo potituuo̒lo to tambati tuwau udiila otaawa lotau, wau poti biluloo̒lo teto.

³ Wau̒ mamonao̒ mola ode huta datahu wau luasi pee̒-pee̒enta woli Paapau̒ wau timihulao̒ totili lotambati pilo tituua̒mu boito. Lapatao̒ wau̒ mamobisala mao̒ woli Paapau̒ tomimbihu makusudu li Paapau̒ to olemu, wau haasili lo bibiisalawa boito de mapoo̒taau̒ mai olemu.”

⁴ Lapatao̒ tei Yonatan helolele mao̒ u mopiohe pasali lei Dauda odelei Saul, ualio mao̒, “Paapa, diila mao̒ potopo talawa li Paapa wato li Paapa tei Daud. Sababu tio diila helohutu totala wolo-wolo toli Paapa; tumbao̒ bolii̒o mao̒, tio malo ojasa daa̒ toli Paapa.

⁵ Tio malo podutu lo nyawalio tou̒ lomate olei Goliat yila-yilateelo mao̒, wau Eeya malongohi mai ohohaama daa̒ ode Isirai̒lu lotimbulude olio. Ti Paapa lohihilao maloo̒onto u lotoduo mai boito, wau ti Paapa leengahe tou̒ boito. Oditolio, yilongola botia ti Paapa ohilaa mongalinaya taa u diila ototala wau mamomate olei Dauda mate-mateelo mao̒ lou̒ diila o alaasani penu boli wolo wambai̒o?”

⁶ Tei Saul malongalati toloi̒ya lei Yonatan, wau tio malotadia domi tanggulo Eeya deu̒ tio diila tamomate olei Dauda mate-mateelo mao̒.

⁷ Lapatao̒ uito tei Yonatan lotiangai olei Dauda, wau lohungguli mao̒ ngoa̒amila biisalawa engontie. Lapatao̒ tio lodelo mota olei Dauda odelei Saul, wau tei Dauda malomaya olio debo odelo muloololio mai.

⁸ Lapatao̒ luli lotoduo mai popaatea wolo taulo Pilistin. Tei Dauda heloluhu wau lopoo̒laaheo̒ olimongolio sama-samaata, tilinggula timongolio tilumeteo̒.

⁹ Tou̒ dulahee tuwau tei Saul donggo hulohuloo̒ to belelio wolo totobuo̒ to uluu̒lio wau debolo tei Saul luli nilao̒ mai lorohu moleeto uilao mai lo Eeya. Tou̒ boito tei Dauda donggo hemo poitohe kocapilio.

¹⁰ Lapatao̒ tei Saul lotolopani mopo lantongao̒ totobui̒o to olei Dauda uwoluo totili lo dingingo. Bo tei Dauda loo̒hei mao̒, tilinggula totobuo̒ boito leilantongo to dingingo. Tei Dauda loo̒ teteo̒ lopoa̒ahu batangalio.

¹¹ Tou̒ huilo boito tei Saul malolao dengolo lota ode bele lei Dauda u moheehula olei Dauda wau momate olio mate-mateelo mao̒ tou̒ dumodupio mola. Bo ti Mikhal dilelio loloi̒ya mao̒ olio, “Wonu yio̒ diila molahi tou̒ huilo botie, yi loombu mola dumodupo tantulo mao̒ yio̒ mapateelio mate-mateelo mao̒.”

¹² Lapatao̒ ti Mikhal malo potuhuta mola olei Dauda lonto tutulowa, wau tei Dauda loo̒lahi tilinggula loa̒ahu.

¹³ Lapatao̒ uito ti Mikhal lohama mao̒ bui̒ lodewa todelomo belelio tulusi pilopo dutulio totambati potuluhe lei Dauda. Lapatao̒ to ambahu lunggongio dilutualio alangulua lo lambuto batade, wau wumbutio mola bileu̒tio bui̒ boito wolo pohulooto.

¹⁴ Tou̒ mongo utolio lei Saul lonao̒ mai moheu̒pa olei Dauda, ti Mikhal loloi̒ya, “Tei Dauda donggo mongongoto.”

¹⁵ Bo tei Saul luli lopoa̒hu mota odito toli mongolio mota lomiloheo̒ wolo mato limongolio lohihilao. Palentaalio mao̒, “Mota delowalo mai odia tio pee̒-pee̒enta wolo tambati lo potuluhelio, alihu pateeu̒ tio mate-mateelo mao̒.”

¹⁶ Lapatao̒ tilumuwotao̒ utolio boito ode delomo huwali wau malo patatao̒ bo bui̒ u dutudutu totambati pootuluhelo wolo alangulua lambuto batade to ambahu lunggongio.

¹⁷ Lou̒ odito tei Saul malo loi̒ya odeli Mikhal, “Mailaba yio̒ mongaakali olau̒ odie! Musuuu̒ mabilantumu alihu molahi!” Tametao̒ li Mikhal, “Tio malo nganjamu u momate olaatia mate-mateelo mao̒ wonu watia diila mohuto motulungi olio molahi.”

¹⁸ Lapatao̒ tei Dauda loo̒lahi, yi tio malonao̒ mola odelei Semuel to Rama, tulusi lopoo̒taa mao̒ ngoa̒amila u pilohutu lei Saul olio. Lapatao̒ tei Dauda pee̒-pee̒enta wolei Semuel malonao̒ ode Nayot wau lotibiluloa̒ mota teto.

¹⁹ Bo to olei Saul piloo̒taalio deu̒ tei Dauda woluo to Nayot membideo̒ lo Rama.

²⁰ Sababu uito tei Saul malolao dengolo lota utolio mota loheu̒pa olei Dauda. Bo timongolio loo̒dungga ngopolemboa̒ nabi tadonggo hipongelu-ngelungawa wau hiwati-waatia̒ pee̒-pee̒enta, hetilau̒wa lei Semuel. Lapatao̒ utolia lei Saul boito kiluwaasa mai lo Rohullah tilinggula timongolio olo mahelo ngelu-ngelungo wau hiwati-waatia̒.

²¹ Tou̒ habari boito tilinggula mola odelei Saul, yi tio luli lolao mongo utolio uwewo wau timongolio olo mahelo ngelu-ngelungo wau hiwati-waatia̒. U otolulio tei Saul lolao mongo utolio yi odito olo uhelo toduo toli mongolio.

²² Sababu uito tei Saul malo monggata mola ode Rama. Tou̒ tio leidungga to ali leidaa̒ to Sekhu, tio malohintu wonu tou̒toonu ilowoluwoa lei Semuel wolei Dauda, wau taa mota teto lopoo̒taa mao̒ olio deu̒ timongolio woluo to Nayot.

²³ Oditolio tio tulusi mola odito, bo tio olo kiluwasa mai lo Rohullah tilinggula helo ngelu-ngelungo wau helo ngua-nguatio̒ to ngohilayaa̒ lo Dalala ode Nayot.

²⁴ Tou̒ leidungga mola odito tio malohinggi pakeyangilio wau helo ngelu-ngelungo wau helo ngua-nguatio̒ totalu lei Semuel, lapatao̒ loombahe mola ode huta lou̒ laalaala ilo-ilolaanga wau ilo-iloonua. (Uti-utieelo asaliilio mai lo pohumaya u tingohio odie mola, “Wolo tei Saul olo mowali nabi?”)