BOHULO SEMUEL 18 - KITABI HABARI MOPIOHE

^1-2 Lapatao̒ tei Saul wolei Dauda yilapato lobibii-salawa, tei Dauda piludui̒o lei Saul lowali pogaweelio wau tumulalo mao̒ todulahee boito tio diila yilohilio lohualinga ode bele lomongo dulaa̒lio. Tei Yonatan walae̒e Saul talolai̒, maloo̒ dungohe bisala boito. Tio olo molaasa aahudu olei Dauda, wau motolia̒nga olio debo odelo batangalio lohihilao.

³ Sababu uito tei Yonatan lotadia mamo tamania wolei Dauda ohihio-hiheolo mao̒.

⁴ Tei Yonatan lohinggi mao̒ jumbalio lapatao̒ yilohilio odelei Dauda, wau olo pakeyangi lo popaatealio wau wamilio, buutii̒o wau bintolo wohutalio.

⁵ Tei Dauda helohutu mao̒ lou̒ mopiohe ngoa̒amila tuugasilio uiludu mao̒ lei Saul olio. Sababu uito tio piluduo̒ lei Saul lowali polowila todelomo suludadulio, wau tei Dauda aahudu lo ngoa̒amila pajule wau lomongo wato lei Saul.

Tei Saul malo hiihia to olei Dauda

⁶ Tou̒ tei Dauda lohualingai lapatao̒ lopoo̒laaheo̒ olei Goliat taulo Pilistin boito, wau mongo pajule hibaalisia tilumuwota ode delomo kota, yi mongobua yilumualai lonto ngoa̒amila kota to Isirai̒lu mai lolutulao̒ oli Olongia Saul. Timongolio lopolahu mola lalaa-huwaalo u moe̒engahe, wau elungao̒-elungao̒ wolo hemolaa̒apa rabana wau hemo poitohe kocapi.

⁷ Sambela elungao̒-elungao̒ mongobua hipolahua mola odie, “Tei Saul malomate yila-yilateelo mao̒ helihu-lihua musu, bo tei Dauda hepulu-pulua lolihu.”

⁸ Loo̒dungohe uito, tei Saul maloingo daa̒. Sababu to pikiilangilio mola, “Tei Dauda yilantobi mongolio maloo̒pate yila-yilateelo mao̒ hipulu-pulua lolihu, hiambola wau̒ bo helihu-lihua wambai̒o. Tantulo mao̒ ngopee̒epo tio mapowalio limongolio olongia!”

⁹ Tumulalo mao̒ todulahee boito tio malo hiihia to olei Dauda.

¹⁰ Tou̒ loombu mola dulahio tei Saul woluo todelomo belelio donggo dihudihu totobui̒o wau debolo tio nilao̒ mai lorohu moleeto uilao mai lo Allahu Taa̒ala, tilinggula tio mahuli-hulilame debo odelo taa biyongo. Tou̒ boito tei Dauda donggo hemoitohe kocapi debo odelo biasa.

¹¹ “Pilo lantongomu totobuo̒ botie odelei Dauda tunggula lei̒lantongo to dingingo!” pikili mola lei Saul, lapatao̒ tio lopomahulo totobuo̒ boito odelei Dauda, bo tei Dauda ilohasili lohei.

¹² Tou̒ boito tei Saul malo ngalati deu̒ tei Dauda diluo̒lai lo Eeya hiambola tio lohihilao matilolaa lo Eeya. Sababu uito tio mailoohe olei Dauda.

¹³ Oditolio tio malo polimbatao̒ olei Dauda lonto aambua lo bele biluloa̒ saaha li olongia, wau lomudua̒a olio lowali kamudangi to pajule ngolibu lota. Lou̒ odito tei Dauda lowali tau̒wa to pasuukanilio totimii̒du o popaatea.

¹⁴ Tio he ilohaasili todelomo totoonulalo tuugasilio, sababu Eeya hemo tulungi olio.

¹⁵ Tou̒ tei Saul loo̒onto deu̒ tei Dauda laito ohaasili, yi tio lebe hemoohe mao̒ to olio.

¹⁶ Bo Ngoilanggubu Isirai̒lu wau Yehuda motolia̒nga olei Dauda sababu tio tau̒wa udadaata jasalio.

Tei Dauda lonika woli puusili lei Saul

¹⁷ Tei Saul lolanjana mao̒ alihu tei Dauda pateelio lotau Pilisitini mate-mateelo mao̒ todelomo popaatea alihu diila tio lohihilao talomate olio yila-yilateelo mao̒. Oditolio tou̒ dulahee tuwau loloi̒ya tei Saul odelei Dauda, “Ti Merab puusiliu̒ tamohuhula daa̒, maponikaau̒ mai wolemu, asali yio̒ mopo biloheo̒ obobuhelimu todelomo motuuhua duo̒lo Eeya.”

¹⁸ Tei Dauda lolametao̒, “Tatoonu watotia botie, wau wolo boliilio ngaalaa̒ liyamo lo watotia to Isirai̒lu, tilinggula watotia mowali moluhengi Olongia?”

¹⁹ Bo tou̒ leidungga mai wakutuulio ti Merab mapo nikaalio wolei Dauda, yi ota-otaa mao̒ tadulahu boito pilopo nikaalio wolei Adriel lonto Mehola.

²⁰ Ti Mikhal puusili lei Saul uwewo ilohilao to olei Dauda. Tou̒ tei Saul loo̒dungohe sua̒li boito, yi tio olo akolo.

²¹ To pikiilangilio mola, “Mopiohulo poyingou̒ mao̒ ti Mikhal odelei Dauda, alihu tei Dauda ohentobe wau opatea taulo Pilistin mate-mateelo mao̒.” Oditolio u oluolio tei Saul loloi̒ya mao̒ odelei Dauda, “Botia yio̒ mamowali walao̒ moluhenguu̒.”

²² Lapatao̒ tio helo poa̒hu tomongo pogaweelio alihu mopoo̒taa mao̒ olei Dauda wolo poo̒-poo̒oyo odie mola, “Ti Baginda motolia̒nga olemu wau odito olo ngoa̒amila pogaweelio; oditolio boti-botiaalo saaa̒tilio u tuhata olemu u motolo balango oli puusiliilio.”

²³ Bo tou̒ timongolio lopo tunggulao̒ potuhata boito odelei Dauda, tio malo lametao̒, “Anggapuo limongoli gambangi u mowali walao̒ moluhengo li olongia? Wau̒ botie taa mosikini wau diila oboliilio!”

²⁴ Mongo pogawee boito lopoo̒taa mao̒ odelei Saul totametio lei Dauda boito,

²⁵ lapatao̒ tei Saul luli lopoa̒hu olimongolio u lopoo̒taa olei Duda, odie, “U kahandakio li Baginda odelo tonelo bo wambao̒ ngohetuto putungo lo alipo tilalua taulo Pilistin, odelo pomaalasi tomusu li Baginda.” (Uti-utieelo u yilanjana lei Saul u momate olei Dauda mate-mateelo mao̒ lou̒ motimbulude to taulo Pilistin.)

^26-27 Mongo pogawe lei Saul helopo tunggulao̒ tahuli boito odelei Dauda, wau tei Dauda lololimo u pilopo yingo mao̒ li olongia. Sababu uito, tou̒ diipo leidungga mai wakutuulio lopulito, tio malo monggato wolo tahidudua̒ olio ode lipu lo Pilistin. He pilatelio yila-yilateelo mao̒ dulo hetuto lota taulo Pilistin, lapatao̒ hilamalio putungo lo alipo tilalua limongolio, wau yiludulio odelei Saul lou̒ diila ililangi penu boli tuwau mao̒. Lapatao̒ uito tei Saul malo ponika mao̒ ti Mikhal wolei Dauda.

²⁸ Odi-odieelo mola tei Saul longalati mao̒ deu̒ tei Dauda diluo̒lai lo Eeya wau olo otolia̒ngo li Mikhal ti puusiliilio.

²⁹ Yi malebe hemoohe mola tio to olei Dauda wau tio molonua̒a olio ngotupa lo tutumulio.

³⁰ Timi-timii̒du wonu bolo suludadu lo Pilistin mai moluhu, tei Dauda lebe ohaasili hemopo binaasa olimongolio pobandingio mola wolo mongo polowila lei Saul uwewo. Yi tei Dauda malebe hemo polutuo̒ mola.