BOHULO SEMUEL 14 - KITABI HABARI MOPIOHE

Tei Yonatan yito pahalaawani

¹ Tou̒ saaa̒ti tuwau tei Yonatan loloi̒ya mao̒ ode tabohulotau tamoodelowa tingololio, “Ntalilo, ito monao̒ ode posi lo Pilistin to ngotuali mola!” Bo tio diila lohile luasi oliyamolio.

² Tou̒ boito tei Saul donggo mola to walungo bungo lo ayu dalima to Migron, diila molaminga monto Gibea. Ulipu tahidudua̒ olio tanu wolomo hetuto lota daatalio.

³ (Ti Iimamu talodelo epod yito tei Ahiya walae̒e Ahitub, deu̒yito-yito wutatio lei Ikabod walae̒e Pinehas, wau tei Pinehas walae̒e Eli, iimamu lo Eeya to Silo.) Ulipu olo diila lotota deu̒ tei Yonatan malonao̒ lonteeto.

⁴ U moo̒aata mola posi lo Pilistin boito, tei Yonatan musi molibaya to hiango tuwau lohui̒dee u dilupei̒o lobotu patihu mohelu duluo u helalita biihio, u tinggai iluntee Bojes wau Sene.

⁵ Botu lopatihu u to ambahu tilayo talutalu ode Mikhmas, wau u to ambahu huliaalio talutalu ode Geba.

⁶ Yi maloloi̒ya tei Yonatan ode tabohulotau boito, “Dulo ito monao̒ ode posi taulo Pilistin lotaa kaapiru boito. Otanu Eeya mamotulungi mai olanto. Sababu Eeya mowali mopoo̒haama olanto, mopio wolo taa dadaata meaambo wolo taa ngoi̒di.”

⁷ Tabohulotau boito lolametao̒, “Penu boli wolo u ohilaa pohutuo li Tuani, watotia akolo wambai̒o”

⁸ “Ooo̒,” ualei Yonatan. “Tou̒ mobalangao̒, ito mamopo biloheo̒ batanga totau-tauwalo Pilistin boito.

⁹ Wonu timongolio mei̒ huheli mao̒ olanto wau mohima tunggula timongolio monao̒ mai ode olanto, yi ito debo motibiluloa̒ teto wambai̒o wau sambelolo mobalango.

¹⁰ Bo wonu timongolio mei̒ nao̒ mai olanto ode limongolio, ito mamusi odito mola, sababu ui-uitolo tuotio deu̒ timongolio mailudu mai lo Eeya ode olanto.”

¹¹ Tou̒ timongolio duulota lopo biloheo̒ batanga ode taulo Pilistin to posi podahaalo boito, yi malo loi̒ya tau-tauwala Pilistin boito, “Bilohilo, woluo tau-tauwalo Ibrani tailumualai lonto huhuu-wangowalo tambati pilotituua̒ limongolio!”

¹² Lapatao̒ timongolio malo ngiibode odelei Yonatan wau watolio, “Pobotulolo mai odia alihu pobilohu mai lamiaatia u hitua-tuawua ode limongoli!” Lapatao̒ malo loi̒ya tei Yonatan ode tabohulotau boito, “Dudui̒lo mai wau̒, sababu timongoli mailudu mai lo Eeya ode Isirai̒lu.”

¹³ Lou̒ diludua̒ lo tabohulotau boito tei Yonatan lotidanga mola ode yitaato. Tou̒ tei Yonatan yilumeneta mola, yi loduduu-lahulo mola tau-tauwalo Pilistin hepilatelio, hiambola to wulealio, tabohulotau boito helomate olimongolio yila-yilateelo mao̒.

¹⁴ To delomo bohulo luhu boito, tei Yonatan wau tabohulotau boito loo̒pate yila-yilateelo mao̒ tanu dulo pulu lota tomadala u ngoluasi ngotayade wopato hekto are.

¹⁵ Polou̒tia boito heloo̒ buluta daa̒ to taulo boito Pilistin to kema wau to papaa-dengowalo. Ngoilanggubu ulipu lo Pilistin wau popoo-siyalo podahaalo wau aa̒a-polawaalo tamoolambata mailoohe; tumbao̒ huta olo hilumehela, wau mailowalilo mola puuyota ulaba-labaalo.

Taulo Pilistin ilolaahelio

¹⁶ Tou̒ boito suludadu lei Saul tahikawalia to Gibea tomadala lei Benyamin, loo̒onto taulo Pilistin hitetea̒ odito mota odia mai wolo hilingua daa̒.

¹⁷ Yi malo loi̒ya tei Saul ode tahidudua̒ olio, “Yia̒apalo mao̒ mongo pajule wau parakisailo tatoonu tadiaaluo.” Timongolio helohutu mao̒ palenta boito lapatao̒ ilotahuwalo mao̒ deu̒ tei Yonatan wolo tabohulotau tamoodelowa tingololio diaaluo.

¹⁸ “Delowalo mai boo̒ li iimamu boito odia,” ualei Saul odeli Iimamu Ahia. (Todulahee boito tei Ahia malodelo boo̒ li iimamu boito totalu taulo Isirai̒lu.)

¹⁹ Tou̒ tei Saul donggo hemobisala woli iimamu boito, tolonggalo todelomo kema taulo Pilistin lebe he oduhenga mola, tilinggula tei Saul loloi̒ya mao̒ odeli iimamu boito, “Ito diilalo ohiango u mohile potuhata monto Eeya!”

²⁰ Lapatao̒ tei Saul wau tahidudua̒ olio pee̒entalo mao̒ lomaju ode tambati lo popaatea. Mota teto iloontonga limongolio woluo puuyota towolota taulo Pilistin; timongolio tinggai lotutuuhua wau tinggai lopapaatea yila-yilateelo mao̒.

²¹ Tau-tauwalo Ibrani tahi biluloa̒wa tomadala lotau Pilistin, wau tamalo dudua̒ wolo suludadu limongolio, luli lomolio̒ dulungio wau malo panggala wolei Saul wau lei Yonatan.

²² Wau olo tau-tauwalo Isirai̒lu tahituua̒ to huhuu-luduwaalo Epraim, taloo̒ dungohe deu̒ taulo Pilistin malolahi, lodudua̒ lopanggala wau heloluhu taulo Pilistin boito.

²³ Timongolio helo paatea to ngohilayaa̒ lo dalalo demola yilumaode to Bet-Awen. Eeya helo poa̒ahu olimongolio todulahee boito.

Popoo-lou̒tiyalo lapatao̒ polotuuhua

²⁴ Todulahee boito tau-tauwalo Isirai̒lu owowoluwoalio molulupuhu, sababu hipolaanga, sababu tei Saul malotadia odie, “Malaa̒-laa̒anatilo taa u molamelao̒ penu boli wolo to dulahee botie tou̒ wau̒ diipo motuli mao̒ niyatiu̒ to musuuu̒.” Sababu uito diaaluo penu boli ngotaa mao̒ talo lamela ngotupa lodulahee boito.

²⁵ Lapatao̒ malei dungga timongolio ngoa̒amila to oa̒ayua tuwau wau loo̒dungga dadaata daa̒ hula lotiia̒,

²⁶ bo diaaluo penu boli ngotaa mao̒ talo lamelo u hitua-tuawua lonto hula lotiia̒ boito, sababu moohe otuhata lo laa̒anati u mailoi̒ya lei Saul.

²⁷ Bo diila ilotaawa lei Yonatan deu̒ tiyamolio malo nganjamu ulipu wolo laa̒anati boito; sababu uito piloa̒yolio tunggudu u dilelolio mai wau pilowunggoi̒o ode delomo beelea hula lotiia̒, tulusi hilamalio hula lotiia̒ boito wau tilamelio. Lolamemeta tio loo̒laasa mai seehati wau iloduhenga mola lotoolio.

²⁸ Lapatao̒ ngotaalio lomongo pajule boito loloi̒ya mao̒ olio, “Amiaatia ngoa̒amila madiilalo o lotolo sababu hipolaanga. Bo tiyamo li Tuani malo nganjamu mai olamiaatia wolo tadia, ualio mao̒, ‘Malaa̒-laa̒anatilo taa u molamelao̒ todulahee botie.’ ”

²⁹ Tei Yonatan malo lametao̒, “Otutu mailaba huhutu liyamau̒ boito to bangusanto! Bilohi mai, owowoluwou̒ botia lebe mopiohe daa̒ lapatao̒ wau̒ lolamela ngoi̒di hula lotiia̒.

³⁰ Humayaalio ulipu todulahee botie yilohilio molamela ua̒alo u maa yilambatio mai tou̒ lopoo̒laaheo̒ musu, yi tantulo mao̒ lebe dadaata taulo Pilistin tailo pateaanto mate-mateelo mao̒!”

³¹ Todulahee boito taulo Isirai̒lu lopoo̒laaheo̒ taulo Pilistin lapatao̒ helo tuuhua to ngohilayaa̒ lo dalalo lonto Mikhmas demola Ayalon. Bo lapatao̒ uito timongolio yiloongolo daa̒,

³² tilinggula timongolio helo heheehua lohama balangi yilambato u lotapu mai limongolio lonto musu; timongolio helohama himba wau sapi tulusi longolotao̒ to tambatilo boito, wau lato lolamelo tapu udonggo oduhulio.

³³ Lapatao̒ piloo̒taalio odelei Saul odie, “Baginda, ulipu mailodusa to Eeya sababu malo lamela tapu wolo duhulio.” “Timongoli tamoo-hiyanatia!” wuwaatii̒ lei Saul. “Lilidelo mai botu leidaa̒ tuwau odia mai.”

³⁴ Lapatao̒ ualio poli ode tau-tauwalo tahe lodelo habari boito, “Poti pulepelo mota timongoli towolota ulipu wau ahuli mao̒ timongolio modelo sapi wau himbalio odia mai, alihu olotolo toitaato botu botie wau tamelolo tewe; lou̒ odito timongolio diila molamela tapu wolo duhulio wau diilalo odusa to Eeya.” Tou̒ huilo boito ngoilanggubu ulipu malodelo mai binatangi u yilambatio wau helo ngolotao̒ teto.

³⁵ Lapatao̒ tei Saul lopotihulao̒ mesba ode Eeya; ui-uitolo bohulo mesba u pilopo tihulio.

³⁶ Lapatao̒ malo loi̒ya tei Saul ode tahidudua̒ olio, “Duloolo ito moluhu taulo Pilistin tou̒ hui botie lapatao̒ molambata olimongolio tunggula dumodupo wau momate olimongolio ngoa̒amila mate-mateelo mao̒.” Timongolio lolametao̒, “Mopiohulo ti Baginda mopohutu mao̒ wolo u tobibilohi Baginda mopiohe.” Bo ti iimamu loloi̒ya, “Duloolo ito meimulo mohile mai potuhata monto Allahu Taa̒ala.”

³⁷ Lapatao̒ malohintu tei Saul ode Allahu Taa̒ala, “tingga mowali watotia moluhu taulo Pilistin? Ambunguolo wolo timongolio mawuduo mai lo Eeya ode taulo Isirai̒lu?” Bo todulahee boito Allahu Taa̒ala diila lolametai olio.

³⁸ Sababu uito malo loi̒ya tei Saul ode mongo tau̒wa lo ulipu, “Dulo odia mai ngoa̒amila wau palakisailo dusa wolo u mapilohutu todulahee botie.

³⁹ Wau̒ modanti mai domi Eeya tatumu tumulo, tamalo poo̒haama to Isirai̒lu, deu̒ taa u ototala mahukuu-maniyola mate, eleponu tio yito tei Yonatan talolai̒iu̒.” Bo diaaluo penu boli ngotaa mao̒ tabuheli lolametao̒.

⁴⁰ Lapatao̒ ualei Saul ode ngoilanggubu ulipu lo Isirai̒lu, “Timongoli ngoa̒amila tihulai to ambahia.” Tametao̒ limongolio, “Mamusi ti Baginda mohutu mao̒ wolo u bilohe li Baginda mopiohu.”

⁴¹ Lapatao̒ malodua̒ mola tei Saul, “Eeya, Allahu Taa̒ala lo Isirai̒lu, ambunguolo yilongola todulahee botie Eeya diila lolametai olo watotia? Yaa Eeya, ambunguolo tametilo mai olo watotia motimbulude to boboo-tuwaalo umantali botie. Wonu totala boito woluo to watotia meaalo to olei Yonatan, ambunguolo tametilo mai wolo botu Urim, bo wonu totala boito woluo to umati-Mu Isirai̒lu, ambunguolo tametilo mai wolo botu Tumim.” Yi totameto Eeya lolunu mai olei Yonatan wolei Saul; lou̒ odito ulipu piloi̒laalo diila ototala.

⁴² Lapatao̒ ualei Saul, “Yaa Eeya, ambunguolo tantuwalo mai towolota lo watotia wolei Yonatan.” Yi tei Yonatanilo tapilo ilaalo ototala.

⁴³ Lapatao̒ ualei Saul odelei Yonatan, “Wolo u mapilo hutumu?” Tei Yonatan lolametao̒, “Wau̒ malo lamela hula lotiia̒ ngoi̒di u hilamau̒ wolo huudu tungguduu̒; wau̒ dapa-dapato u mate.”

⁴⁴ Ualei Saul mao̒ olio, “Pohileaala dua̒ wau̒ hukuumanio mai lo Allahu Taa̒ala wonu yio̒ diila hukuu-maniyola mate, Yonatan!”

⁴⁵ Bo ulipu loloi̒ya odelei Saul, “Wolo mamusi hukuu-maniyola mate tei Yonatan? Lebe-lebe pomao̒ tiolo talo potoduo mai ohohaama daa̒ botie? Diila! Ami modanti mai domi Eeya tatumu-tumulo, deu̒ tei Yonatan diila mowali oolia lohuwoo̒ polo tulungi boli ngopata mao̒ monto lunggongio. Sababu wolo ponu lo Eeyaalo tio maloo̒ haama todulahee botie.” Odie-odieelo mola tei Yonatan piloa̒ahu lo ulipu lonto hukuumani mate.

⁴⁶ Lapatao̒ uito taulo Pilistin luli lohualinga mota ode madala limongolio lohihilao sababu tei Saul diilalo helo hilapita olimongolio.

Pamalenta wau ngaalaa̒ lei Saul

⁴⁷ Lapatao̒ tei Saul lowali olongia lo Isirai̒lu, tio helo paatea tou̒ totoonulalo mao̒ helo luwali ngoa̒amila musu lo Isirai̒lu, deu̒yito-yito taulo Moab, taulo Amon, wau taulo Edom, mongo olongia lipu lo Joba, wau taulo Pilistin. Penu boli tou̒toonu tio helo paatea, wau laito tio hemoo̒haama.

⁴⁸ Tio helo paatea wolo lotolo daa̒ boli buheli wau lopoo̒laaheo̒ taulo Amalek, wau lolopato Isirai̒lu lonto kawasa lo tamoo-lambata.

⁴⁹ Walao̒ mongo lolai̒ lei Saul yito tei Yonatan, Yiswi, wau Malkisua. Walai̒o taabua tamohuhula daa̒ tanggulio ti Merab, tao̒luolio tanggulio ti Mikhal.

⁵⁰ Dilelio tanggulio tei Ahinoam, walae̒e Ahimaas; eyaanggu lo suludadulio yito tei Abner wolei Ner, deu̒yito-yito pou̒wama lei Saul.

⁵¹ Tei Kish tiyamo lei Saul, wau tei Ner tiyamo lei Abner, deu̒yito-yito mongo walae̒e Abiel.

⁵² Ngotupa lo tutumulio tei Saul laito helo paatea wolo laba-labaalo helo luwali taulo Pilistin. Sababu uito wonu bolo tei Saul moo̒onto mao̒ taa u hilootola meaambo hibuhelia, yi tio hua̒a mopowali mao̒ pongawaa̒ lo suludadulio.