BOHULO SEMUEL 13 - KITABI HABARI MOPIOHE

Popaatea helo luwali taulo Pilistin

¹ Tou̒ dulahee tuwau, tou̒ tei Saul malowali olongia,

² tio helo lulaotao̒ tololihu lota taulo Isirai̒lu; to wolotalio dulolihu lota lotibiluloa̒ wolio to Mikhmas wau tomadala hihui̒-hui̒dea lo Betel, hiambola tangolihu lota poli tilonggonao̒ wolei Yonatan walai̒o talolai̒ ode Gibea tomadala losuku Benyamin. Lebelio lo ulipu boito yiluasialio ngota-ngota helo hualinga ode belelio.

³ Lapatao̒ tei Yonatan lomate yila-yilateelo mao̒ eyaanggu lo Pilistin tato Gibea, wau bangusa lo Pilistin loo̒dungohe pasali losua̒li boito. Lapatao̒ tei Saul lei̒ potingohe mola torompeti to ngoilanggubu lipu u lotianga taulo Ibrani alihu momaju mopaatea.

⁴ Ode ngoilanggubu bangusa lo Isirai̒lu piloo̒taalio deu̒ tei Saul malomate yila-yilateelo mao̒ eyaanggu lo Pilistin boito wau deu̒ taulo Pilistin molonuo̒ daa̒ to taulo Isirai̒lu. Sababu uito ulipu malo dudua̒ titiango u mopanggala wolei Saul to Gilgal.

⁵ Tou̒ boito taulo Pilistin malo tia̒ambu olo u moluhu taulo Isirai̒lu; timongolio okaleta lo popaatea tolo pulu lolihu. Taa owadala wolomo lihu lota, wau mongo pajule ngodaata lo hungayo tobiihu deheto. Timongolio lotikema to Mikhmas to ambahu tiimuru lo Bet-Awen.

⁶ Lapatao̒ timongolio tutuuyuta heloluhu lou̒ laba-labaalo to taulo Isirai̒lu, tilinggula taulo Isirai̒lu owowoluwoalio malei hupeta daa̒. Ngojumula tau-tauwalo Isirai̒lu helo tituuo̒ todelomo gowa wau to liango hui̒dee meaalo todelomo hiango lo patihu, meaalo todelomo ali wau huango tohuta,

⁷ woluo olo tahe lobalango Dutulaa Yordan wau tilumuwoto ode madala lo Gad wau Gilead. Tei Saul donggo to Gilgal, wau ulipu tahidudua̒ olio mahulu-huluhelio yiloohe.

⁸ Tei Saul helohima olei Semuel pitu hui mola hiheolio, tutuuu̒de wolo tahuli lei Semuel olio, bo tei Semuel diipo olo leidungga mai ode Gilgal, hiambola tei Saul mahetolaa mao̒ lo ulipulio.

⁹ Sababu uito tio loloi̒ya mao̒ ode limongolio, “Delowalo mai bake yilalango wau bake lo polodame boito.” Lapatao̒ tio lohihilao lopodewo bake yilalango boito.

¹⁰ Bo boheli tio yilapato lopohutu mao̒ uito, malei dungga mai tei Semuel. Tei Saul lolutulao̒ olio wau ohilaa mosalamu olio,

¹¹ bo tei Semuel malohintu, “Wolo u mapilohutu li Baginda?” Tilametao̒ lei Saul, “Watia loo̒onto mao̒ deu̒ ulipu mahemo lolaa mao̒ olaatia, hiambola ti Paaa̒ diipo leidungga mai to wakutu u matilantu mao̒ li Paaa̒. Donggo poli taulo Pilistin malo tia̒mbu to Mikhmas.

¹² Lapatao̒ to pikiilangi mola lowatia, diila bolo suludadu lo Pilistin ngopee̒epo mai moluhu olaatia tewe to Gilgal, lebe-lebe pomao̒ watia diipo helo molohone mola mei̒ponu mai to Eeya. Sababu uito watia malolantu mao̒ u lopodewo bake boito.”

¹³ Loo̒dungohe uito tei Semuel loloi̒ya odeli olongia Saul, “Huhutu li Baginda boito mohulode daa̒. Humayaalio ti Baginda lodungohe palenta lo Eeya Allahu Taa̒ala odeli Baginda, yi tantulo mao̒ Eeya mamolantu mai oli Baginda wau wali mola li Baginda mowali olongia to Isirai̒lu u ohiheo-hiheolo mao̒.

¹⁴ Bo botia pamalenta li Baginda diila tamoo̒ taahangi. Sababu ti Baginda diila lodudua̒ palenta lo Eeya, yi Eeya malo lulaotao̒ taa wewo takilaa-handaki-Lio u piludu-I̒o lowali olongia to umati-Lio.”

¹⁵ Lapatao̒ tei Semuel lololaa mao̒ Gilgal wau lopo tolonga mola lononao̒olio ode Gibea tomadala lei Benyamin. Sambela uito tei Saul helo malakisao̒ pasuukanilio, jumulaalio tanu wolomo hetuto lota.

¹⁶ Odi-odeelo mola tei Saul wolei Yonatan walai̒o talolai̒, wau tahidudua̒ olimongolio helo tikema to Geba tomadala lei Benyamin; hiambola taulo Pilistin helo tikema to Mikhmas.

¹⁷ Tou̒ boito olo tolo polemboa̒ tamoo-lambata lo Pilistin lomonggatao̒ lonto pilo tikemawa lo Pilistin mota molambato; polemboa̒ u tuwau lonao̒ ode mantahu Opra tomadala lo Syual,

¹⁸ polemboa̒ u oluolio lotidulunga ode Bet-Horon, wau polemboa̒ u tuwau poli lotidulunga ode sipatana u talutalu ode Lumbaya Jeboim wau huta datahu u luasi daa̒ wau delita.

¹⁹ To ngoilanggubu lo Isirai̒lu diaaluo pani lowate, sababu taulo Pilistin diila mongohi to taulo Ibrani mohutu wamilo wau totobuo̒.

²⁰ Oditolio taulo Isirai̒lu musi monao̒ mota ode taulo Pilistin wonu ohilaa modumbata mato lo popadei̒o, popatilio, bulingolio wau sabilio;

²¹ wuupalio yito doi talaa̒ ngopita kikiio̒ u modumbatao̒ mato lo popadeo̒ meaalo popati.

²² Uitolo sababuulio, todulahee lo popaatea to Mikhmas boito, diaaluo penu boli ngotaa mao̒ lonto ulipu lo Isirai̒lu owamilo meaalo o totobuo̒, ngopohia tei Saul wolei Yonatan walai̒o talolai̒.

²³ Taulo Pilistin lopo tambati mao̒ posi tuwau podahaalo u lotolo miintengi mao̒ hiango lohui̒dee tuwau to Mikhmas.