BOHULO SEMUEL 12 - KITABI HABARI MOPIOHE

Tahuli polobua̒aya lei Semuel

¹ Lapatao̒ malo loi̒ya tei Semuel ode ngoilanggubu bangusa lo Isirai̒lu, “Wau̒ malo poo̒polu mai totoonulalo hihiile limongoli wau malomuduo̒ ngotaalio li olongia olimongoli.

² Tumulalo mai botia tiotioolo tamaa motitau̒wa toli mongoli. Bilohilo mai wau̒ botie mapanggola wau ilowaalo. Wau̒ malohiheo daa̒ helo titau̒wa toli mongoli – tumulalo mai wau̒ donggo muda tunggula botia. Bukutiilio mongo walau̒uu̒ maduduulaa̒ boito.

³ Masaatia botieelo, wau̒ tihutihula totalu limongoli! Wonu wau̒ mailo totala, yi potuludelo mai wau̒ totalu lo Eeya wau totalu li olongia tatilulao-Tio. Wolo mapee̒enta wau̒ helohama sapi meaalo kolodai lotaa wewo? Wolo mapee̒enta wau̒ helo himbulo meaalo lodeehe meaalo lololimo doi palele? Poleleaalo mai, alihu wolo wamabai̒o u hehilamau̒ boito muli powalingou̒.”

⁴ Tau-tauwala boito helo lametao̒, “Diila, diila pee̒enta mao̒ ti Paaa̒ lohimbulo meaalo helo deehe olamiaatia; diila pee̒enta mao̒ ti Paaa̒ helohama wolo-wolo penu boli olo tatoonu.”

⁵ Lapatao̒ malo loi̒ya tei Semuel, “Todulahee botie Eeya wau olongia tatilulao-Tio mowali sakusi deu̒ wau̒ malo patatai diila ototala penu boli ngoi̒di mao̒.” “Saaya otutu, Eeya lowali sakusinto,” tametao̒ limongolio.

⁶ Lapatao̒ luli loloi̒ya mao̒ tei Semuel, “Eeyaalo talo lulaotai olei Musa wolei Haruna wau talodelo loluuhuru limongoli yilumualao̒ lonto Masiri.

⁷ Botia, diipo mao̒ poonao̒. Wau̒ mamopo tuludeo̒ olimongoli totalu lo Eeya. Eelailo mola totoonulalo omuura lo Eeya u mapilo ilaalo-Lio mai olimongoli wau ode loluuhuru limongoli.

⁸ Tou̒ tei Yako wau ngaalaa̒lio leidungga ode Masiri, wau taulo Masiri helodeehe olimongolio, loluuhuru limongoli malo molohone ode Eeya lei̒ tulungi, lapatao̒ Eeya lolao mai olei Musa wolei Haruna. Taduulota boito malodelo loluuhuru limongoli yilumualai lonto Masiri wau lotulungi olimongolio helo titatapu tolipu botie.

⁹ Bo lapatao̒ timongolio helo lipata to Eeya, Allahu Taa̒ala limongolio, sababu uito Eeya malo poluli mao̒ olimongolio hetiluhu wau ilolaahe lei Sisera, eyaanggu lo suludadu to Hajor, wau lotau Pilistin boli olongia lo Moab.

¹⁰ Lapatao̒ timongolio helodua̒ mola ode Eeya wau lotolongaku dusa limongolio; uali mongolio mao̒, ‘Mongowatotia mailodusa sababu helohei lonto Eeya, yaa Eeya wau helolubo bubuu-iyaalo Dewa Baal wau Asytoret. Bo, botia, poa̒ahuwalo mai mongowatotia monto musu lo mongowatotia, yi mongowatotia mamotiwato to Eeya!’

¹¹ Lapatao̒ Eeya malolao mai olei Gideon, lapatao̒ olei Barak, lapatao̒ uito olei Yepta, wau pulitio wau̒. Ami ngota-ngota malo polopato olimongoli lonto musu limongoli, tilinggula timongoli loo̒ tumulo wolo aamani.

¹² Bo tou̒ timongoli loo̒onto deu̒ timongoli matuhuo lei Nahas olongia lo Amon, timongoli helo potouli to Eeya odelo olongia limongoli wau loloi̒ya olau̒, ‘Amiaatia ohilaa palentaa li olongia ngota.’ ”

¹³ “Botia, bilohilo, uti-utieelo tio, olongia tatilulaoti mongoli boito. Timongoli malohile mai olio, wau Eeya malongohi mai olio ode limongoli.

¹⁴ Potisangilo tutu timongoli wonu timongoli momasisi to Eeya, wau motiwato to o-Lio, wau moduduo̒ boli modungohe palentaa-Lio, tidiyolo mao̒ wonu timongoli wau olongia limongoli boito tatapu wau molotolo hilao to Eeya Allahu Taa̒ala limongoli.

¹⁵ Bolii̒o mao̒, wonu timongoli diila modungohe to Eeya, tumbao̒ moluwali palentaa-Lio, tantu timongoli wau olongia limongoli matuwalia lo Eeya.

¹⁶ Botia, dungohipo poli! Poo̒tuoti mao̒ moo̒linggolabe daa̒ u mapohutuo mai lo Eeya totalu lomato limongoli.

¹⁷ Wau̒ mamo ngiibode to Eeya, wau eleponu masaatia sembo lo polohengu, Eeya mamopo tuhutai bulonggodu wau didi odelo tameto todua̒au̒. Tou̒ boito, timongoli mamongalati mao̒ deu̒ malo odito udaa̒alio dusa limongoli to Eeya sababau malohile olongia ngota.”

¹⁸ Lapatao̒ malodua̒ tei Semuel, wau to dulahulo boito Eeya lopo tuhutai bulonggodu wau didi. Ngoilanggubu bangusa boito mailoohe to Eeya wau to olei Semuel.

¹⁹ Lapatao̒ malo loi̒ya timongolio odelei Semuel, “Tulungia mai, Paaa̒, podua̒alo mola duo̒lo olamiaatia botie ode Eeya Allahu Taa̒ala li Paaa̒, alihu amiaatia diila tamate. Botia amiaatia malongalati deu̒ ngopohia dusa lamiaatia omoo̒omolu, amiaatia maluli ilodusa sababu helohile olongia ngota.”

²⁰ Tei Semuel olo malo lametao̒, “Diila mao̒ oohe, eleponu timongoli malohutu u moleeto boito, diila mao̒ pohei monto Eeya, bo debo pomayaalo to Olio wolo lealeaatu lo hilaamu.

²¹ Diila mao̒ podudua̒ dedee-waalo udiila moo̒ tulungi wau mowali mopoa̒ahu olimongoli, sababu timongolio tutuulio tutu diaaluo.

²² Eeya malotadia mai, deu̒ Tio diila tamololaa olimongoli sababu Tio malolantu mai u mopowali mao̒ olimongoli umati-Lio lohihilao.

²³ Tomimbihu batangau̒, pohileaala dua̒ wau̒ diila bolo odusa to Eeya sababu diila helodua̒ mao̒ olimongoli. Bolii̒o mao̒ wau̒ olo madebo mopoo̒latao̒ olimongoli susuu-aliyaalo u mopiohe wau u otutu.

²⁴ Pasisia mao̒ Eeya wau potiwatolo to Olio wolo tatapu wau molotolo hilao wau wolo lealeaatu lo hilaamu. Eelailo mola ngoa̒amila huhutu daa̒ u mapilohutu-Lio mai olimongoli.

²⁵ Bo wonu timongoli debo tulusi olo hemohutu dusa, yi timongoli wau olongia limongoli mabinaasa.”