BOHULO SEMUEL 11 - KITABI HABARI MOPIOHE

Tei Saul lopoo̒laaheo̒ taulo Amon

¹ Lapatao̒ tei Nahas, olongia lo Amon, helongambu suludadulio tulusi lomala kota lo Yabesh tomadala lo Gilead. Ulipu lo Yabesh helo podudulao̒ potuhata odie odelei Nahas, “Pohutua mai daantia wolami, yi ami mataa̒luku to olemu.”

² Tei Nahas lolametao̒, “Wolo saalati botieelo wau̒ ohilaa mohutu mai daantia, deu̒yito-yito, ‘Matomu olowala ngota-ngota maluo̒ohuu̒ odelo polohina to ngoilanggubu Isirai̒lu!’ ”

³ Lapatao̒ mongo tau̒wa lokota Yabesh helo lametao̒, “Ami mohile tembo ngotilonggadu pituhui mola alihu ami moo̒lawopo utolia ode ngoilanggubu huta lo Isirai̒lu. Wonu humayaalio diaaluo tamohuto motulungi olami, yi ami mataa̒luku to olemu.”

⁴ Odi-odieelo mola mongo utolia boito tilinggula mola ode Gibea, tambati pilo tibiluloa̒ lei Saul. Tou̒ timongolio helopo tunggulao̒ habari boito, mahilumoyongo ulipu sababu mailooli halapani.

⁵ To saaa̒ti boito tei Saul boheli leidungga mai lonto halabolulio wolo sapilio. Tio olo malohintu mao̒, “O wolo? Yilongola ngoa̒amila tau hehiyonga?” Lapatao̒ to olio piloo̒taa mao̒ habari u dilelo mai lo utolia lei Yabesh boito.

⁶ Loo̒dungohe uito, tei Saul kiluwasa mao̒ lo Rohullah.

⁷ Wolo nahutu daa̒ tio lohama mao̒ sapi mohelu duluo tulusi tila-tilambalio lowali dadaata olongio. Lapatao̒ oo̒o-longowalo boito heilaolio ode ngoilanggubu huta lo Isirai̒lu wolo palenta odie mola, “Tatoonu tadiila momaju mopaatea modudua̒ olei Saul wolei Semuel, yi sasaapilio mao̒lo-olongolo odie olo!” Bangusa lo Isirai̒lu moohe tou̒ wolo u otanu pohutuo mai lo Eeya, yi ngoa̒amila tau, diaaluo ngopohialio, lotidapato lomaju helo paatea pee̒-pee̒enta.

⁸ Timongolio ilambu wau yilia̒apio mao̒ to Bejeki: Woluo tolo hetuto lolihu lota taulo Isirai̒lu, wau tolopulu lolihu lota taulo Yehuda.

⁹ Lapatao̒ to utolio lonto olei Yabesh piloo̒taalio mao̒ odie, “Poleleaalo mao̒ ode ulipu lo Yabesh, deu̒ loombu mola dumodupo tou̒ dulahee diipo totau̒, timongolio mamoo̒tapu mai tulungi.” Tou̒ ulipu lo Yabesh lololimo tahuli boito, yi malo odito sanangi limongolio.

¹⁰ Uali mongolio odelei Nahas, “Loombu ami mamohudu batanga, wau mowali pohutuomulo totoonulalo u otohilaamu.”

¹¹ Loombulio mola, didimodupo, tei Saul helo layadeo̒ tahidudua̒ olio lowali tolo pasuukani. Wau tou̒ madulahei timongolio loluhu ode huungo pilo tikemawa taulo Amon boito wau heloluhu olimongolio. Tou̒ dulahee diipo totau̒, suludadu lei Saul malo poo̒laaheo̒ musu. Tau-tauwalo Amon taloo̒lahi, helo bubuua̒yawa tilinggula diaaluo taloo̒lahi duduulota pee̒-pee̒enta.

¹² Lapatao̒ malohintu bangusa lo Isirai̒lu odelei Semuel, “Tou̒toonu tau-tauwalo u engontielio buheli hemoloi̒ya deu̒ tei Saul diila patuti mowali olongiyanto? Patutilio wuduo mai li Paaa̒ olamiaatia, alihu patee lamiaatia mate-mateelo mao̒.”

¹³ Bo tei Saul loloi̒ya mao̒, “Penu boli ngota diila mowali pateelo mate-mateelo mao̒ todulahee botie, sababu todulahee botie Eeya malo poa̒ahu mai bangusa lo Isirai̒lu.”

¹⁴ Lapatao̒ malo loi̒ya tei Semuel ode limongolio, “Duloolo ito ngoa̒amila monao̒ ode Gilgal, wau momuduo̒ olei Saul mowali olongiyanto.”

¹⁵ Odi-odieelo mola timongolio ngoa̒amila malonao̒ ode Gilgal, wau totambati potabiyalo boito tei Saul piludui̒o lei Semuel lowali olongia. Timongolio helo podewo bake lo polodame, wau tei Saul wolo ngoilanggubu bangusa lo Isirai̒lu helo polame mao̒ u lotoduo mai boito.