BOHULO SEMUEL 10 - KITABI HABARI MOPIOHE

¹ Lapatao̒ tei Semuel lohama ginti tuatuanga yinulo jaitun, lapatatao̒ yinulo boito piloluatio ode yitaato lunggongee Saul, wau diliilio tei Saul sambela loloi̒ya mao̒, “Eeya malo mudaa̒ olemu lowali olongia lo Isirai̒lu umati-Lio. Yio̒ mamo malenta umati-Lio wau moduo̒la olimongolio monto mumuu-suuwaalo limongolio. Utieelo tuotio olemu deu̒ Eeya malo lulaota olemu lowali olongia to umati-Lio.

² Lapatao̒ yio̒ mololaa mao̒ todulahee botie yio̒ mamodunggaya wolo talolai̒ duulota totili lokuubulu li Rahel to Zelzah tomadala Benyamin. Timongolio mamoloi̒ya mai olemu odie. Kokoo-lodaiyalo u helolohumu boito matilantu mao̒. Botia tipaapamu diilalo molawalo tomimbihu bibii-natangiyalo boito, bo hemohintu malolaalaaita wolo umusi pohutuolio u moo̒dungga olemu.”

³ Tei Semuel luli loloi̒ya mao̒, “Monteeto yio̒ mopo tolonga lononao̒ demola bungo lo ayu tambati lo ibaadati to Tabar. Mola teto yio̒ mamo dunggaya wolo mongo lolai toulota tadonggo dulu-dulunga ode Betel u mopodewo bake ode Allahu Taa̒ala. Ngotaalio delodelo totolu walao̒ batade, ngotaalio poli delodelo tolobotu roti, wau ngotaalio poli delodelo bututu walito tuatuango angguru.

⁴ Timongolio mamongohi salamu olemu wau yio̒ mawohialio dulobotu roti umusi tolimoomu.

⁵ Lapatao̒ uito yio̒ musi monao̒ mola ode huludu lo Allahu Taa̒ala to Gibea, tambati pilo tikemawa taulo Pilistin. To huhebu potuwotalo ode kota yio̒ mamolaawode wolo ngopoa̒mbua nabi u molaahei monto huludu pobakeyalo. Timongolio mongelu-ngelungo wau hiwuwa-wuwaatia̒, hemoitohe gambusi, rabana tulali wau kocapi.

⁶ Tou boito olo yio̒ makaawasa mai Rohu lo Eeya wau yio̒ mamodudua̒ mongelu-ngelungo wau wuwaatii̒ mongolio boito, lapatao̒ yio̒ wohialio watade bohu tilinggula mowali manusia wewo.

⁷ Wonu bolo ngoa̒amilalo boito motoduo mai, pohutuwalo wolo wambai̒o u laasamu mopiohu, sababu Allahu Taa̒ala pee̒-pee̒enta wolemu.

⁸ Lapatao̒ uito yio̒ musi monao̒ ode Gilgal wau mohima mola teto pituhui mola. De wau̒ monao̒ mai mopodewo bake yilalango wau bake lo polodame, boli mopoo̒taa mai olemu wolo u musi pohutuwomu.”

⁹ Lolamemeto lapatao̒ tei Saul lololaa mao̒ olei Semuel, tei Saul lololimo watade bohu lonto Allahu Taa̒ala. Wau totoonulalo sua̒li u piloo̒taa lei Semuel olio olo lotoduo mai todulahee boitolo.

¹⁰ Tou̒ tei Saul wau tamomayawa olio leidungga mola to Gibea, timongolio lodunggaya ngopolemboa̒ nabi. To saaa̒ti boitolo olo tei Saul kiluwaasa mai Rohullah, wau tio loduduo̒ helo ngelu-ngelungo wau wuwaatio̒ lo mongo nabi boito.

¹¹ Tau-tauwalo tamoo̒onuhe olio tou̒ muloololio mai, loo̒onto pii̒liilio, lapatao̒ helohintu ngota timonga, “Wolo u malowali wolo walae̒e Kish boito? Wolo tei Saul lowali nabi olo?”

¹² Lapatao̒ ngotaalio tabilu-biluloa̒ teto lohintu mao̒, “Woloolo mola wolo mongo nabi uwewo boito – modudua̒a olimongoli tatoonu tiyamo limongolio?” Ui-uitolo asaliilio mai lo pohumaya botie, “Wolo tei Saul olo mowali nabi?”

¹³ Lapatao̒ tei Saul yilapato longelungo wau longuatio̒, tio malonao̒ mola ode mesba toitaato huludu.

¹⁴ Pou̒wama lei Saul loo̒onto olio wau watolio, tulusi helohintu mao̒ olimongolio, “Lonto utoonu timongoli?” tametao̒ lei Saul, “Hemololohe kolodai uilooli boito, wau tou̒ amiaatia diila loo̒dungga kolodai boito, amiaatia mota lodunggaya wolei Semuel.”

¹⁵ “Wau wolo u yiloyaalio mai olemu?” yilintu mao̒ lo pou̒wamaalio.

¹⁶ Tei Saul lolametao̒, “Tio lopoo̒taa mai deu̒ bibii-natangiyalo boito mailodungga.” Bo tei Saul diila lohungguli mao̒ ode pou̒wamaalio deu̒ tio mapiludui̒o lei Semuel lowali olongia.

Tei Saul tilulaotio lowali olongia

¹⁷ Yi tei Semuel lotiangai ulipu lo Isirai̒lu alihu motia̒mbu to Mispa,

¹⁸ wau tio loloi̒ya mao̒ olimongolio, “Uti-utieelo upilo tahuda mai lo Eeya, Allahu Taa̒ala lo Isirai̒lu, ‘Wau̒ malodelo olimongoli yilumualao̒ lonto Masiri wau helo lopato olimongoli lonto kawasa taulo Masiri wau totoonulalo bangusa wewo tahi podeehea olimongoli.

¹⁹ Wau̒ malo lopata olimongoli lonto tilolahepalo u suukali wau polodutolo, bo botia timongoli malo potouli ola-U̒, Allahu Taa̒ala limongoli, sababu timongoli hipohilea alihu Wau̒ molantu mao̒ olongia ngota ode limongoli. Naa, ooo̒, potia̒mbulo mai totalu-U̒, Eeya limongoli, modudua̒ suku wau maraga limongoli.’ ”

²⁰ Lapatao̒ tei Semuel lopoa̒hu ngoa̒amila suku helomaju ode talu, wau suku Benyamin tailo tulaotalio.

²¹ Tou̒ mongo ilaato todelomo suku Benyamin boito pilei̒ majulio ode talu, yi ngangaa-laa̒waalo lei Matri tailo tulaotalio. Pulitio mao̒ malomaju mongo lolai̒ todelomo ngaalaa̒ lei Matri, wau tei Saul walae̒e Kish tailo tulaotalio. Lapatao̒ timongolio lololoohe olei Saul, bo tio diaaluo.

²² Sababu uito tau-tauwalo malohintu ode Eeya, “Yaa Eeyaa, ambunguolo wolo tau boito mawoluo tewe?” Tahuda mai lo Eeya, “Tei Saul lotituuo̒ to dibalaka lo babaa-rangiyalo powimumuto.”

²³ Lapatao̒ wolo lolamemeto timongolio mota lolutulai olei Saul lonteto, wau lodelo olio ode huungo ulipu. Yi tilimihula mola tei Saul towolota limongolio wau tioolo talebe molanggata daa̒; taa wewo bo tunggula to binggungio.

²⁴ Lapatao̒ tei Semuel loloi̒ya mao̒ ode ulipu, “Uti-utieelo taulio tatilulaoto Eeya, diila o bandingilio to wolotanto ngoa̒amila.” Ngoilanggubu bangusa boito helo tingalaa̒, “Pomali-tutuo̒lo mola olongia!”

²⁵ Lapatao̒ tei Semuel helo tombangao̒ ode bangusa boito pasali lohaku wau uwajibu li olongia, tulusi tiluladio mao̒ todelomo buku u tahutahu to tambati umantali. Lapatao̒ uito tei Semuel helo poa̒hu to ngoilanggubu bangusa boito lohualinga ode belelio ngota-ngota.

²⁶ Tei Saul olo lohualinga ode belelio to Gibea, tilunuhe lo dengolo lo tamolotolo boli buheli wau tamaa iloliyoo̒ hilaalio lo Eeya.

²⁷ Bo dengolo lota tahileeta loloi̒ya, “Diila pongalo aakali tau botie mao̒huna to olanto, diila odito?” Timongolio hemo poreme olei Saul wau diila mongohi palaseni to olio. Bo pilohutulio debo odelo diila otaawalio.