BOHULO MONGO OLONGIA 3 - KITABI HABARI MOPIOHE

Ti Olongia Salomo helodua̒ mola lomolohone hikimati

¹ Tei Salomo lopowali mao̒ Masiri waitio wolo lonika oli puusili li olongia lo Masiri. Ti Puusili boito dilelo lei Salomo ode kota lei Dauda u lotibiluloa̒ teto dilumutu bele biluloa̒ saaha li olongia li olongia wau Bele lo Eeya wau biintengi topalito Yerusalemu yilapato bilongulio.

² Sababu Bele lo Eeya diipo bilongulio tou̒ boito, yi ulipu donggo hemo podewo bake to utoonulalo tambati.

³ Tei Salomo motolia̒nga to Eeya wau helo dudua̒ toonula potuhata liyamolio, bo tio donggo hemo ngoloto wau hemo podewo binatangi to utoonulalo tambati.

⁴ Tambati poi̒baadatiala umasa-masaahuru daa̒ tou̒ boito woluo to Gibeon. Tei Salomo laito hemo podewo bake mola teto. Tou̒ dulahee tuwau, debo odelo biasa tio luli lonao̒ mola odito.

⁵ Tou̒ hui boito Eeya lopo bilohei batanga olio todelomo tohiilopo wau lotahuda, “Salomo, pohileaalo wolo u otohilaamu, uito mawohi-U̒ mai olemu!”

⁶ Tei Salomo malo lameto, “Yaa Eeya, Eeya malo pobilohei batanga deu̒ Eeya momonu daa̒ tiyamo lo watotia, Dauda, wato lo Eeya boito. Tio mopiohe, juujulu wau tatapu molotolo hilao to Eeya. Wau odelo pongakuwalo u wumbutio mola Eeya debo momonu olio. Eeya longohi mai olio walao̒ talolai̒ ngota u masaatia hemomalenta lobuulota wolio.

⁷ Yaa Eeya, Allahu Taa̒ala lo watotia, Eeya lomudua̒a olo watotia lowali olongia lobuulota woliyamo lo watotia, eleponu watotia donggo muda daa̒ wau diila motota woloolo mola dudelolio momalenta.

⁸ Watotia woluo tohuungo bangusa tamaa tilulaoto Eeya lowali umati lo Eeya lohihilao. Timongolio bangusa tuwau leidaa̒ udiila oyia̒apa jumulaalio.

⁹ Sababu uito, yaa Eeya, potala wohia mai watotia tinepo upalaluo lo watotia u momalenta umati lo Eeya botie wolo aadili wau u mowali mopo hiheede toonu umopiohe wau toonu u moleeto. Wonu diila odito, diila pongalo aakali watotia mowali momalenta umati lo Eeya u udaa̒ botie?”

¹⁰ Eeya sanangi wolo polohone lei Salomo boito

¹¹ wau lotahuda mai olio, “Sababu yio̒ lomolohone tinepo u momalenta wolo aadili, wau diila umulu u hayahaya meaambo okokaya duo̒lo batangamu lohihilao meaambo opopate to mumuu-suumu,

¹² yi polohonemu boito mapoo̒ poluwo-U̒ mai. Wau̒ mamopowali mai olemu lebe molinepo wau lebe o pongotota wolo titaalo tita olo, mopio tou̒ yilalu mao̒ mopio tou̒ madungga-dungga mai.

¹³ Tumbao̒ wolo udiila pilolohemu olo mawohi-U̒ mai olemu: ngotupa lo tutumulumu yio̒ mamowali kaya wau hurumatiolio mongilabotao̒ woli olongia wewo penu boli tou̒toonu.

¹⁴ Wau wonu yio̒, debo odelo tiyamaamu Dauda, modungohe ola-U̒ wau modudua̒a butoo̒o-U̒, Wau̒ mamongohi mai olemu umulu u hayahaya.”

¹⁵ Tou̒ lobongu mola, tei Salomo longalati deu̒ Allahu Taa̒ala malo tahuda mai olio todelomo tohiilopo. Yi malo hualingo tio ode Yerusalemu tulusi timihulao̒ totalu Bulua Daantia lo Eeya wau helo podewo bake yilalango wau bake lo polodame. Lapatao̒ tio lohutu mao̒ potihunggu ode ngoa̒amila pogaweelio.

Tei Salomo lomutoo̒ palakala tuwau u mototolo

¹⁶ Tou̒ dulahee tuwau, taabua suuntali duulota mai lotaalua woli Olongia Salomo.

^17-18 Tala ngota limongolio loloi̒ya mao̒, “Paduka Taa Molamahu, watia wolo taabua botie bilu-biluloa̒ ngobele. Diaaluo penu boli ngotaa mao̒ tabilu-biluloa̒a wolamiaatia. Dengolo wakutu mola lopalutao̒, watia lopotutu mai walao̒ talolai̒ ngota. Duuhui mola lapatio mao̒ taabua botie olo malo potutu mai walao̒ talolai̒ ngota.

¹⁹ Tou̒ huilio tuwau tou̒ amiaatia donggo hituluhe, taabua botie lou̒ diila sangaja loo̒ deeheo̒ walai̒o tunggula yilate.

²⁰ To tomutaa̒ lou̒ hui tou̒ watia donggo tuutuluhu, taabua botie malobongu wau lohama walao̒ watia totili lowatia. Walao̒ watia boito pilopo balatio to potuluhelio, wau walao̒ tamailate boito pilopo balatio to potuluhe lowatia.

²¹ Loombulio mola dumodupo, tou̒ watia lobongu mai wau mamo potutu walao̒ watia boito, yi lotapu lowatia tio mailate. Tou̒ piloo̒ tuotao̒ lowatia, yi malo ilaalo deu̒ tio diila walao̒ watia.”

²² “Wimbulo!” ualo taabua uwewo boito, “Tatumu-tumulo walau̒uu̒, wau tailate boito walau̒mu!” “Diila!” tametao̒ lo taabua bohulio boito. “Tailate botie walau̒mu, wau tatumu-tumulo boito walau̒uu̒!” Odi-odieelo mola timongolio helo hahaamawa totalu li olongia.

²³ Lapatao̒ uali Olongia Salomo, “Ooo̒ timongoli ngota-ngota helongaku deu̒ walao̒ tatumu-tumulo botie walau̒mu wau diila tailate boito.”

²⁴ Lapatao̒ loloi̒ya mao̒ odito ti olongia lei̒hama mai wamilo.

²⁵ Tulusi ti olongia lomalentaao̒, “Timade mao̒ duluo walao̒ tamu-tumulo boito wau wohia mao̒ ngobutao̒ ngota-ngota taabua boito.”

²⁶ Loo̒dungohe palenta boito, tiilolio pulua lowalao̒ boito malo loi̒ya, “Ambungu, Baginda, diila mao̒ patea mate-mateelo mao̒ walao̒ boito. Wuduwalo mao̒ walao̒ botie olio.” Tiilo lowalao̒ boito maloloi̒ya odito sababu otolia̒ngio daa̒ walai̒o boito. Bo taabua uwewo boito malo loi̒ya, “Saaya, timadelo, huliilo mao̒ towolota lo lamiaatia diaaluo penu boli ngotaa mao̒ tamoo̒tapu olio!”

²⁷ Yi malo loi̒ya tei Salomo, “Diila patea walao̒ botie mate-mateelo mao̒! Wuduwalo ode taabua bohulio boito – tio-tiolo tiilolio.”

²⁸ Tou̒ bangusa lo Isirai̒lu loo̒dungohe pasali loputuusani lei Salomo todelomo palakala boito, timongolio malo linggolabu wau lohurumati olio. Sababu, malo ilaalo deu̒ Allahu Taa̒ala malongohi mai hikimati olio loponao̒ u aadili.