BOHULO MONGO OLONGIA 14 - KITABI HABARI MOPIOHE

Opopate lowalae̒e Yerobeam

¹ Tou̒ boito walao̒ talolai̒ lei Yerobeam tai̒lunte Abia longongoto.

² Malo loi̒ya tei Yerobeam ode dilelio, “Potidapa-dapatolo u monao̒ ode Silo ode bele li Nabi Ahia tamuloololio mai loloi̒ya deu̒ wau̒ mamowali olongia lo Isirai̒lu. Bo potihutu mao̒ debo odelo diila otaawa lotau tatoonu yio̒.

³ Delowalo mota ode olio mopuulo botu roti, kuukisi ngoi̒di wau hula lotiia̒ ngobuutulu. Yintua mao̒ olio wolo u mamotoduo mai wolei Abia, walao̒nto. Ti Nabi boito mamo poo̒taa mai olemu.”

⁴ Yi malonao̒ dile lei Yerobeam ode bele li Nabi Ahia to Silo. Ti Nabi boito diilalo moo̒onto sababu tio mapanggola daa̒.

⁵ Bo Eeya malo poo̒taa mao̒ olio deu̒ dile lei Yerobeam donggo to dalalai mai mohintu pasali lowalai̒o tamo ngongoto. Wau Eeya olo lopoo̒taa odeli Nabi Ahia wolo ude musi polelelio. Tou̒ dile lei Yerobeam leidungga mola odito, tio lotiwali debo odelo taa wewo.

⁶ Bo odito ti Nabi Ahia loo̒dungohe diambangio to huhebu, yi tio loloi̒ya mao̒, “Toduolo tumuwotai, otaawau̒ yio̒ dile lei Yerobeam. Sambelo diila potia̒akali. Woluo habari u mobulilo ode olemu.

⁷ Pohualingolo wau polelea mao̒ odelei Yerobeam deu̒ odie mola u pilotahuda mai lo Eeya Allahu Taa̒ala lo Isirai̒lu, ‘Yio̒ matilulaotu-U̒ towolota ulipu wau pilowali-U̒ tao̒kawasa to umati-U̒ Isirai̒lu.

⁸ Yio̒ mailohiyaa-U̒ bele biluloa̒ saaha li olongia u hilama-U̒ lonto wali lei Dauda. Bo yio̒ diila debo odelo wato-U̒ tei Dauda. Tio tatapu wau molotolo hilao tio̒otutua to Olau̒ wau modungohe palentaa-U̒. Tio helohutu bo wolo u ilakolowa-U̒.

⁹ Bo yio̒ helohutu ololeeto ulebe udaa̒ mao̒ lou̒ pilohutu limongolio lo tahelo malenta tou̒ dipo-dipolulio mai yio̒. Yio̒ lololaa mao̒ ola-U̒ wau helo potoodei mulukaa-U̒ lou̒ helohutu balaahala wau bubuu-iyaalo lonto logamu u hetuboolo.

¹⁰ Sababu uito Wau̒ mamopo dungga mai baala to ngaalaa̒mu. Ngoa̒amila waliimu mongo lolai̒, penu boli wolo huhuloa̒lio, mapateelio mate-mateelo mao̒. Wau̒ mamo poo̒pulitao̒ ngaalaa̒mu, tutuuwauwa debo odelo taa mongaa̒ato u mopoo̒ belesi mao̒ u kootoro.

¹¹ Pongawaa̒ lo ngaalaa̒mu tamaate tokota maa̒alo lo apula, wau tamaate to bulemengo kota maa̒alo lobulungi. Eelai mao̒, Wau̒lo Eeya tahelo tahuda mai!’ ”

¹² Wumbutio mola ti Nabi Ahia loloi̒ya mao̒ ode dile lei Yerobeam, “Ntali, pohualingolo botia! To saaa̒ti yio̒ tumuwotao̒ tokota, walau̒mu boito mamaate.

¹³ Ngoilanggubu ulipu lo Isirai̒lu mamotilimi wau molobungo olio. Tiolo tuwa-tuwaulo pongawaa̒ ngaalaa̒ lei Yerobeam tamaa lobungolo wolo dudelo huru-hurumati, sababu bo tio tamo tuhatawa tohilaa lo Eeya, Allahu Taa̒ala lo Isirai̒lu.

¹⁴ Isirai̒lu mawohia mai lo Eeya olongia ngota tamaa mopoo̒ pulitao̒ huhuloa̒a lo wali mola lei Yerobeam odelo olongia. Dulahio malei dungga! Tumulalo mai botia.

¹⁵ Eeya mamo hukuumani mai Isirai̒lu tilinggula moheheewula debo odelo hepu todelomo taluhu. Eeya mamo mahuto ulipu lo Isirai̒lu monto lipu umopiohe botie uilohi-Lio mai ode loluuhuru limongolio. Tio mamopo bubuua̒yawa olimongolio ode ngotuali lo Dutulaa Eperat, sababu timongolio malo potoodei omulukaa-Lio lou̒ helohutu bubuu-iyaalo dewi Asyera.

¹⁶ Eeya mamololaa mao̒ Isirai̒lu sababu tei Yerobeam mailodusa wau heloo̒ sababu olo taulo Isirai̒lu ilodusa.”

¹⁷ Lapatao̒ uito malo monggatolo dile lei Yerobeam ode Tirja. Tou̒ tio tilumuwotao̒ ode belelio, walai̒o mailate.

¹⁸ Ulipu lo Isirai̒lu helo titilimi lapatao̒ lolobungao̒ olio debo odelo u mapilo tahuda mai lo Eeya lotimbulude oli Nabi Ahia wato-Lio.

Opopate lei Yerobeam

¹⁹ Hikaayati wewolio tomimbihu li Olongia Yerobeam, deu̒yito-yito pamalentaalio wau popaatea u hetilau̒walio, malei tuladee todelomo buku Sojara Mongo Olongia lo Isirai̒lu.

²⁰ Dulo pulu lotaunu mola hiheolio tei Yerobeam helo malenta odelo olongia, lapatao̒ tio yilate wau yilobungio. Walai̒o tai̒lunte Nadab lobuulota wolio odelo olongia.

Ti Olongia Rehabeam lonto Yehuda

²¹ Tou̒ tei Rehabeam, walae̒e Salomo, lowali olongia lo Yehuda, tutumulio wopato pulaa tuwau lotaunu. Tio helo malenta mopulaa pitu lotaunu mola hiheolio to Yerusalemu. Monto ngoilanggubu lo Isirai̒lu kota boito mapilo tolomodu lo Eeya odelo tambati poi̒baadatiala ode Olio. Tiilo lei Rehabeam yito ti Naa̒ma lonto bangusa lo Amon.

²² Bangusa lo Yehuda helohutu u moleeto to bibilohu lo Eeya. Huhutu limongolio lebe loo̒toodei omuluka lo Eeya wolo totoonulalo huhutu loluuhuru limongolio.

²³ Toitaato huhuu-luduwaalo wau to walungo bubuu-ngowaalo ayu leidudulaa̒, timongolio helomongu tataa-mbatiyalo polubowalo balaahala wau helomungu tutuu-guwaalo wau bubuu-iyaalo dewi Asyera u hetuboolo.

²⁴ To tataa-mbatiyala boito timongolio helo tisuuntali odelo hipoluboa to dewa. Tumbao̒ mongo lolai̒ olo heo̒tuugasia odelo tasuuntali. Taulo Yehuda helohutu ngoa̒amila huhutu ukootoro u hepohutuo lo babaa-ngusawalo tamaa pilopolahi lo Eeya tou̒ taulo Isirai̒lu tilumuwotao̒ tolipu boito.

²⁵ To taunu olimolio pamalenta lei Rehabeam, tei Sisak, olongia lo Masiri loluhu Yerusalemu.

²⁶ Tio helo lambata ngoa̒amila balangi ohalaga uwoluo to Bele lo Eeya wau tobele biluloa̒ saaha li olongia, wau olo popoo-risaiyaalo hulawa u pilohutu lei Salomo.

²⁷ Yi odelo tulooi̒o ti Olongia Rehabeam helohutu popoo-risaiyaalo porunggu, wau pilo malacaya mao̒ ode mongo polowilalio takakaawali huhebu hulubangi lobele biluloa̒ saaha li olongia.

²⁸ Timii̒du ti olongia ode Bele lo Eeya, tahi pokawalia modelo popoo-risaiyaala boito, lapatao̒ mopo walingao̒ ode huwali podahaalo.

²⁹ Hikaayati uwewolio tomimbihu oli Olongia Rehabeam matiluladu todelomo buku Sojara Mongo Olongia lo Yehuda.

³⁰ Tomaasa pamalenta lei Rehabeam, laito woluo popaatea towolota lei Rehabeam wolei Yerobeam.

³¹ Lapatao̒ tei Rehabeam yilate wau yilobungio totambati lomongo olongia to Kota lei Dauda. Tei Abiam, walai̒o talolai̒ lobuulota wolio odelo olongia.