AYUBA 8 - KITABI HABARI MOPIOHE

Tei Bildad

^1-2 Lapatao̒ malo loi̒ya tei Bildad, “Dengolo mola poli hiheolio yio̒ mobisala odito? Loi̒yamu debo odelo dupoto u motingohe moo̒ohuu̒.

³ Allahu Taa̒ala diila pee̒enta mao̒ mopobenggo u aadili; diila pee̒enta mao̒ diila momata moponao̒ u otutu.

⁴ Tanu mongo walau̒mu odusa to Eeya, yi maa patutiliyolo timongolio hukuumanio mai lo Eeyaalo.

⁵ Bo wonu to Eeyaalo yio̒ motiwunela, mei̒ odehu hilao mai wau mei̒ ambungu,

⁶ wonu hilaamu juujulu, lou̒ diila o aibu, yi Allahu Taa̒ala mamo tulungi mai olemu wolo molamemeto; wau odelo wuupa, dileyaamu mamonguli mai.

⁷ Okokayamu uilooli boito diila oboliilio wonu pobandingio mola lou̒ wolo u de motapumu mai.

⁸ Taa aaripu tojamani muloololio mai mamusi poo̒tuotumu, wau toloe̒elaimu mola u ilolaasawa mai lomongo nenemoya.

⁹ Tutumulunto bo limbulimbu, ito diila motota lolo-loolo; duduu-lahunto debo odelo wolilu wamabai̒o.

¹⁰ Podungohulo loi̒ya lotaa aaripu omoo̒omolu boito, timongolio longohi mai pongaajali botie olemu,

¹¹ ‘To tambati u otaluhu wambai̒o hitumula hepu; ponta bo woluo tohuta otaluhu wau olatao̒.

¹² Wonu taluhio mohengu, hepu boito momingglato, lebe molamemeto wolo pilomulo wewolio. Lebe-lebe pomao̒ donggo molomiodu wau diipo saaa̒tilio, tio totobulo wau hamaalo hunalio.

¹³ Odi-odieelo mola taa udiila o eeya. Tio momalonga to Allahu Taa̒ala, yi mamoolilo mola halaapani.

¹⁴ Pitolo ngopata u moluo̒yo mowali pongakualio; beelea lo bambau maa lowali he palacayaalio.

¹⁵ Wolo motohheto beelea lo bambau boito wonu potidenelalo? Wolo moo̒taahangi pitolo boito wonu potidihumalo?’

¹⁶ Debo odelo padengo, oluliyalo mola lohilao taa udiila o eeya; wonu tinela mato lodulahu, tio mobutu mola molomiodu wau mopoo̒polu ilengi u pilomuloa wolo bubuu-ngawaalo.

¹⁷ Waa̒atio molibude boboo-tuwaalo tohuta; molibude motoheto, tio diila gaambangi moe̒etu.

¹⁸ Bo, ntali, bunggatalo mola botia padengo boito, yi debo odelo diila pee̒enta mao̒ tio boito woluo teto.

¹⁹ Ooo̒, osaanangi lotaa moleeto bo wambao̒ uito; taa wewo monao̒ mai wau mobuulota wolio.

²⁰ Bo Allahu Taa̒ala diila pee̒enta mao̒, mololaa taa debo molotolo hilao, wau olo diila pee̒enta mao̒ Eeya motulungi taa juluhaka.

²¹ Tunggilumu mapohutuo-Lio moi̒ii̒, biihumu mamo ngua-nguatio̒ meengahu.

²² Tahi polonua̒wa olemu mamoolito wau molaasa dupadupapa, wau bele lo tamoleeto marusaalio tunggula moa̒ntulu.”