AYUBA 7 - KITABI HABARI MOPIOHE

¹ Manusia boito debo odelo pilakusa u mohipate; tutumulio mobuheeto debo odelo tutumulo ngotaalio lotahe wuupalo;

² debo odelo wato tamooloolo wolungalo; debo odelo tamoo-kalajawa bangganga u hemohima tuli lobule.

³ Hulalo odungga hulalo tutumuluu̒ diila opatuju; hui odungga hui hilaau̒ polupolu lou̒ suukali lohilao.

⁴ Wonu wau̒ mota motuluhu, hui malo lasaalo mohiheo daa̒; tabitabi olau̒ tinelaa monto welaamo to hulungo mobutu mai, diila mowali wau̒ motibalata lou̒ duo̒duo̒to.

⁵ Wawau̒ polupolu loluanti wau denge loduhu; alipuu̒ pilalia wau hepoluala lolaala.

⁶ Tutumuluu̒ udiila o halaapani boito lolinggahu lotidulungo ode pulitio, lebe molinggahe wolo tamooheola moponao̒ lo sikuciilio.

⁷ Ambunguolo eelailo mai, yaa Allahu Taa̒ala, tutumulo watotia bo hiipo napasi; osanangiu̒ tutu yilooli, diila lololaa mao̒ bakasi.

⁸ Botia Eeya lomilohei olo watotia – bo diila lohiheo. De wonu watotia lolohu lo Eeya, yi watotia madiduu̒.

^9-10 Debo odelo heengo u lou̒le tulusi yilooli, manusia olo mate, diila tamonguli mai. Ngoa̒amila taa u pee̒enta loo̒onuhe olio, molipata olio, diialo moe̒ela olio.

¹¹ Sababu uito watotia diila mowali bo motipoo̒oyo! Laasa suukali lohilao wau paa̒ato hilao lowatotia diila mowali poo̒oyonga lowatotia. Watotia musi momuo̒ tunggilo watotia, wau moluangau̒ daata-daatalo mao̒ tuango hilaa lowatotia.

¹² Yilongola watotia botie ilimatoa tulusi lo Eeya wau hedahaa lo Eeya? Wolo watotia botie naha lodeheto tamoo̒ topotala?

¹³ Watotia lotibalata wau lohimontala lopoluli lo woongolo; watotia mololohe u mopoheelao̒ hilaa lo watotia usuusa.

¹⁴ Bo pilopoohe lo Eeya watotia wolo tohiilopo; pilopo dungga mai lo tohiilopo u moleeto wau hayaalani.

¹⁵ Tilinggula watotia lebe ohilaa tingoloo̒lo lapatao̒ mate wolo tumutumulo todelomo batanga polupolu lou̒ suusa botie.

¹⁶ Watotia moongolo wau motombolu tumumulo; watotia ohilaa mate wamabao̒! Poluliyalo mai watotia, sababu tutumulo watotia diila o boliilio.

¹⁷ Yilongola manusia odito polohuna daa̒ to Eeya? Yilongola huhutuulio laito hepoo̒ tuotai lo Eeya?

¹⁸ Tilulete lo Eeya tio timii̒du dimodupo, timii̒du saaa̒ti tio hetesia lo Eeya.

¹⁹ Omolua Eeya mopalinga monto watotia, alihu ohiango watotia mololoolao̒ yiyohu lo watotia?

²⁰ Wuu Tamoodahawa olo watotia, ambunguolo tingga moluhi Eeya sababu dosa lowatotia? Ambunguolo yilongola pilomake lo Eeya watotia odelo u pomantahelo pana lo Eeya? Ambunguolo, tingga odito buheeto watotia botie mopomanta mao̒ to batanga lo Eeya?

²¹ Ambunguolo, tingga mowali Eeya mongambungu mai dusa lo watotia? Ambunguolo, tingga pongalo aakali Eeya molulutai totala lo watotia? Bolo ngopee̒ mola watotia motibalata todelomo kuubulu, wau wonu lolohu lo Eeya watotia, diila tao̒dungga lo Eeya.”