AYUBA 32 - KITABI HABARI MOPIOHE

Tataa-heyaalo lei Elihu

¹ Sababu tei Ayuba yakini daa̒ pasali obobanali lo batangalio, yi tatoulota sahabatilio olo diilalo mohuto molametao̒ olio.

² Bo teto woluo ngotaalio tai̒lunte Elihu walae̒e Barakheel, ngotaalio lo walimai lei Bus lonto kaumu Ram. Tio diila loo̒ otongaao̒ yingolio, sababu tei Ayuba helo pobanali batangalio lohihilao wau lopotala to Allahu Taa̒ala.

³ Tio olo heloingo to tatoulota sahabati lei Ayuba boito sababu timongolio diila mowali mobatata mao̒ to tataa-heyaalo lei Ayuba, penu boli timongolio helo potala olio.

⁴ Tei Elihu taa udonggo humula daa̒ towolota limongolio, sababu uito tio helohima tunggula ngoa̒amilalo yilapato lobisala.

⁵ Tou̒ loo̒onto deu̒ tatoulota boito diila loo̒ tameto, yi tio maloingo,

⁶ wau loloi̒ya mao̒ odie, “Wau̒ donggo humula, hiambola timongoli mapanggola, sababu uito wau̒ moohe wau molawalo moo̒owoli mai huhamaau̒.

⁷ To pikiiilangiu̒ mola, timongolilo tamusi mobisala, talebe mohuhula mola musi molayadeo̒ hikimatilio.

⁸ Bo tamongohi mai hikimati to manusia, bo Rohullah wambao̒ Taa Laba-labaalo kawasa.

⁹ Taa mowali molinepo, diila sababu umululio mapanggola; taa mongalati u otutu, diila sababu molanggato umululio.

¹⁰ Sababu uito, dungohilo mai wau̒; poluasia mai wau̒ mopoo̒taa huhamaau̒.

¹¹ Wolo sabali wau̒ helo dungoheo̒ tou̒ timongoli hemobisala, wau helohima tou̒ timongoli hemo lolohe tataa-heyaalo u molinepo.

¹² Piloo̒ tuotuu̒ wolo ulintapo; ilodungoheu̒ timongoli loo̒toduo mai u marapo. Totala todelomo tataa-heyaalo lei Ayuba diila lowali bilukutia limongoli.

¹³ Woloolo mola mowali loiya limongoli deu̒ hikimati mai̒lo dungga limongoli? Sababu timongoli bolo pakusa lotaa̒aluku. Tamowali molameta olei Ayuba bo Allahu Taa̒ala wambao̒.

¹⁴ Ode olemuulo tei Ayuba helo bisala, wau diila to olau̒, bo wau̒ diila tamongohi totameto debo odelo timongoli.

¹⁵ Ayuba, timongolio helolingu wau diila moo̒ tametao̒; diaaluo u mowali polele mai limongolio.

¹⁶ Timongolio bo hitihula wambao̒, diilalo moo̒ bisala. Wolo wau̒ musi mohima eleponu timongolio hipoo̒oyonga lo batanga?

¹⁷ Diila, botia mawohi mai totameto; huhaamau̒ maposambeu̒ mai.

¹⁸ Diilalo sabali wau̒ mohima. Diilalo o otongaau̒ loi̒yaau̒.

¹⁹ Wonu wau̒ bo motipoo̒oyo wambao̒, mamopoo̒ lomola wau̒, debo odelo bututu u polupolu wolo angguru bohu.

²⁰ Wau̒ musi mobisala, alihu hilaau̒ moduo̒to; wau̒ musi momuo̒ tunggiluu̒ wau mongohi totameto.

²¹ Wau diila tamopo duulua penu boli tatoonu todelomo polo buutola botie wau diaaluo penu boli ngotaa mao̒ mapuji-pujiyou̒.

²² Dudelo u momujimuji mola olo, diila otaawau̒, wau humayaalio wau̒ mohutu mao̒ u odito, Allahu Taa̒ala mahua̒a mohukuumani mai olau̒.