AYUBA 18 - KITABI HABARI MOPIOHE

Tei Bildad

^1-2 Yi tametao̒ lei Bildad, “Wuu Ayuba, omolua yio̒ mopulito mobisala? Potipoo̒oyolo, wau dungohilo botia ami ohilaa mobisala mai.

³ Yilongola he anggapuomu ami abaloolo, wau hepo tutuuwaumu ami wolo sapi?

⁴ Oyiyingomu bo moo̒ ngongoto batangamu. Tingga musi duo̒lo polohunamu daa̒ dunia oolia lo tuangio, wau huhuu-ideyaalo polimbatolo monto tambatilio?

⁵ Tohe lotaa moleeto tantulo mao̒ pateelo; tululio diilalo pee̒enta mao̒ muli polei̒tolo.

⁶ Tilango todelomo kemalio mowali mou̒le; tohe pobaangio diilalo motinelo.

⁷ Diambangio u moontapo mowali papaa-mbelengalo mao̒; ranjanaalio lohihilao moo̒sababu olio meiteduo̒.

⁸ Tio monao̒ todelomo pajala, yi leikaitolo mola oa̒atio.

⁹ Tinggodio ilotalelea lotali talele, tilinggula ilowau̒palo tio.

¹⁰ To huta hituua̒ tali lotalele; to dalalo, hulihuli talele momantango wau momiyo hilao.

¹¹ Taa moleeto pilopo oohea lo moo̒tihela hapato monto totoonulalo mantahu; owowoohe molunuhe olio to timii̒du diambangio.

¹² Muloolio mai tio molotolo, botia tio morana; baala lowali tamaniilio penu boli tou̒toonu.

¹³ Alipio iliila lomaanea̒ tiluhua; polotodu wau oa̒atio lohutodu olaala.

¹⁴ Tio helo mahuto lonto kemalio, tambati tio molaasa aamani, lapatao̒ diledeo̒ u lotaalua lo opopate.

¹⁵ Botia tatoonu wambao̒ mowali motibiluloa̒ todelomo kemalio, wau teto pilomua̒yade waliirangi, pohinggi ngongotio.

¹⁶ Wawaaa̒tio lohengu wau loa̒luto; tataangolio kekeei̒ lohengu wau lokoyoto.

¹⁷ Tio diilalo oonuhe todelomo meaambo to bulemengo kota; diaaluo penu boli ngotaa mao̒ tadonggo moe̒ela mola tanggulio.

¹⁸ Monto mobaango tio pilolontulo ode delomo u modio̒lomo; monto dunia lotaa tumutumulo tio pilolontulo.

¹⁹ Walao̒ wau waliilio mola diaaluo; to kambungu pilohuluta lo duhulio penu boli ngotaa mao̒ didu ilolabita.

²⁰ Loo̒dungohe paladio ulipu to otolopa iloohea, hiambola ulipu to tiimuru hilumuhela sababu moohe.

²¹ Odi-odieelo mola paladu lotaa juluhaka, timongolio tadiila momandungi to Allahu Taa̒ala.”