AYUBA 12 - KITABI HABARI MOPIOHE

Tei Ayuba

^1-2 Tei Ayuba lolametao̒, “Memangi, timongoli botie helo wakili mao̒ umati lomanusia. Wonu timongoli mate, hikimati olo maamate olo.

³ Wau̒ olo manusia tao̒ aakali wau owatade; ngoa̒amila u heiloi̒ya limongoli mai̒lo pahamuwau̒. Donggo poli, tatoonu tadiila motota ngoa̒amila boito? Oditolio, diila mao̒ polantobu deu̒ timongoli mongilabotao̒ olau̒!

⁴ Wau̒ hepiloi̒ii̒a lotamani wau sahabati, lebe-lebe pomao̒ wau̒ botie otutu wau diila o aibu. Muloololio mai Allahu Taa̒ala hemo lametai dua̒au̒, wonu wau̒ mongiibode mei̒ tulungi mai.

⁵ Timongoli hemohina taa topotala, hiambola tutumulumu aamani; taa u ngopee̒ modehu hepilate limongoli.

⁶ Bo tutumulo lo tamoo lambata diila aa̒anjamu; taa u buheli motehengi Allahu Taa̒ala, hitumula aamani. Lebe-lebe pomao̒ dewa umowali pongaku limongolio, bo olootolo lohihilao wambai̒o.

⁷ Pohintulo to bulungi wau binatangi wewolio yi timongoli mawohia lo bulungi wau binatangi wewolio pongaajali.

⁸ Pohileelo katalaangani to mahaluku todunia wau to auhu, yi timongoli mamololimo poo̒patato.

⁹ Tatoonu towolota lo ngoa̒amila boito diila mongalati, deu̒ talopowali mai olimongolio yito Allahu Taa̒ala lohihilao?

¹⁰ Eeya mongaatulu mai tutumulo totoonulalo mahaluku uwoluo; Eeya okawasa to nyawa lotimii̒du manusia.

¹¹ Debo odelo dilau̒ ohilaa molamitao̒ ua̒alo u nyaamani, odito olo bulongau̒ ohilaa modungohe loi̒ya.

^12-13 Habariilio, hikimati woluo totaa u molanggato umululio, bo hikimati wau olootolo woluo bo to Allahu Taa̒ala wamabao̒. Uanggu huhaama woluo totaa u otutumulo panggola, bo huhaama wau haku wau okokawasa u mopohutu woluo to Allahu Taa̒ala wambao̒!

¹⁴ Wolo u bilonggari lo Eeya diilalo mowali bonguloolo tatoonu tatilawalo Eeya diilalo mowali molopato.

¹⁵ Eeya momubula taluhu, yi mohengu wau delita ngoa̒amilalo; Eeya molopatai taluhu tumolohu, yi moloo̒opolo mola taluhee daa̒!

¹⁶ Allahu Taa̒ala boito molotolo, suukali olaahe wau laito ohaasili! Tamoo-himbuloa wau tai̒lo yimbuloa woluo to walungo okokawasa lo Eeya.

¹⁷ Pilahuto Eeya hikimati lo tahi kawaasawa to pamalenta, wau mongo tau̒wa pilopowali lo Eeya hepilo ii̒iya lotau.

¹⁸ Bilantulelengo Eeya olongia wau tilawalo Eeya timongolio;

¹⁹ pilopo dupapa lo Eeya mongo iimamu wau tahimuloa lo lipu.

²⁰ Pilopobubu lo Eeya taa u moolato mobisala, Pilahuto Eeya hikimati lotau-tauwalo tahi panggolawa.

²¹ Piloo̒olito Eeya taa u himuloa lo ulipu taa u bangusa; hilama lo Eeya okokawasa mailaba molaio̒ limongolio takawa-kawaasa.

²² Bilaanga lo Eeya tataa-mbatiyalo udiila botie mobaango; tilinelaa lo Eeya wowoo-liluwaalo motontoyoo̒ma daa̒.

²³ Babaa-ngusawalo pilohutu mai lo Eeya manggango wau maa̒amulu, lapatao̒ pilopo binasa lo Eeya timongolio tunggula lotoyopu.

²⁴ Pilohutu mai lo Eeya mongo tau̒wa helolingu, tilinggula timongolio lonao̒ ode utoonulalo mao̒ lou̒ diila opatuju.

²⁵ Timongolio hioa̒a-oa̒apa todelomo u modio̒lomo, wau huhuu-yungaalo mao̒ debo odelo tahiluwoa̒a lo minumani.